Read Pochuri Naga HOSEA 13 Bible Online

HOSEA 13 - Pochuri Naga bible

HOSEA 13

¹Efraim nüh küphrahte vü, anyiri tü amüngu kükhe peh; ma tü Israel vü saküji; thitü ma tü Baal vünüh samküükura künakhie peh nü süm.

²Khinyi thuoüji mari tü khiemuo peh huomthuoh thi mari mpa makeria nüh kükhurüvü atso sasa vehthuoh, mari küthsükümshi müzhe nü rakasa anguori sasa veh, mari aveh nga asieküzhü vünüh sasa kheh veh. Ma nüh, “Hamari vü küsahthuo saluo,” ti küza. Anyiri tü mieshüzahri kümetsütsü ti saveh!

³Jükenüh mari tü arüne aküluküshü kümjie sam nathuoh, nyutü aküzo shita rateküwa kümjie sanathuoh, amütha kürütsepe vünüh aguh shohkürü nü prüteküwa kümjie, nyutü mürhülepie küsü vünüh anyikhu shohkürü nü prüteküwa kümjie sanathuoh.

⁴Tü hi tü Egypt zhih vünüh nosü küju VÜWA nohri Saküüwuowa satse; nohri tü hi wie küchie nüh küpa Saküüwuowa müthsü, thi eh nyiehvü küülolewa küpa münyie luo.

⁵ Shünyiza vü nohri avo küsawa tü hi nüh, kümkie azhih vü

⁶Hi nüh avo küsa vü mari tü lora; mari tü lora nü mari luoveh tü rhieza; jükenüh mari tü hi kümam.

⁷Jükenüh hi tü mari vü amiewuowa kümjie sanaveh, amie tü wa kümjie hi nüh lehkhuji nato vü lieke huo naveh.

⁸Awie küsü nüh ma tsa rühutewa nü arüshu taji mari vü küjoke kümjie thi hi nüh mari luoveh küüzhute müzükhrim tü naveh, jüla nüh hi nüh amiewuo küsü nüh mari küshohrie kümjie ato vü asa küsü nüh mari kümrhühnya üta satsü naveh.

⁹Hi nüh noh zorie naveh, O Israel, thawa nüh noh kükrara na lo?

¹⁰Noh külole na küsa kenüh khinyi thuoüji noh kajiwa khiela pehveh lo? Noh nüh, “Kaji küsü thi atakrüri vi hi tsüluo,” ta küsa noh nyujiri vü noh takrüri tü khievü pehveh lo?

¹¹HI nüh eh rüküshu vünüh kajiri küsü vi noh tsü; thi eh rükümtho vünüh hi nüh ma vitewa.

¹²Efraim künakhie tü khozhuh savehthuoh; ma kükhiemuo tü sazhuh vü savehthuoh.

¹³Atsawuo nta künari tü ma vü ru naveh, thitü ma tü zanyoküthsü atsa küsü, küpakenühnyunü ma mpa nüh atsotho kükato vü ashiekuo apovü müküru kenüh.

¹⁴Küsürazhie kükhra vünüh hi nüh mari thuotsü naveh ülo? Aküsü vünüh hi nüh mari rhehsa üti ülo? O aküsü, noh sanakükhori khie la pehveh lo? O küsürazhie, noh küzoriezosa khiela pehveh lo? Rüthaküna tü eh notha vünüh küthimthuoh.

¹⁵Ma nüh aprari azavü thetheta shi wie nga, zhieshu mürhü, VÜWA mürhü ru naveh, reza vünüh shuru nü; thi ma küwuzhu tü mükiem naveh, ma küshizhu tü tüthem naveh. Amekürhe zanyo ma künyirheie aveh rhojam tü naveh.

¹⁶Samaria nüh ma künakhie vü naveh, küpakenühnyunü ma nüh Saküüwuowa zhümküna nüh sie saluo küm kenüh; mari tü anyuchuwa vünüh külum naveh, ma tsa aküzahri tü kücheriem naveh, thi ma vüvühri atsamohküveh krevühri tü avo puzhuteru naveh.