Read Pochuri Naga HOSEA 7 Bible Online

HOSEA 7 - Pochuri Naga bible

HOSEA 7

¹Hi nüh Israel sakümhie na küsa vü, Efraim küütsaküsüh tü kütsaküngumthuoh, thi Samaria kümsüküsa küürohli tü kütsaküngumthuoh; küpakenühnyunü mari nüh küzhüja vünüh küsa kenüh, kürühutsari nüh vehphie tu, thi rietsokrükürühuri nüh alievü nüh lieke.

²Thitü hi nüh mari kümsüküsa aveh müsheke veh ta mari tü mümshemla. Khinyi thuoüji mari küürohküli tü mari mükieshe veh, jümari tü eh tsatü vü pehmthuoh.

³Mari kümsüküsa vünüh mari tü kajiwa alo saküwie, thi mari aromizhi nüh aküjiri alo saküwie.

⁴Mari aveh tü nyimzanyimpa küsari kheh; mari tü anyithü tsoküsa küsa kümjie, jümara lüse küvehri tü anyih müküjeke ketünga azhümnyieh, ahieküünya vünüh müjie küshü küju.

⁵Hiri Kajiwa rülo vünüh aküjiri tü akhah aküsa nüh namthuoh; ma nüh müküchieküzhüri sie nü ma ke thsuozhu,

⁶küpakenühnyunü mari tü juzhukümthuoh kenüh, mari luoveh tü mari lovü nüh ju veh; arüza ajü mari rüküshu tü müju nüh tsowa; arünevü thuoüji anyihzhu kümjie wierake.

⁷Mari aveh nga anyithü üta sa, thi mari nüh jümara takrüri mürhührie. Jümara kajiri aveh tü külumthuoh; mari nyi küsü nga hi müji.

⁸Efraim tü mari mpa nüh anyiri sie wurümthuoh; Efraim thuoüji atieshu mükükhaphrü küsü.

⁹Alienyiri nüh ma kükhra mürhühriemthuoh, thitü ma thuoüji jüma müthsü; ma rügivü asheh küpru zhuhketü, thitü ma tü jüma müthsü.

¹⁰Israel kürhiezarhiechi nüh ma pohvü sa; tü mari tü VÜWA mari Saküüwuowa vü müsühle, nyutü hamari aveh kenüh ma mphah.

¹¹Efraim tü mükhrietü küsü kümjie samthuoh, azhehphro thi ase münyie; mari nüh Egypt ji, mari nüh Assiria vü wa.

¹²Mari nüh kuoteküwa vü hi nüh mari vü eh neh jake naveh; amürhü vü prükütse amüwari kümjie hi nüh mari viturum naveh; mari kümhuwa vü azhükewa saküthsüküm müzhe nü hi nüh mari sosiekümsho naveh.

¹³Mari vü kümzüwa waluo, mari nüh hi vünüh kariteküwa kenüh! Mari vü zoriezosa luo, mari nüh eh zhü müvi nüh hi sie küsaluo kenüh! Hi nüh mari rhehsanaveh, thitü mari nüh hi vü akürie phrahte.

¹⁴Aluoveh lovü nüh mari tü müzie, thitü mari aze rügivü nüh mari tü küzia wie; mari tü mari mpa nüh atha thi akhah kenüh kütsithuoke wie; mari tü azhümvi nüh hi sie saluo.

¹⁵Mari apie sakükhra thi sakümzho kütsüwa tü hi nüh, tü mari nüh hi vü aro kümasü phah;

¹⁶Mari tü akünyia mükünyiewa vü küreletewa; mari nüh alawih mükümhie küsü kümjie vünüh ru; Ma küjiri tü anyuchuwa vünüh külum naveh, küpakenühnyunü mari mizhi küüte ti küsa kenüh. Hazake tü Egypt zhih vü mari phrahteküpeh huo sanave