Read Pochuri Naga JOEL 1 Bible Online

JOEL 1 - Pochuri Naga bible

JOEL 1

¹Pethuel atsa Joel vü VÜWA zhü küru:

²Hama künaluo, O kükhruori, kümrheke luo, azhih jüla arhieri! Azanyo hakümjie küsa noh rülori vü, nyutü noh lanyiri rülori vü sa ünü nyu lo?

³Noh tsari vü jüma küza luo, thi noh tsari nüh ma tsarivü küüza luo, thi ma tsari nüh awuhle küpawa vü küüza luo.

⁴Ashukrie nüh kümje mowa kükhe sa veh lo, ashukrie riehkhuo sakütse nüh tsamthuoh. Ashukrie riehkhuo nüh mowa kükhe sa veh lo, jokütse kriema nüh tsamthuoh, thi jokütse kriema nüh mowa kükhe sa veh lo, zoriekütse kriema nüh tsamthuoh.

⁵Sühraluo, nohri kümsheri, thi krie luo; thi zia luo, nohri akhah küzhuri aveh, akhah kümhiewa anyiehvü, küpakenühnyunü jüma tü noh po vünüh vehjakümthuoh kenüh,

⁶ küpakenühnyunü akuoküji küsü nüh eh zhih zhevikümthuo kenüh, khielota kükhra thi mküürührhüra nüh; ma hari tü amiewuora ha, thi jüma tü amiewuo awie ahari pe.

⁷Jüma nüh eh rhelivirhuri sakümsüjamthuoh, thi eh mpah rhuri kürhieriemthuoh; jüma nüh ma kie müzuojam nü azhih vü vehjamthuoh; ma tsuonari tü müjimthuoh.

⁸Mükürüsa küsü nüh ma kürüla avüpa kenüh atsahkie küüzhu kümjie rümuo luo.

⁹VÜWA zheh vünüh atha kükhurü thi aküzhu kükhurü tü vijamthuoh. Anavüri thi VÜWA nasari tü külu vehthuoh.

¹⁰Azhuhri tü samsü jamthuoh, azhihwa tü külu vehthuoh; atsuo tü zorie kümthuoh kenüh, akhah tü küwehmthuoh, avüjuh tü sazihmthuoh.

¹¹Aluoveh zah luo, küürohtsari, reraluo, rhelivirhu küzahsheri, hiemtha rügivü thi khuozhikürümie rügivü reraluo; ato vü luoshüri tü ferie kümthuoh kenüh.

¹²Rhelivirhu tü wazhümthuoh, ampah rhu tü küzhamthuoh. Akatoh, aluophi, thi asholo, atovü athsoh aveh tü wazhümthuoh, azhütsa, anyiri azavü nyierakükhruo tü küwehm wiewieti.

¹³Atsakie küzhu nü rümuo luo, nohri navüri; reraluo, kükhurüpe anasari. Raluo, atsahkie vünüh arüza viküze luo, nohri eh Saküüwuowa[1] zheh vünüh atsuo kükhurü thi aküzhu kükhurü tü khetemthuoh.

¹⁴Assa küsa küsü sakümtse luo, küükhake kümhu küsü ji luo. VÜWA nohri Saküüwuowa zheh vü kükhruori thi azhih jüla arhieri aveh sazhuh nü VÜWA vü zie luo.

¹⁵ Arülo jüma tü ehzai! VÜWA rülo tü shenyi kümthuoh kenüh, thi jüma tü kükhratsawa vünüh küzoriezosa kütsa kütse üta.

¹⁶Saküüwuowa zheh vünüh hiri notha vünüh ashie, loküzhe thi aloküwie tü vijamüm ülo?

¹⁷Atsü tü apro kükhu vü müzüke tewathuoh, aluo tü küüzojamthuoh; atsuo müküpetüthuoh kenüh aluori tü zoriemthuoh.

¹⁸Mokümjie samwari tü lüchi vehthuoh lo! Arekümzhi mükünyiehthuoh kenüh mieshürüliri tü küzhu kelekeza vehthuoh; nyihzhü riekhuori wie nga matümaromthuoh.

¹⁹Noh vü, O VÜWA, hi tü zie veh. Shünyiza rekümzhiri anyih nüh tsokümthuoh kenüh, thi atovü athsoh aveh tü anyihzhu nüh tsomthuoh.

²⁰Ajuh küshuperi tü küweh kümthuoh kenüh asamwa kükrükhreri wie nga noh vü zie vehthuoh, thi anyih nüh reza kümzhiri zoriemthuoh.