Read Pochuri Naga HOSEA 5 Bible Online

HOSEA 5 - Pochuri Naga bible

HOSEA 5

¹Hama künaluo, O navüri! Kükheke luo, O Israel zhehlori! kümrheke luo, O kajiwa zhehlo! küpakenühnyunü ashih tü nohri vü ru wie naküvehthuoh kenüh; noh nüh Mizpa vü küjurü küsü küsathuoh kenüh, thi Tabor vü aneh küsü shoh küüzethuoh kenüh,

²thi Shitim vü küphieke aküsheh küsü chüh sa veh; thitü hi nüh mari aveh vü kümnomnatsü naveh.

³Hi nüh Efraim thsü veh, thi Israel tü hi vünüh küthi müsa; küpakenühnyunü khinyi thuoüji, O Efraim, noh tü muomuorhomthuoh; Israel thuoüji sakümnemthuoh.

⁴Mari küürohküli nüh mari tü mari Saküüwuowa vü müküüsühlethuoh, küpakenühnyunü muomuokürho sietse tü mari azhievü pehkümthuoh kenüh, thi mari tü VÜWA müthsü.

⁵Israel kürhiezarhiechi nüh ma pohvü sa tü veh; Efraim tü ma künakhie vünüh ajih müshüshüti; Judah nga mari sie müshüshüti.

⁶Mari tü mari nyihnyihri thi mieshümiesari sie nü wa VÜWA phah naveh, thitü mari tü ma küphahrawa nyu; ma tü mari vünüh sühle tewathuoh.

⁷Mari tü VÜWA vü küzhütsanyitsa zülamthuoh; küpakenühnyunü mari tsa tü alietsa küwuo kenüh. Khinyi thuoüji asathe nüh mari nga ma zhuhri nga ti zoriem nathuoh.

⁸Gibeah vü arütsü khu luo, Rama vü atütü khu luo. Bethaven vü küüfükülo jikhi saluo; noh sevü noluo, Benjamin!

⁹Kümnomnakütsü rülo vü Efraim tü küüzojaküm sam nathuoh; Israel akuoh azhievü mowa nü azhütsanüh hi nüh phrahzhu.

¹⁰Judah kajitsari tü azhih arüh vijakümri kümjie samthuoh; hi nüh mari rügivü eh rükümthowa ajuh kümjie küshoke naveh.

¹¹Efraim tü ashih vü mürü thi küchenyamthuoh, küpakenühnyunü ma nüh müjuju ase nyi nta müshethuoke kümthuoh kenüh.

¹²Jükenüh hi tü Efraim vü amüthe kümjiethuoh, thi Judah zhehlowa vü priküm kümjiethuoh.

¹³Efraim nüh ma küna küngu vü thi Judah nüh ma kükhüma küngu vü, Efraim tü Assiria vü wa, thi kaji aküjiwa vü küze. Thitü ma tü noh samkükura nüh sam nyutü noh kükhüma samkümhiera nüh sam,

¹⁴küpakenühnyunü hi tü Efraim vü amiewuo küsü kümjie sanaküveh kenüh, thi Judah zhehlowa vü amiewuo atsa küsü kümjie sanaveh. Hi mpa nüh shohriem nü tewa naveh; hi nüh sawa wie naveh, thi nyi küsü nga müküloletsüra.

¹⁵Mari nüh mari kükhieh müjie küüthsüküju nü hi tü eh pe vü shele ru wie naveh, mari asheküsü vünüh mari tü eh küütso khuo naveh.