Read Pochuri Naga NYITOKÜCHIE 13 Bible Online

NYITOKÜCHIE 13 - Pochuri Naga bible

NYITOKÜCHIE 13

¹Jüma sevü VÜWA nüh Mosa vü,

²“Apara kuoh küsüsü vünüh anyi asierhü küsüsü hi nüh Israel nyiri vü azhih kütsüwa Kanan zhih zi küze luo,” ti küza.

³VÜWA nüh azhükütsü kümjie mari aveh nga Israel nyiri vü alüri Paran reza vünüh Mosa nüh küze kheh.

⁴Thi ziküwara nyo tü hamari: Reuben kuoh vünüh Zekur atsa Shamua;

⁵Simeon kuoh vünüh Hori atsa Shafat;

⁶Judah kuoh vünüh Jefune atsa Kaleb;

⁷Issachar kuoh vünüh Josef atsa Igal;

⁸Efraim kuoh vünüh Nun atsa Hoshea;

⁹Benjamin kuoh vünüh Rafu atsa Palti;

¹⁰Zebulun kuoh vünüh Sodi atsa Gadiel;

¹¹Josef kuoh vünüh (jüma tü Manase kuoh) Susi atsa Gaddi;

¹²Dan kuoh vünüh Gemali atsa Amiel;

¹³Asher kuoh vünüh Maikhael atsa Sethur;

¹⁴Nafthali kuoh vünüh Vofsi atsa Nabi;

¹⁵Gad kuoh vünüh Makhi atsa Geuel.

¹⁶Anyi nyo hamari tü azhih ziwa üta Mosa nüh küüzeri. Mosa nüh Nun atsa Hoshea nyo tü khaphrü nü Joshua ti jitsü.

¹⁷Mosa nüh Kanan zhih zi üta mari küze nü mari vü, “Negeb kületsuozah wuovü wa nü aküzhi anyu wuovü waluo;

¹⁸thi azhihwa tü mokümjie ünüh, thi azhih jüla kürhori tü khraveh ünü mükhra nüh, zülaveh ünü zhiveh ünüh,

¹⁹mari nüh rho küveh azhihwa tü mhieveh ünü mümhie nüh, anyuküji mari nüh rho küveh azhehri tü kürünape wie ünü sakümzho nü pehveh ünüh,

²⁰azhihwa tü nyirhieveh ünüh mükhuom nüh, ma lovü athsoh pehveh ünü münyie nüh noluo. Luoveh ji sheh luo, thi azhih jümawa thsohvi wuori viru luo,” ti küza. Jüti küsa tsothovü tü rhelivi küne pokhu tsotho.

²¹Jüti sanü mari tü wa nü Zin reza vünüh Hamath vü kütu leh kütuoh vü Rehob küju khru nü zi wa.

²²Mari tü Negeb küju wa nü Hebron vü ru; thinü Ahiman, Sheshai thi Talmai Anak küshukürari tü jüla anyu sa pehveh. (Hebron tü Egypt zhih vü Zoan tüvü mahvi türü anyu sateruthuoh.)

²³Jüti sanü mari tü Eshkol Nyuo vü teru nü jüla nüh rhelivi tsuona küsü zahthuo nü akhrü küsü mpa atsühkhie thse taji nyi künyi nüh kharu; jü mpa mükünyu akatoh thi ampah nga suo viru.

²⁴Jüma azhie nyo thuoüji Eshkol, akhrü nyuo ti ji, küpakenühnyunü Israel nyiri nüh rhelivi khrü zahthuo küvi kenüh.

²⁵Rülo zürake sevü nüh mari tü azhihwa zim nü shele ru.

²⁶Jüti sanü mari tü azhühlewa vüru tsü, thi azhih jümawa thsohvi kha ti sanü Mosa, Aron thi mari anyi müzawa Israel nyiri vü kütsa.

²⁷Thi mari nüh Mosa vü, “Hiri tü noh nüh küüze azhih vü wa ünü azhih jüla tü tünüjuh thi awejuh nüh li pehveh, thi athsohvi hamatü azhih jüma thsohvithuo.

²⁸Thi azhih jüla rhoküveh nyiri nga müzho sheh, anyujiri nga sakümzho thi ji shehm; jüma nyiehvü nga azhie jüla Anak küshukürari hiri nüh ngu.

²⁹Amalekri nüh Negeb zhih vü rhoveh; Hitri, Jebusri thi Amorri nüh aküzhi wuovü rhoveh; thi Kananri nüh juhküji kütuoh thi Jordan nato vü rhowaveh,” ti küza.

³⁰Thitü anyiri nüh Mosa vü tsükhutsünyi küvehri küza küüzoh taji, “Hiri shita wa nü azhih jüla pehtemwa üji mümhie; küpakenühnyunü hiri tü küsara kümhie vünüh azhih jüma chara wie naküveh kenüh,” ti küza.

³¹Thinü anyi ma sie nü küwari nüh ma vü, “Hiri nü khru mari sie saluo na küsa müsara; küpakenühnyunü mari tü hiri nyiehvü nüh khraküveh kenüh,” ti rületsü.

³²Jüti sanü mari nüh wa nü azhih jüma küzi zhühke kümsü viru Israel nyiri vü küza taji, “Azhih hiri nüh waju nü küzi azhih jüma tü jüla kürhieri wie nga mürhühriemümti; thi anyi jüla kürho hiri nüh künguri aveh tü aja ji thi müsie shehsheh khem.

³³ Hiri nüh jüla Nefilim (Anak atsa nyimpari, Nefilim vünüh küru) nga ngu; hiri tü mari vü asuokrie kümjie wie, mari tü asatsa ji sheh thi müsie shehsheh khem; hiri tü mari notha vü asuokrie kümjie tsa wie,” ti küza.