Read Pochuri Naga AMOS 2 Bible Online

AMOS 2 - Pochuri Naga bible

AMOS 2

¹ VÜWA nüh hakümjie küza veh: Moab küphrürie küche kenüh, thi müzüawa kenüh, hi nüh kümnomnakütsü külewa nyu, küpakenühnyunü ma nüh Edom kajiwa arü tso nü aweji küjeküm kenüh.

²Jükenüh hi nüh Moab rügivü anyih küze naveh, thi jüma nüh Keriot shiehkukümzhori zorie naveh, thi Moab tü kürümuo azhila vünüh sü naveh, azhila küüzie thi tütü jikhi vünüh sü naveh;

³Ma zhila vünüh hi nüh atakrüwa vi jam naveh, thi ma küjiri aveh ma sie nü zothe khehm naveh, ta VÜWA nüh küza.

⁴VÜWA nüh hakümjie küza veh: Judah küphrürie küche kenüh, thi müzüawa kenüh, hi nüh kümnonamkütsü külewa nyu; küpakenühnyunü mari nüh VÜWA khonyowa kulejaküm kenüh, thi ma zhühkheri müküsa kenüh, thitü mari tü mari lahnyiri nüh kütse akürie jümari nüh mari küjo küükarimthuoh.

⁵Kükenüh hi nüh Judah rügivü anyih küsü küze naveh, thi jüma nüh Jerusalem shiehkukümzhori küzorie naveh.

⁶VÜWA nüh hakümjie küza veh: Israel küphrürie küche kenüh, thi müzüawa kenüh, hi nüh kümnomnakütsü külewa nyu; küpakenühnyunü mari nüh rakasa kenüh künyitsawa zhuküm kenüh, thi jihküükruvüh künyi kenüh küthotsari zhum,

⁷kümkhuora lü azhitho lovü künyinyahke tü mari nüh, thi lehkhuji vünüh müshekümnomnari küchieküjari tü mari nüh; apawa nga thi atsawa nga masü khürü rüla küsü siesa, jüti sanü eh kümtse anyowa tü kümnemthuoh;

⁸Shieteküsa vünüh küvi thsünyawari rügivü mari tü mari mpa nüh kükhurüpe aveh nato vü zeh; thi ame prüvi nü akhah sü nü mari Saküüwuowa zheh vünüh zhu.

⁹Tü hi nüh mari atüvü nüh Amorri zoriemthuoh, ma kümsie tü amüse kümsie kümjie, thi ma tü anguzhe üta müzho; hi nüh ma vi kümsiewa zoriemthuoh, thi akükhu vü ma rüzoh zoriemthuoh.

¹⁰Jüsevü nga hi nüh noh tü Egypt zhih vünüh vizhu, thi mahvi zürake reza vü sie küjo tse, Amorra zhih vi nti.

¹¹Thi hi nüh noh tsa wuori setsaküthsüri küüsa nti thi noh tsa viza wuori Nazarenra khonyori küümzhe nti sieke, jüüta nyu ülo, O Israel nyiri? ta VÜWA nüh küza veh.

¹²Thitü nohri nüh Nazarenra khonyori akhah küüzhu, thi setsaküthsüri vü azhütsü taji, “Nohri tü setsaküthsüzhü küphrawa nyu,” ta küza.

¹³Jükenüh hi nüh nohri ape vü nüh nohri teküzeh naveh, amütha küshih küprole vünüh mieshükheka künete kümjie.

¹⁴Küprüvüh tü prüzhükütse vünüh pokahm naveh, thi kümzhori tü mari kükhra mü pehrathuoh thi akükhrari nga mari kürho mükülolerathuoh;

¹⁵alawih kükhrari tü mütsiera nüh sam naveh, thi ajih vünüh khachuh kütseri tü mari mpa nüh mükülolera nüh sanaveh, nyutü rawuh rügivü kütseri nga mari mükülolera;

¹⁶jüma rülovü anyi kümzhori azavü kütse luoveh kümzhohri tü anyiju jokezhü naveh, ta VÜWA nüh küza.