Read Pochuri Naga NYITOKÜCHIE 15 Bible Online

NYITOKÜCHIE 15 - Pochuri Naga bible

NYITOKÜCHIE 15

¹Jüti küsa vü VÜWA nüh Mosa vü,

²“Israel nyiri vü küza luo, nohri hi nüh azhih vi nohri kütsü vü peh nta küru vü,

³thi nohri nüh küphrahzhuwa saju nta nyutü apashe vünüh kükhurü sa nta nyutü nohri nüh küteke küsa akhu vü, VÜWA vü küüngu sa nta sanü VÜWA kükhurü küsa ma mpa nüh nyihsü azavü nüh saluo nyutü nyihzhü aza vünüh saluo anyih vünüh kükhurü satü kütso kükhurü satü nyutü küsahthuo satü sa nta thuoüji,

⁴nohri küsüküsü nga viru thuoüji nyihzhü nyutü nyihsü VÜWA vü kütso kükhurü sa nta viküru vü, nyihnyih küsü vü ahie nüh vi kükhurü kenüh Olive vüjuh kete küsü küwirü ahie küüto küsü,

⁵thi akhah aküzhu kükhurü kenüh kete küsü vü anyihnyih küsü kenüh küche nü viru naveh.

⁶Thi nyihzhüvo vi nü khurü thuoüji ahie vi nü kükhurü kenüh ahie küüto küsü Olive vüjuh kete küsü nü küzhila küünyurü viru naveh,

⁷thi jüti küsa vü akhah kete küsü nü küzhila nga viru naveh. Küsahthuo asierhe hamari tü VÜWA vü sakütsü asierhe küsü.

⁸Thi nohri nüh phrahteke küsawa saju nta küsa vünüh kütso kükhurü kenüh nyutü, küsahthuo kenüh, nyutü VÜWA vü kütsathuo kükhurü kenüh shüvotsa vi nü küche,

⁹ti thuoüji ahie kükhurü küüto küche Olive vüjuh kete künyi küünyarü viru naveh,

¹⁰thi akhah kete künyi nga kürü viru naveh. Küsahthuo arheküüngu mütsuo hamatü VÜWA vü arheküüngu küsü sanaveh.

¹¹“Ma mpa nüh shüvotsazah saluo, nyihzhüvo saluo, nyutü nyihzhüzahvo, nyutü nyihsüzahvo saluo hakümjie vünüh sanaveh.

¹²Nohri nüh küzake nüh vi küche naveh ünüh jüzake vünüh sanaveh.

¹³Atotsari aveh thuoüji hakümjie vünüh anyih vünüh tso nü khurü nü VÜWA vü küüngu satsü naveh.

¹⁴Mükütüküzü nüh anyitheri priru kürhori nyutü nohri wuhle vünüh nohri azavü nyirho tekütseri nüh nohri kümjie nyi sa nta wie ketünga küüsaluo.

¹⁵Kümhu vünüh thuoüji nohkeri nüh nga thi priru kürhori nga nohri awuhle küju awuhle wuleh zarike vünüh mükhaphrükhale nüh nohri nüh mokümjie ünüh jükümjie vünüh mari nga VÜWA tüvü sa wie naveh.

¹⁶ Nohri kenüh nga thi priru kürhori nga khonyo zarike thi zhühkho nga zarike ti sa wie naveh,” ti küza.

¹⁷Jüsevü nga VÜWA nüh Mosa vü,

¹⁸Israel nyiri vü küza luo, nohri hi nüh siekütse azhih vü ru thuoüji,

¹⁹VÜWA vü kükhurü satsü naveh.

²⁰Nohri nüh nohri luoshü kümthuora khuozhi kürüthewa nüh vi nü tiehshu sa thuoüiji ahie kütoh pokhuwa zhi nüh tiehshu shu nü küsü vi kükhurü küsü sanü tsü naveh.

²¹Nohri wuhle aveh vü nohri kütsaküzhu apokhuwa vi nü kükhurü sa VÜWA tsü naveh.

