Read Pochuri Naga AMOS 8 Bible Online

AMOS 8 - Pochuri Naga bible

AMOS 8

¹VÜWA Saküüwuowa nüh hi vü küütsawa tü hama, müzhü thsohvi khuoküsü.

²Ma nüh, “Amos, noh tü mowa ngu veh lo?” ta küna. Hi nüh, “Müzhü thsohvi khuo küsü ngu veh,” ti rületsü. Thinü VÜWAnüh hi vü, Eh nyi Israelri vü asehkhe rülo tetsethuoh; hi tü mari kari küwawa nyu thuoh.

³Jüma rülo vü kükhurüzheh zahri tü, küzia jikhi sateru naveh, ta VÜWA Saküüwuowa nüh küza; “akümo[2] tü zhisheh naveh, azhie aveh vü veja naveh. Zoti peh luo,”

⁴Hama künaluo, küthotsari rügivü künyiteri, thi azhih jüla kümkhuori vü küferie vi küruri,

⁵“Asathewa tü küsie nüh junathuoh lo, jüta thuoüji hi tü, atsuo zhura na nü; thi kümnyirülo tü, küsie nüh junathuoh lo, jüta thuoüji hiri tü, aküzhu kenüh hiemtha thsera nathuoh nü? Hiri nüh küüto tü saküzah thi, küüte tü saküji na nü, jüti sanü akürie kütokhu nüh müramizhi na nü,

⁶rakasa nüh kümkhuori sü, thi jihküükruvüh künyi nüh, küthotsari sü naveh, thi azhehkürhüri tü, hiemtha nüh zhu naveh,” ta küza veh.

⁷Jacob kürhiezarhiechi kenüh VÜWA nüh küshiemthuoh: Mari nüh küürohküli aveh, hi nüh piketü küüma tsawa nyu wie.

⁸Hama kenüh azhihwa tü, amünguküükhe küüshühwa nyu, thi jüma lovü kürhori aveh tü, jüma kenüh küüluwa nyu, thi jümari aveh tü Nile kümjie sühra, thi Egypt kümjie küshüh thi, retewa le ta küsawa nyu ülo?

⁹Jüma rülo vü, ta Vüwa Saküüwuowa nüh küza, hi nüh arünyi tü, küzeto vünüh küütum naveh, thi azhihwa tü thomza küveh vünüh küüzom naveh.

¹⁰Hi nüh nohri kütsazhu tü küülu vü thsem naveh, thi nohri azah aveh vi kürümuo vü thsem naveh; Hi nüh atsahkie viru aküshih aveh vü tseketsü naveh, thi alü sakümtsetsü kheh naveh; hi nüh jüma tü atsa küümzetsawa kenüh, küülu kümjie satsü naveh, thi jüma sehkhe tü, akükha rülo küsü kümjie satsü naveh.

¹¹Atsothowa tü tetsetsa wiethuoh, ta VÜWA Saküüwuowa nüh küza, thi hi nüh azhih jüla kümkhuojih, küsü küze naveh; alohse nyutü küürieh juh kümkhuojih nyu, thitü VÜWA zhü küüna kümkhuojih küze naveh.

¹²Mari tü juhküji küsü vünüh, juhküji küsü tse wa naveh, thi zhietü vünüh, zhieshu küju tse wa naveh; mari tü VÜWA zhü phah nü, zhüwa zhüru ti sanaveh, thitü mari tü jüma mphahra.

¹³Jüma rülo vü shefüvüh thi, shefüpari tü küürieh kenüh anoji tu naveh.

¹⁴Samaria Ashima vünüh küüshieri tü, “Noh nyiaza rhoküveh üta, O Dan,” thi, “Beersheba lehkhujiwa rhoküveh üta,” ta küza naveh.