Read Pochuri Naga AMOS 7 Bible Online

AMOS 7 - Pochuri Naga bible

AMOS 7

¹VÜWA Saküüwuowa nüh hi vü küütsawa tü hama: asevü nüh küshowashizhu nta küsa tsotho vü ma tü ashukrie sazhu veh (jüma tü kajiwa nüh kürhie küm sevü nüh küshikheri)

²Mari nüh azhih jüma apra mürhuo kheh küm vü hi nüh, “O VÜWA Saküüwuowa, nojatsüluo, hi nüh noh vü khuo veh! Mokümjie Jacob tü tsiara na lo? Ma tü zah shem nü,” ti küza.

³VÜWA tü hama kenüh amüshe khaphrümthuoh; “Jümatü jüüta küsawa nyu,” ta VÜWA nüh küza.

⁴VÜWA Saküüwuowa nüh, hi vü küütsawa tü hama: VÜWA Saküüwuowa nüh küzhuhrie anyih küsü ji veh, thi jüma nüh aküsheh küjizorie nü azhih jüma tsa veh.

⁵Jüsevü hi nüh, “O VÜWA Saküüwuowa, lem luo, hi nüh noh vü khuo veh! Jacob tü mokümjie tsiera na lo? Ma tü zahle tsatsanü,” ti küza!

⁶VÜWA nüh hama kenüh amüshe khaphrüm; “Hama nga küsawa nyu,” ta VÜWA Saküüwuowa nüh küza.

⁷Ma nüh hi vü küütsawa tü hama: VÜWA tü küütevüh ali vi nü küsa ashiehku küsü nato vü tsie pehveh, ma kevü küütevüh ali küsü vinü.

⁸Thinü VÜWA nüh hi vü, “Amos, noh tü mowa ngu veh lo?” ta küna. Hi nüh ma vü, “Küütevüh ali küsü,” ti rületsü. JüsevüVÜWA nüh, “No luo, hi nüh eh nyi Israelri azhievü küütevüh küsü küze vehünüh; hi tü piketü mari kari küwa lewa nyuthuoh;

⁹Isaac azhie kümsieri tü, saküüzojam nathuoh, thi Israel kümtsezhehri tü, küümsüjam nathuoh, thi hi nüh sühra nü anyuchuwa vi taji, Jeroboam sie saluo naveh,” ti küza.

¹⁰Jüsevü Bethel navüwa Amazia tü Israel Kajiwa Jeroboam vü küza taji, Israel azheh azhila tsatsa vünüh Amos tü noh küjurhü vehthuoh; azhih jüma tü ma zhü aveh kenüh müküzhikera nüh sa vehthuoh,

¹¹küpakenühnyunü Amos nüh hakümjie vünüh küüza kenüh, Jeroboam tü anyuchuwa vünüh sü naveh, thi Israel tü aküsi küsa vü, ma zhih vünüh temwa üji mümhie, ta küüza kenüh ti küza.

¹²Thinü Amazia nüh Amos vü, “O setsazhüküphrawa, waluo, Judah zhih vü zhüwa nü noh vo mülietsaluo, thi jüla nüh setsazhü phraluo;

¹³thitü Bethel vü thuoüji piketü setsazhümüphra tümluo, jümatü kajiwa kümtsezheh küsa kenüh, thi jüma tü kajipewa kükhurüzheh küsü küsa kenüh,” ti küza.

¹⁴Thi nüh Amos nüh Amazia vü, hi tü setsaküthsüri nyu, nyutü setsaküthsüra tsa nga nyu; thitü hi tü mieshümiesa kühuori küsü, thi rürüvi rhu küürhiesheri,

¹⁵thi VÜWA nüh hi sie nü anyihnyih se küünyi nü VÜWA nüh hi vü, ‘Waluo, eh nyi Israelri vü küza luo,’ ta küza.

¹⁶Khinyi jükenüh VÜWA zhü künaluo. Noh nüh, ‘Israel vü setsazhü müphra tüm üta, thi Isaac zhehlowa vü phrahtemküza tüm üta,’ ta küza.

¹⁷Jükenüh VÜWA nüh hakümjie küza veh: “Noh vüvüh tü anyujiwa küüphroküphrie satewa nathuoh, thi noh tsa nyimpari thi, noh tsavühri tü, anyuchuwa vünüh külum nathuoh, thi noh zhih tü, ali nüh küte küsuoriem nathuoh; noh wie nga mükümtse azhih vünüh süm nathuoh, thi Israel tü ma zhih vünüh, aküsiküsa vü kütutsam wie nathuoh; ta küza.”