Read Pochuri Naga JOEL 2 Bible Online

JOEL 2 - Pochuri Naga bible

JOEL 2

¹Zion vü atütü khu luo; eh kümtse küzhi vü küüfükülo jikhi saluo! Azhih jüla arhieri tü amüngukükhe luo, VÜWA rülo tü tekütsethuoh kenüh, jüma tü shenyimthuoh,

²aküzo thi alokürü rülo küsü, akülu thi küzomüthsüthsü rülo küsü! Aküzhiri rügivü akünyi mtho kühieta aküji thi thopahiri kükhra riekhuo kümjie küsü tsethuoh; jümari kümjie küsa tü khanavü nga müpehla nyutü akürho thuotüvü küru mari asevü nga küpehwa nyu.

³Mari atsatü vünüh anyih nüh tsorie, thi mari asevütü anyihzhu nüh tsopeh. Mari atüvü azhihwa tü Eden phahri kümjie, thitü asevü thuoüji reza jaküzo küsü peh veh, thi zanyoküsü nga mari mümrierhuo.

⁴ Jümara tso tü arawuhri atso pe, thi mari tü arie rawuhri kümjie jozhü.

⁵Rawuhkhekara jih jikhi küsa üta, jümari tü aküzhi rügivü jokejoke tse, anyihzhu küüwuh nüh amaguo tsorieküm kümjie, arienyiri akükhra riehkhuo küsü arieküsa kenüh küvizhu kümjie.

⁶Mari atüvü anyiri tü müshemnomna, anyieh aveh süzhitewa.

⁷Arieküsanyiri kümjie mari tü tse, arienyiri kümjie mari tü aziewa küte. Mari küsüküsü wie nga papa kütovü tse, mari tü mari lekhuji vünüh küzhihkemwa.

⁸Mari tü küsü nüh küsü mütohkeluo, papa küto rhiehküsa vü tse; mari tü rietsokrü azhievü khophie tu thi mütsatso.

⁹Mari tü anyujiwa rügivü jokewa, mari tü ashiehku rügivü zhüwa; mari tü azhehri rügivü müriwa, mari tü rühukütsari kümjie mürhülehpie vünüh müritu.

¹⁰Mari atüvü mükhrüküzhüh, atülüri tü amüngukükhe. Arünyi thi asa zotewa, thi awutsiri tü mari küwie ratewa.

¹¹ VÜWA nüh ma thopahiri lü vünüh ma jikhi phrazhu; ma thopahiri tü küzakele nga mküürührhüra lo! ma nüh azhükütsü kümjie tü mükürühkhera. VÜWA rülowa tü ji tsa; kükrüküngo tsa, thawa nüh jüma tüvü tsiera na lo?

¹²Jüta wie ketünga nohri luoveh aveh vü nü hi vü sühleraluo, ta VÜWA nüh küza veh, assa sanü, krie nü, thi külu nü raluo;

¹³nohri thsümnyi mümzükhrih tü nohri luoveh müzükhrih luo. VÜWA, nohri Saküüwuowa vü sühleraluo, ma tü lozhishem thi lonashem, arümshunyi, thi mükükhaphrükhale küümze vü proküluoh, thi kümnomna mütsü nüh nojatsütsüti.

¹⁴Ma tü sühle nü nojamtsü ta küsa thawa nüh thsü veh lo, thi akütsiawa ma sevü sam, atsuo kükhurü thi aküzhu kükhurü, VÜWA, nohri Saküüwuowa kenüh, ta küsa thsü veh ülo?

¹⁵Zion vü tütü khu luo; assa küsa küsü sakümtse luo; küükheke kümhu küsü kenüh ji luo;

¹⁶anyiri sazhuh luo; ashiejiwa sakümtse luo; kükhruoküzeri küüsezhuh luo; kürünguori jizhuh luo, nyinyuoteri wienga atüso vü küsezhuh luo. Kümnyutepawa tü ma te küüja luo, thi kümnyutevühwa nga ma ze küzietethsüwa küüjam luo.

