Read Pochuri Naga HOSEA 12 Bible Online

HOSEA 12 - Pochuri Naga bible

HOSEA 12

¹Efraim tü amürhü avo satse veh, thi arülo ajü zhieshu mürhü zhetse veh; mari tü küzhüja thi küvürie saküzhi tse veh; mari tü Assiria sie nü azhüka küsü sasa veh, thi Egypt vü avüjuh vü wathuoh.

²VÜWA tü Judah vü phraküümsü küsü pehveh, thi Jacob tü ma lehkhujiri müzhe nü kümnomnatsü naveh, thi ma küürohküliri müzhe nü ma thuotsüle wie naveh.

³ Ma tü avo lovü nüh ma jie apezhe nta wurie, thi ma tü anyi saküm vü Saküüwuowa sie kürühluo.

⁴Ma tü rügizhülewa sie kürühluo nü chara, ma tü krie nü ma küütso phah; ma nüh Bethel vünüh ma mütu, thi ma nüh jüla nüh ma sie jüle.

⁵VÜWA akuoküjira Saküüwuowa, Ma nyo tü VÜWA!

⁶Thitü noh thuoüji, noh Saküüwuowa vü sheleteraluo, kümze thi müsho na küsa kenüh küjehphoke luo, thi noh Saküüwuowa huo peh huoh luo.

⁷Asüküsari küsü tü ma ke vü küzhüjah küütokhuri pehveh, ma tü mürü na küsa lom.

⁸Efraim nüh, hi nü nyirhiemthuoh, hi mpa eh kenüh hi tü künyirhie nyiemthuoh; eh künyierhie aveh vü khiemuom na küsa saküümsü küsü nga hi vü müngu, ta küza.

⁹Hi tü Egypt zhih vünüh nohri Saküüwuowa saküruwa; Akhu rülori küteke küsa üta hi nüh nohri tü juhthsüzheh lovü küürho le naveh.

¹⁰Hi nüh setsaküthsüri vü küzathuoh, kümohtsa saküüzhi tü hi nüh, thi setsaküthsüri vünüh hi nüh küzoriezosa viru naveh.

¹¹Gilead vü künakhie pehveh, jümari tü zanyo küsü nga mükünyu vü ru tsa wie naveh. Gilgal vü mari tü shüvotsazahri sahthuoveh, jükenüh mari kükhurüperi tü atovü khahuküsari aloh kümkrieke kümjie sam nathuoh.

¹² Jacob tü Aram zhih vü zhütewa, Israel tü jüla avüvüh küsü kenüh akütsü sa, avüvüh küsü kenüh ma tü anyihzhü kühuote sa.

¹³ Setsaküthsüri küsü vünüh VÜWA nüh Israel tü Egypt vünüh vishuhru, thi setsaküthsüri küsü nüh ma tü kühuote.

¹⁴Efraim tü VÜWA arüsaküshu shehmthuoh, jükenüh ma VÜWA nüh ma awuleh küvürie ma vü viteru naveh, thi ma müküchie kenüh ma shewi sashele tsü naveh.