Read Pochuri Naga NYITOKÜCHIE 14 Bible Online

NYITOKÜCHIE 14 - Pochuri Naga bible

NYITOKÜCHIE 14

¹Jüti küsa vü müzawa tü ajikhi zie kümsie sheh; thi jüma rüzavü anyiri tü krie kheh.

²Thi Israel nyiri aveh tü Mosa thi Aron vü khieloti küjakünya; müzawa aveh nüh masü vü, “Hiri nü Egypt vünüh nyutü reza hala nüh süküm nüh küümpha khe!

³Mokenüh VÜWA tü azhih hala hiri sieru nü anyuchuwa nüh küüzothe nti lo? Hiri vüvühri hiri tsari tü mokenüh nyura ke vü küütu nti saveh lo; hiri Egypt vü shele küwa nüh küümpha nyu naveh ülo?” ti sa.

⁴Jüti küsa vü mari mpa küsü nüh küsü vü, “Hiri azhezhi küsü rüka nü Egypt vü sheletewa ünüh raluo,” ti sa.

⁵Jüti küsa vü Mosa thi Aron masü tü Israel nyiri kümhu müzawa tüvü masü anyiehvü küngie peh.

⁶Thinü mari azhievü Nun atsa Joshua thi Jefune azhih zi nta nyiküwa masü tü masü thsümnyi zokhri taji,

⁷Israel nyiri müzawa vü, “Azhih, hiri nüh zi mükiele küwa azhihwa tü mhie küüluole azhih küsü wiehtuoh.

⁸Mükütüküzü VÜWA nüh hiri kümzetsaveh üji hiri siewa azhih hala sa wie nü azhih jüma vi hiri tsü wie naveh, azhih jüma tü tünüjuh thi awejuh nüh li pehveh.

⁹ Hiri nüh müthsüji mükümhiewa thuoüji, VÜWA sie wuluo nü ma mükülo müsa tümluo; thi azhih jüla küpehri mükrü tümluo, küpakenühnyunü anyi jümari tü hiri kenüh alohse küsü wie; mari künyuotewa tü mari vünüh vijamthuoh; thi VÜWA tü hiri wuovü pehveh; tinü mükrü tümluo,” ti küza.

¹⁰Thitü müzawa tü aloh vi nü masüveh üti küza. Jüti saküveh vü VÜWA kütholathovüwa tü küsezhuh juhthsüzheh rügivü nüh Israel nyiri aveh vü kütsa kheh.

¹¹Thinü VÜWA nüh Mosa vü, “Anyi hamari tü küthake hi mülo nüh sana lo? Hi nüh mari azavü athsoshi aveh sa wie ketünga mari tü küthake hi mütsotü nüh sa wie na lo?

¹²Hi nüh asahna küze nü mari küürhiem taji mari mükürhora satsü naveh, thi mari nyiehvü nüh hi nüh noh tü khra thi akuoküji küsü küüsanaveh,” ti küza.

¹³ Thitü Mosa nüh VÜWA vü, jüta thuoüji Egyptri nüh künake nathuoh, küpakenühnyunü mari azavü nüh noh nüh noh kükhra vünüh hamari küvizhu kenüh,

¹⁴thi mari nüh anyu hala kürhori vü nga küzam naveh. O VÜWA, noh tü anyi hamari azavü pehveh ta küsa mari nüh thsümthuoh, thi künyitoh noh ngumthuoh, noh küluwa tü mari nyiehvü peh, thi arülovü thuoüji akülu tovüh kümjie küsanüh sietse, arüza vü thuoüji anyih tovüh kümjie küsanüh mari tüvü kütse kenüh.

¹⁵Mükütüküzü noh nüh anyi hamari aveh nyi küsü küfethe kümjie fethem thuoüji akuoküjiri noh kütholathovü küünarari nüh,

¹⁶“küpakenühnyunü VÜWA tü ma nüh azhih tsü nta phrahteke küsawa vü sie müküwara kenüh rezavü nüh mari zothemthuoh ta sana nü.

¹⁷Hi nüh khinyi noh vü khuoveh, tinü noh nüh küphrahzhu üta VÜWA kükhra tü küüji luo, küüza üta,

¹⁸ ‘VÜWA thuoüji arüküshu zhihke, ma mükükhaphrükhale küümze thuoüji ji sheh, müküleh küsa thi küphrürie nga nojatsüveh, thitü müküleh küsawa thuoüji mükümshora, apara müküleh küsa kümlie vi atsari awuhle küche thi müzü küju nga tsümümti.’

¹⁹Hi nüh noh vü khuoveh, tinü noh mükükhaphrükhale küümze küjiwa müzhe nü thi Egypt vünüh nosü küju nojakütse kümjie nojatsüluo,” ti khuo.