¹⁷Anavüri thi VÜWA nasari tü atela thi kükhurüpewa masü azhievü nüh küükrie luo. “Noh nyiri müshie saluo, O VÜWA, thi noh kari tü küriesarienyi küsü müküsa tümluo, akuoküjiri azavü müküüphranyuo tümluo. ‘Ma Saküüwuowa ri tü khiela pehveh lo?’ ta anyiri azavü küüphrahte na lo,” ta mari tü küüphrahtem luo.

¹⁸Jüsevü VÜWA tü ma zhih kenüh nokürüpa tewa, thi ma nyiri vü norüthana tewa.

¹⁹VÜWA nüh ma nyiri vü kürüle vü: Hi nüh nohri vü atsuo, akhah thi vüjuh küze veh ünüh, thi nohri tü lora naveh ünüh; thi hi nüh nohri tü akuoküjiri azavü müküüriesarienyira le thuoh, ta küza.

²⁰Hi nüh nohri vünüh zhietü thopahiri vija küületsuom naveh, thi chüküüweh thi küüzoja zhih vü zhejaküzem naveh, ma tüvü nüh zhieshu juhküji vü, thi ma tüku nüh zhiese juhküji vü; ma prikümne thi ma prikümchuo arhe tü arügivü prüke naveh. Ma tü zanyo küji satsa wiethuoh!

²¹Mükrütümluo, O azhihri; alowie luo thi nyierakhruo luo, küpakenühnyunü VÜWA nüh zanyo küji hozake küsathuoh kenüh!

²²Mükrütüm luo, atovü samwari, küpakenühnyunü reza areri tü müzhi küveh thuoh kenüh; athsoh tü ma vi pe vehthuoh, ampah rhu thi rhelivirhu tü pe küüpro vü pehküvehthuoh kenüh.

²³O Zion tsari, VÜWA nohri Saküüwuowa vü alowie thi nyierakhruo luo; kükato vünüh ma nüh nohri vü atsohkürü kümto tsükümthuoh kenüh, ma nüh nohkeri nüh atsohkürü küwale küsho küturumthuoh, khanavü üta kümto thi kümnü tsokürü tsümthuoh.

²⁴Amütha kürütsepe tü atsuo nüh pro nathuoh, akhah thi vüjuh nüh ate pro nathuoh.

²⁵Kriema küüzhüh nüh tsaküm mahviri hi nüh thuotsüle naveh, Jokütsewa, küzoriewa, thi kümjeri, hi nüh küze nü nohri sie küüsaluo eh thopahiri riehkhuo küji küsü nüh zorieküm hi nüh thuotsüle naveh.

²⁶Nohri tü khielota peh nü tsanaveh thi lora naveh, thi VÜWA nohri Saküüwuowa siake naveh, ma tü nohri vü aküngotsatsa vünüh sa. Thi eh nyiri tü piketü küzükrü vü küthse lewa nyuthuoh.

²⁷Nohri nüh hi tü Israel aza vü pehveh ta küsa thsü naveh, thi hi tü, VÜWA, nohri Saküüwuowa thi küpa münyie luo.

²⁸Jüti sanü jüma sevü thuoüji hi nüh eh sietsewa anyiri aveh vü küshoketsü nathuoh; noh tsa nyimpari thi tsavühri tü setsaküthsüzhü phra naveh, nohri vü kükhruori tü amoh moh naveh, thi noh tsa vizari tü kümohtsa ngu naveh.

²⁹Tükha nyimpari thi nyimzari wie nga kümohtsa ngu naveh, jüma rülo vü hi nüh eh sietse küshoke tsü naveh.

³⁰Atülüri vü thi azhih vü hi nüh kükrüküngozanyori, azüh, anyihthi nyikhu külu kütsanaveh.

³¹ VÜWA rülo aküji thi küükrükra müjieküru atüvü arünyi tü zom naveh, thi asa tü azüh jem naveh.

³² Jüti küsa vü VÜWA nyo küjiri aveh tü külole naveh; VÜWA nüh küüza üta Zion küzhi vü thi Jerusalem vü tü mürieteküwari peh naveh, thi akürhori azavü tü VÜWA nüh küjiri peh na küveh kenüh.