Read Pochuri Naga HOSEA 2 Bible Online

HOSEA 2 - Pochuri Naga bible

HOSEA 2

¹Noh nü thi noh tsevüwa hama küza luo.

²Noh zah sie khuo luo, khuo luo, küpakenühnyunü ma tü eh vüvüh mükünyuthuoh kenüh, thi hi tü ma vüpa nyuthuoh, ma nyiehvü nüh ma muomuokürho vija na küsa kenüh, thi ma nyimzanyimpa küsa ma tüso azhievü nüh viküjam luo,

³nyu thuoüji hi nüh ma tü ma küwuo vü üta ma thsümnyi fo nü anyiju sanü küürütsom tü naveh ünüh, thi reza küsü kümjie samtü naveh ünüh, thi ma tü azhih küüwehkuokiki küsü sam tü naveh, thi ajuhküürieh vi ma zothem naveh.

⁴Ma tsari vü nga hi nüh norüthakünawa nyu, küpakenühnyunü mari tü muomuokürho atsari küsa kenüh,

⁵küpakenühnyunü mari azah nüh muomuokürho küsa kenüh; mari kümohvühwa tü khielota küzükrü küüroh küsa kenüh, küpakenühnyunü ma nüh, “Hi tü eh külopari asevü tewa naveh; mari nüh eh shie thi eh juh küzhu tsü veh, eh künehlothsü, eh külozülothsü eh vüjuh thi eh küzhu tsüküveh kenüh,” ti küza.

⁶Jükenüh hi nüh arüzhü vi ma leh ruoh mtü naveh; thi hi nüh ma vü azie küsü sakem naveh, jüta thuoüji ma tü ma leh mphahra nüh sanaveh.

⁷Ma tü ma külopari zhe naveh, thitü küpharawa nyu; thi ma nüh mari phah naveh, thitü küphahrawa nyu. Jüta thuoüji ma nüh, “Hi tü wa nü eh vüpa apokhuwa vü shele tewa nathuoh, küpakenühnyunü jüma tü eh kenüh khinyi anyiehvü nüh küümpha na küveh kenüh,” ti küza.

⁸Ma tü hi nüh ma vü akütsa, akhah, thi avüjuh tsü veh ta küsa müthsü, thi mari nüh Balri kenüh küvi rakasa thi suna kütseke tsü veh ta küsa müthsü.

⁹Jükenüh hi nüh ma tsotho vü eh tha vi shele tewa naveh, thi ma zale vü eh khah vi shele tewa naveh; thi hi nüh akünehlothsü thi eh külohzülothsü vitewa naveh, jümari tü ma nyiju sate na küsari.

¹⁰Khinyi thuoüji hi nüh ma külopara küngu vünüh ma küzükrü müsate nüh sam na thuoh, thi nyi küsü nga eh ke vünüh ma mügih lerathuoh.

¹¹HI nüh ma külozheloku, ma khuri, ma sa kürütheri, ma kümnyirülori aveh, thi ma khu küteke küsa aveh asehkhe sam tü nathuoh.

¹²Hi nüh ma rhelivirhuri thi ma müpahrhuri küümsüjam nathuoh, ma nüh jümari kenüh, “Hamari tü eh keme, eh külopari nüh hi kütsü,” ta küza. Hi nüh jümari tü areza samtü naveh, thi rezasari nüh jümari zoriem naveh.

¹³Baalri akhu rülori kenüh hi nüh ma sakümnomnatsü naveh, ma nüh jümari vü asierhie kükhurü thi ma mpa nüh ma tüjükhe thi asithe vi sürie sa, thi ma külopari vü nyi tewa, thi hi kümaküm kenüh, ta VÜWA nüh küza.

¹⁴Jükenüh khinyi thuoüji hi nüh ma nyie nü ma sie reza vü sieru naveh, thi kürünyi vünüh ma vü azhü küza naveh.

¹⁵Jüla nüh hi nüh ma vü ma rhelivizhuh tsü naveh, thi Akhor Anyuotü küluozhe mükhie küsü satsü naveh. Jüla nüh ma tü küshefü rülo vü üta Egypt zhih vünüh shuküru vü rüle naveh.

¹⁶Jüma rülo vü, ta VÜWA nüh küza, noh tü hi vü, “Eh vüpa,” taji naveh, thi noh tü hi vü, “Eh Baal,” ta küjiwa nyuthuoh,

¹⁷küpakenühnyunü hi nüh ma po vünüh Baalra nyo tü vijam na küvehkenüh, thi mari tü anyo vünüh küjiwa nyuthuoh.

¹⁸Jüma rülovü hi nüh nohri kenüh rezasari, amürhü vü prükütse müwari thi azhih vü zhukütse zanyori, sie kütsathuozhü sanaveh; thi hi nüh azhih jüma vünüh alawih, anyuchuwa, thi ariezoriejam naveh, thi hi nüh kütote vünüh küüze naveh.

¹⁹Thi hi nüh noh tü vi nü küsuokürho eh vüvüh sa nathuoh; hi nüh noh vi nü künyitsa vünüh thi kümsho vünüh, mükükhaphrükhale küümze vünüh, thi noküümze vünüh eh vüvüh sanaveh.

²⁰Hi nüh noh tü küzhütsanyitsa vünüh vi eh vüvüh sanaveh; thi noh tü VÜWA thsüra naveh.

²¹Jüma rülo vü hi nüh nohri kükhuori künatü naveh, ta VÜWA nüh küza, hi nüh atülüri rületsü naveh thi mari nüh azhihwa rületsü naveh;

²²thi azhihwa nüh atsuo, akhah, thi avüjuh rületsü naveh, thi mari nüh Jezreel rületsü naveh;

²³thi hi nüh eh kenüh azhihwa vü ma zhuh naveh. Thi hi nüh Loruhama vü rüthanoküna peh naveh, thi hi nüh Loami vü, “Noh tü eh nyiri,” ta küza naveh; thi ma nüh, “Noh tü eh Saküüwuowa,” ta küza naveh.