²⁰Thinü VÜWA nüh, “Noh zhü müzhe nü hi nüh müküleh nojamthuoh;

²¹ thitü hi nüh phrahtemthuoh nü hi nüh rho kütsetsa küju thi VÜWA kütholathovüwa azhih vü küüprotsanaveh,

²²Egypt vünüh thi rezavü nüh eh kütholathovü thi athsoshi sakütsathuoh, tü türakeri hi müte nü eh zhü müküna nta sa kümthuoh kenüh eh kütholathovü thi eh thsoshi künguri thuoüji nyi küsü nga rhowa nü,

²³mari pari vü tsü nti küshie küsa azhihwa müngura; thi hi kule kümri nga müngura.

²⁴ Thitü eh siepe Kaleb thuoüji sietse küpa küsü peh nü eh se nyijutse wiethuoh nü ma thi ma küshukürari thuoüji ma nüh küwa azhih vü hi nüh siewa naveh.

²⁵Tinü Amalekri thi Kananri nüh anyuori vü pehküm kenüh nohri thuotü kümrujuh küji lehkhujiwa müzhe nü reza wuovü nüh tewaluo,” ti küza. Kümnomna Kütsü

²⁶Jüsevü VÜWA nüh Mosa thi Aron vü,

²⁷“Anyi müza kümsüküsa hamari tü küthake hi vü küjakünya na lo? Israel nyiri nüh küjakünya küveh hi nüh künarathuoh, thi jüma tü hi vü küjakünya veh.

²⁸Jükenüh mari vü küza luo, hi nüh rho küveh üta hi nüh küünara vünüh nohri nüh mowa küza nüh hi nüh nohri vü satsü naveh!

²⁹ Nohri kümo tü reza hala küluzehm nathuoh; nohri nyito küchie, mahvi mükeke vünüh wiehvü nyito chieküsari aveh, hi vü küshükhushünyiri thuoüji,

³⁰hi nüh nohri küürho nti phrahteke küsa azhih vü Jefune atsa Kaleb thi Nun atsa Joshua wie küchie nüh nohri küpari thuoüji nyi küsü nga müwara.

³¹Thitü nohri atsari nyura kevü tetu nathuoh ta küsari thuoüji azhih jüla vitu naveh, thi mari thuoüji nohri nüh maküm azhihwa thsüra naveh.

³²Thitü nohri thuoüji, nohri kümo reza hala küütsuotsam nathuoh.

³³ Nohri kümo sehkhewa küju reza hala müjie küzeh küju nü nohri mükünyitsa kenüh noh tsari tü areza vü mahvi zürake nyihzhü kühuori satse naveh.

³⁴Nohri nüh azhihwa ziküwa vü rülo zürake küvi üta rülo küsü vü mahvi küsüsü sanü mahvi zürake nohri müküleh küsa khuowa vü naveh, thi jüchih ünüh hi tü alomra nüh küsa thsüra naveh.

³⁵Hi, VÜWA nüh küzam wiethuoh nü kümsüküsa müzawa sezhuh nü hi sie wuluo küvehri aveh vü hi nüh hama satsa wie naveh: reza hala nüh mari tü sehkhe sanaveh, thi mari tü jüla nüh sü naveh,” ti küza.

³⁶Thi azhihwa zi üta Mosa nüh küüze nyiri, thi sheleru nü zhühke mükünyu viru nü müzawaluoveh sakümsü nü saküüjakünyari,

³⁷azhihwa zhühke mükünyu viküruri aveh tü VÜWA tüvü nüh sahna vünüh sükhehm.

³⁸Thitü zi küwari Nun atsa Joshua thi Jefune atsa Kaleb masü thuoüji rho.

³⁹Jüti küsa vü Mosa nüh azhü hamari aveh vi Israel nyiri vü küza kheh, thinü mari tü khieloti shükhephohke peh.

⁴⁰Thinü rüne thomtho mari tü sühra nü aküzhi kümsieri anyu wuovü wa nü, “Halie, hiri tü hala pehveh; hiri tü khiemuomthuo, tinü hiri thuoüji VÜWA nüh phrahteke küsa azhiewa vü tekhru nathuoh,” ti küza.

⁴¹Thitü Mosa nüh, “Nohri tü mokenüh VÜWA nüh azhükütsü phrürieveh lo, küpakenühnyunü jüüta vünüh nü küsarawa nyu nü?

⁴²Nohri mükünongüri tüvü nüh nohri thama küüzorieküja kenüh mükhru tümluo, küpakenühnyunü VÜWA tü nohri azhievü pehmküveh kenüh.

⁴³Amalekri thi Kananri tü nohri tüvü pehveh, tinü nohri tü mari nyuchuwa nüh kürhie küütsuotsa wie nathuoh; küpakenühnyunü nohri tü ma sekünyi vünüh kürele teküruthuoh kenüh, thi VÜWA tü nohri vü nyiküwa wa nyu,” ti küza.

⁴⁴Thitü ma mpa nüh kütsathuo kuwa thi Mosa tü kürünape vünüh mükütsezhu thsütoh ketünga mari tü aküzhi anyu wuovü tewa.

⁴⁵Thinü Amalekri thi Kananri anyu jüla kürhori tü jüla turu nü mari cham taji mari zhe Horma küju teru.