Read Pochuri Naga HOSEA 6 Bible Online

HOSEA 6 - Pochuri Naga bible

HOSEA 6

¹“Raluo, VÜWA vü shele tewa ünüh; küpakenühnyunü zokhri kümwa tü ma nüh, thi ma nüh hiri sakümhie na küveh kenüh, ma nüh ferie küzehmthuoh, thi ma nüh hiri pheh kütoke naveh.

²Rülo künyi sevü ma nüh hiri sakürho le naveh; rülo kücheawa ma nüh hiri kha toke naveh, jüta sanü hiri tü ma tüvü rhora naküveh kenüh.

³Hiri küüthsüluo, hiri tü VÜWA küüthsü wie luo, ma tü atholeh kürutsa üta ru wie naveh; ma tü atshoh kürüzü kümjieh, pasüh vü rü nü azhih küüjie kümjie ru wie naveh,” ta küza.

⁴Hi tü noh sie nü moti sanathuoh lo, O Efraim? Hi tü noh sie nü moti sanathuoh lo, O Judah? Noh küümze tü arüne vü akülu küsü kümjie, aküzo shita rateküwa kümjie.

⁵Jükenüh hi nüh setsaküthsüri sie nü mari shüchiemthuoh, hi nüh eh po azhü vünüh mari zothemthuoh, thi eh shih tü aküwie üta shuwawati,

⁶ küpakenühnyunü hi tü küsahthuo nyu nü mükükhaphrükhale küümze münguküm kenüh, kütso kükhurüri nyievü nüh Saküüwuowa zanyoküthsü müngum.

⁷Thitü mari tü Adam kümjie kütsathuozhüwa vüriemthuoh; jüla nüh mari tü hi mütsotü nüh samthuoh.

⁸Gilead tü kümsü küsa nyuji küsü, azüh vi ajise samthuoh.

⁹Kürühuri nüh anyi wuori huoküpeh üta, navüri tü kherüke nü pehvehthuoh; mari tü Shekhem vü küwa aleh vünüh anyiri fethetheti, mari tü wulehküvürie aküji sasati.

¹⁰Israel zhehlo vü hi nüh zanyo kükrüküngo ngu; Efraim muomuokürho jüla pehveh, Israel tü sakümnemthuoh.

¹¹Noh kenüh nga, O Judah, kümahwie küsü kütekemthuoh. Hi nüh eh nyira müngu sakütsüle vü.