Read Pochuri Naga JOEL 3 Bible Online

JOEL 3 - Pochuri Naga bible

JOEL 3

¹küpakenühnyunü jüsevü thuoüji, jüma rülovü thi jüma tsothovütü, hi nüh Judah thi Jerusalem amüngu küsalera vü,

²hi nüh akuoküjiri aveh sazhuh nü Jehoshafat anyuo vü sieturu naveh, thi hi nüh eh nyiri thi eh ka Israel kenüh mari sie ashih vü tu naveh, küpakenühnyunü mari nüh mari saküvorieküm kenüh. Mari nüh eh zhih küsuomthuoh,

³thi eh nyiri kenüh aküze samthuoh, thi küüphroküphrie kenüh vizanguori vi asü samthuoh, thi akhah kenüh rülanguori zhum nü jüma vi kümshemthuoh.

⁴ O Tair, Sidom thi Filistiari aveh, nohri tü eh kenüh mowa lo? Nohri tü zanyo wuori kenüh hi thuole nti ülo? Mükütüküzü nohri nüh hi thuo le nta thuoüji, hi nüh preratsarmie thi shishita nohri küürohküliri tü nohri alü rügivü vithse letsü naveh,

⁵küpakenühnyunü nohri nüh eh rakasa thi eh suna viteküwa kenüh, thi eh künyirhie kuri nohri kükhurüzhehri vü viteküwa kenüh.

⁶Nohri nüh Judah thi Jerusalem nyiri mari arüh kületsuo vünüh siezhunü Greekri vü zhumthuoh.

⁷Thitü khinyi thuoüji hi nüh mari saküsüra nü nohri nüh mari zhukümazhieri küüjam naveh, thi nohri nüh küsari vi hi nüh nohri rügivü thse le naveh.

⁸Hi nüh noh tsa nyimpari thi noh tsavühri zhu nü Judah nyira ke vü thsem naveh, thi mari nüh akuoküji kületsuo Sabeanri vü zhuküzem naveh; küpakenühnyunü VÜWA nüh küza kümthuoh kenüh.

⁹Judahmkünyuri azavü hama zhüchüh luo, Arie küche luo, arieküsari saküüngah luo. Arienyiri aveh tü küüshenyi luo, mari tü küüshuhru luo.

¹⁰Nohri kükhahumkhuri kütsüle nü anyuchu saluo, thi azhihkükhahuvühri, asühari kütsüh nü avi saluo; küthachuwa tü, “Hi nü arieküsari,” ti küüphrahte luo.

¹¹Shiti raluo, azhie aveh vü pehküveh mükütsotüri aveh, nohri mpa nüh jüla sezhuh luo. Noh rieküsari sieturu luo, O VÜWA.

¹²Mükütsotüri tü mari mpa nüh küüsühraluo, thi Jehoshafat nyuo vü küüshuhru luo; akuoküjiri zhephru aveh ashih sa nta hi nüh jüla shupeh naküveh kenüh.

¹³Ahira vi thse luo, kümahwiewa tüne küvehthuoh kenüh. Tu luo, rütse luo, akhah kütsüzhuwa tü proküvehthuoh kenüh. Atewa tü promzhie vehthuoh, mari kümsüküsa tü ji küm kenüh.

¹⁴Ashieji, ashieji, küürathuo anyuo vü! küpakenühnyunü küürathuoh anyuowa vü VÜWA rülo tü shenyi kümthuoh kenüh.

¹⁵Arünyi thi asa tü zomthuoh, thi awutsiri tü mari küwie müwie nüh samthuoh.

¹⁶Zion vünüh VÜWA rümuo vehthuoh, thi Jerusalem vünüh ma khi phrazhu vehthuoh, thi atülüri thi azhihwa tü küzhüh vehthuoh. Thitü VÜWA nü ma nyiri kenüh kümnyipe küsü, Israel nyiri kenüh ashiehkukümzho küsü.

¹⁷Jüti sanü nohri nüh hi, VÜWA nohri Saküüwuowa tü Zion, eh kümtse küzhi vü kürho saveh ta thsü naveh. Thi Jerusalem tü mütha naveh, thi anyitheri tü piketü jüma kari küwa le nyuthuoh.

¹⁸Jüma rülo vü aküzhiri tü akhah kümnge rütsuo naveh, küzhihori tü tünüjuh li naveh, thi Judah kuza azeri aveh tü ajuh li naveh; VÜWA zheh vünüh küwuzhu küsü shuru nü Wadi Shitimwa zü naveh.

¹⁹Egypt tü jaküüzoküm küsü nathuo thi Edom tü jaküüzoküm reza küsü sam nathuoh, Judah nyiri vü küvürie küsa kenüh, jüma zhih vünüh mari nüh mükünakhie azüh küüthü kenüh.

²⁰Thitü Judah thuoüji küsuokürho rhie naveh, thi Jerusalem tü awuhle aveh vü rhie naveh.

²¹Hi nüh mari azüh shewi vi naveh, thi künakhiewa hi nüh saküümtsewa nyu, VÜWA nüh Zion vü rhoküveh kenüh.