²²Thitü nohri nüh müküleh sam, thi mükütüküzü nohri nüh VÜWA nüh Mosa vü azhükütsü hamari aveh mümzhe nüh sam,

²³thi VÜWA nüh azhükütsü sevü, thuotüvü nohri wuhle küju jüma müsanüh saküram,

²⁴thi jüma tü ashiejiwa küthsü vünüh müsanüh samiem thuoüji ashiejiwa tü VÜWA vü asierhe ahie kükhurü, aküzhu kükhurü zhühkho müzhe nü shüvotsa zah ti vi taji kükhurü kenüh nyihsüvo küsü vi nü kükhurü sanaveh.

²⁵Thi navüwa nüh Israel nyiri ashiejiwa aveh kenüh kütsathuo küüroh sanü mari müküleh noküja sa naveh; küpakenühnyunü jüma tü müküleh; thi mari müküleh kenüh mari nüh VÜWA vü anyih vünüh kükhurü, thi kükhiemuo kükhurü VÜWA tüvü viküruthuoh kenüh mari müküleh nojamthuoh.

²⁶Israel nyiri ashiejiwa aveh thi priru nü mari azhievü rhoküvehri aveh müküleh nojatsü naveh, küpakenühnyunü anyiri aveh müküleh jüla nyi küpeke kümthuoh kenüh.

²⁷ Mükütüküzü nyi küsü nüh müküthsü vünüh müküleh sam thuoüji ma nüh khiemuoküm kenüh nyihsü nyimpari mahvi küsü kükhruo vi kükhurü sanaveh.

²⁸Ma nüh müküthsü vünüh khiemuo küm kenüh ma nüh müküleh saküm kenüh navüwa nüh ma kenüh VÜWA tüvü küsahthuo küüroh sanü ma müküleh noküja sanaveh.

²⁹Ma mpa nüh Israel anyi anyupewa saluo priru kürhori saluo müthsü nüh khiemuom thuoüji khonyo zarike sa wie naveh.

³⁰Thitü ma mpa nüh Israel nyi anyuperi saluo thi priru kürhori saluo thsütoh nü kükhiemuo sa thuoüji VÜWA sie küwuluo samthuoh, tinü ma thuoüji ma nyiri azavü nüh ma jam nathuoh.

³¹Küpakenühnyunü ma nüh VÜWA zhü tü mam taji ma nüh azhükütsüwa fekhuo küm kenüh, jükenüh anyi jüma tü khemta jam wie naveh; ma mükülehwa tü ma vü kükuo wie naveh, ti küza.

³²Thinü Israel nyiri reza vü peh wieküveh tsothovü kümnyirülo vü nyi küsü tü athsoh mükhrüla nü mari nüh ngura.

³³Jüti küsa vü anyi jüma athsoh mükhrüla nü künguri nüh ma re nü ma sie Mosa, Aron thi ashiejiwa vü ru.

³⁴Thitü ma vü mowa sanaveh ünüh müjie küthsütoh kenüh ma vi nü navüzheh lovü thsem.

³⁵Thinü VÜWA nüh Mosa vü, “Anyi jüma tü zothem naveh, kürünape alievü siezhuwa nü ashiejiwa nüh aloh vi taji ma vehthe jam naveh,” ti küza.

³⁶Jüti küsa vü VÜWA nüh azhükütsü kümjie ashiejiwa aveh nüh alievü ma siezhuwa nü aloh nüh ma vehthem.

³⁷Jüsevü VÜWA nüh Mosa vü,

³⁸ “Israel nyiri vü küza luo, mari tü mari thsümnyi vü athsühu sanü athsühu vü akhehm nüh müsükürülo nü athsühu vü huke luo, thi hamatü mari wuhle küju sanaveh;

³⁹thi jüma tü noh mpa noh luoveh thi noh mpa noh notha kümshewa, jüma tü müngu shehke wie nü jümawa vü temwa nüh sanü athsühu jüma no nü VÜWA nüh azhükütsü aveh müshe taji müzhe na küsa kenüh athsühu jüma sanaveh.

⁴⁰Jüti sanü nohri saküümshe taji hi nüh azhükütsü aveh sa kheh, thi nohri Saküüwuowa vü küümtse naveh.

⁴¹Hi tü nohri Saküüwuowa, hi tü nohri Saküüwuowa sa nti küsa kenüh Egypt zhih vünüh nohri vizhuru: Hi tü VÜWA nohri Saküüwuowa,” ti küza.