Read Pochuri Naga HOSEA 8 Bible Online

HOSEA 8 - Pochuri Naga bible

HOSEA 8

¹Atütü vi noh pori vü kütieke luo! VÜWA zheh rügivü aluomü kümjie küsü pehküm kenüh, küpakenühnyunü mari nüh eh kütsathuo zhüwa zokhuo kümthuoh kenüh, thi eh khonyowa vü khazimthuoh.

²Israel nüh hi vü zie taji, “Eh Saküüwuowa, hiri Israelri tü noh thsü veh,” ta sa.

³Israel nüh kümhiewa müshüjamthuoh; mükünongüri nüh zhe nathuoh.

⁴Mari nüh kaji küsa vizhu, thitü hi vünüh nyu; mari nüh kajitsari vishu, thitü eh zanyoküthsü müvi. Mari mpa mari küzoriezosa kenüh mari rakasa thi suna vi anguo sa.

⁵Noh mieshüzah tü kulemthuoh, O Samaria. Mari vü eh rüküshu küluomthuoh. Mari tü küthake le müküsara mükükhieh peh na lo?

⁶küpakenühnyunü jüma tü Israel vünüh küsa kenüh, asieküzhüri küsü nüh jüma sa; jüma tü Saküüwuowa nüh nyu. Samaria mieshüzah tü zokhuoriem naveh,

⁷küpakenühnyunü mari nüh amürhü zhuh, thi mari tü nyiazamrhü wievi naveh. Toke küveh atsuori tü azhu münyie luo, jüma tü kütsaküzhu pemtsürathuoh; mükütüküzü jüma tü avi pe tsü thuoüji, alienyiri nüh jüma zoriem naveh.

⁸Israel tü müzhumthuoh; khinyi thuoüji mari tü Judah mkümyuri azavü aküfü momaküsa küsü üta pehmthuoh,

⁹küpakenühnyunü mari tü Assiria küju khru kümthuoh kenüh, reza ruwuhküzah küsü tü ma mpa tse pehveh; Efraim tü küümzeri kenüh she veh.

¹⁰Mari nüh akuoküjiri siewie ketünga, hi nüh mari vizhuhm naveh. Mari tü kajiri thi kajitsara akhuo kükhu vünüh kümto kürenyahm naveh.

¹¹Efraim nüh kükhiemuo vija nta kükhurüpe saküüzhi vü, jümari tü ma vü kükhiemuo küsa kükhurüperi satewawati.

¹²Hi nüh ma kenüh eh küsüphie khielota rhü wie nga, jümari tü azanyo kürüthe üta chiekemthouh.

¹³Mari nüh kürükatsatsa küsahthuoh kükhurü sa wie nga, mari nüh asa tsa wie nga, VÜWA nüh jümari müvithuoh. Khinyi thuoüji ma nüh mari künakhie müshekem nathuoh, thi mari kükhiemuo sakümnomnam nathuoh; mari tü Egypt vü shele teru nathuoh.

¹⁴Israel tü ma Sakütsüwa kümamthuoh, thi kajizhehri sasa vehthuoh; thi Judah tü anyuji kümzhori saküzhimthuoh; thitü hi nüh ma nyuji rügivü anyih küze naveh, thi jüma nüh ma nyuji kümzhori küüzorie naveh.