Read Pochuri Naga JONA 1 Bible Online

JONA 1 - Pochuri Naga bible

JONA 1

¹Amittai atsa Jona vü VÜWA zhü ru taji,

²“Küsükeri vünüh noh shiti anyuji Nineveh vü wa nü jümawa vü zie luo; küpakenühnyunü mari kükhusükharü tü eh tüvü teshuru ju küvehthuo kenüh,” ti küza.

³Thitü Jona tü VÜWA tü nüh Tarshish vü jotewa nti tsezhutewa. Ma tü Joppa vü tsuo ünü Tarshish vü wa nti küsa juhie küsü ngu ra; jüti sanü mari vü nyiwa nti jüla kütseri vü ma me thuo nü VÜWA tüvü nüh tewa nti sa.

⁴Thitü VÜWA nüh amürhü küji küsü juhküji rügivü vehjake, thi atsohmrhü aküji küsü juhküji nyiehvü ru nü ajuhiewa tü mürhüshi nti sakükrüphake.

⁵Thinü ajuhielo vü kütse ri tü krütewa nü papara nyiaza[1] vü zie. Mari kenüh sakümphie nta mari nüh ajuhie lovü kütü tsokrüri juhküjiwa lovü khaja. Jüta küsa vü Jona tü ajuhie küpie lovü tu küchuo nü zemophoke tewa.

⁶Azhezhiwa nüh ru nü ma vü, “Noh tü zeh mühieke nü mowa sapehveh lo? Süra nü noh nyiaza ji luo! Kümshe küsü thuoüji nyiaza nüh hiri kümze nü müpohka nüh sa nga mühie veh.”

⁷Akühieri tü küsü nüh küsü vü, “Raluo, hiri aküze sa ünü, jüta thuoüji thawa kenüh kümsü hamatü hiri vü ru veh ünüh hiri tü thsüra mühie küveh kenüh,” ti sa. Jükenüh mari tü Jona vü tsuotsake.

⁸Thinü mari nüh ma vü, “Mokenüh kümsü hamatü hiri vü ruthuoh ünüh hiri vü küza luo. Noh tü mo küüro wa saveh lo? Noh tü khievü nüh tse lo? Noh nyujiwa tü mowa lo? Thi noh tü moranyi lo?” ti küna.

⁹Jüta küüna vü ma nüh, “Hi tü Ebriri küsü. Hi tü VÜWA, atülü Saküüwuowa, juhküji thi azhih küüweh küsawa khurü veh,” ti rületsü.

¹⁰Jüti küüza vü anyiri tü kümsütsa krütewa nü ma vü, “Noh nüh saküm hamatü mowa thuoh lo,” ti küza. Küpakenühnyunü ma tü VÜWA tsatü vünüh zhütetsethuoh ta küsa ma nüh mari vü küüza kenüh.

¹¹Jüsevü mari nüh ma vü, “Hiri kenüh juhküjiwa tü küzohtewa na küsa kenüh hiri tü noh vü mowa sa üta lo?” ti küna. Juhküji wa tü küzhiküzhia ji kümthuoh kenüh.

¹²Ma nüh mari vü, “Hi kha nü juhküji lovü vehjakem luo; jüta thuoüji juhküjiwa tü noh keri nüh zota tetsuo nathuoh ünüh; küpakenühnyunü eh kenüh tsomrhü küji hama tü nohri vü ru küvehthuoh kenüh,” ti rületsü.

¹³Jüta wie ketünga anyiri tü ajuhiewa azhih küüweh vü visheleru ru nti akükhra thsesheh nü hiezhu nti sa, thitü mari tü müsara sam, küpakenühnyunü juhküjiwa tü mari vü tsomrhü küzhiküzhi saküm kenüh.

¹⁴Thi nüh mari tü VÜWA vü zie taji, “Münathetü, O VÜWA, hiri nüh khuo veh, ti nüh anyi hama kürho kenüh hiri müküüpokah tümluo. Mükükhieh azüh kenüh hiri tü müküükhieh tümluo; noh kenüh, O VÜWA, noh mowa loveh ünüh jüma saluo,” ti küza.

¹⁵Jüti sanü mari tü Jona kha nü juhküji lovü khajakem; Thinü juhküjiwa tü ma rükümthosheh vünüh letewa.

¹⁶Jüsevü anyiri tü khieloti VÜWA küsütsa krütewa nü VÜWA vü küsahthuoh sa thi küüshiephrahzhu sa

¹⁷Thitü Jona küümzhu nta VÜWA nüh anga kükajü küsü totsü; thi Jona tü angawa vo lovü rülo küche thi rüza küche tü.