Read Pochuri Naga NYITOKÜCHIE 16 Bible Online

NYITOKÜCHIE 16 - Pochuri Naga bible

NYITOKÜCHIE 16

¹ Levi atsa Kohat, Kohat atsa Izhar, Izhar atsa Kora, thi Reuben kuoh vünüh Eliab atsa Dathan thi Abiram, thi Pelet atsa nga,

²thi Israel tsari refü azhievü nüh sierhü wuori, anyi küthohlari müza künyi nü tünyieke rüka nü Mosa tüvü wa;

³jüti sanü mari tü sezhuh nü Mosa thi Aron sie saluo taji, “Nosü tü kuoletsuosheh tewathuoh! küpakenühnyunü ashiejiwa tü mari nyi küsüsü wie nga aveh mütse, thi VÜWA tü mari azhievü pehveh; thinü jüta thuohnü nohsü tü mokenüh nohsü mpa nohsü sakümsieveh lo?” ti küza.

⁴Mosa nüh jüma küünaravü ma nyieh vü küngie tetsuo;

⁵thinü ma nüh Kora thi ma refüri vü, “Thuotü rüne VÜWA nüh thari nü ma zhiri, thi thari nü mütseveh ünüh küza kütsanaveh, jüti sanü ma nüh jümari tü ma vü shehnyi küüru naveh, thi thari nü ma nüh rüka naveh ünüh ma nüh jümari vü saküüshehnyi küru naveh.

⁶Hama saluo: Kora thi ma refüri aveh tü nyihthiku vi luo;

⁷jüti sanü thuohtü nyihthiku lovü anyih thse taji jüma nyiehvü asierhe VÜWA tüvü thse luo, jüti küsa vü thari nüh VÜWA nüh rüka saveh ünüh kümtsewa sanaveh. Levi atsari, nohriwa nüh letsuosheh tewathuoh lo,” ti küza.

⁸Mosa nüh Kora vü küza lehü taji, “Levi atsari, nohri eh zhü künaluo:

⁹Nohri tü Israel ashiejiwa vünüh saküpa nü nohri sie taji ma mpa ma vü sie shehnyi küru, thi VÜWA juhthsü kükhurüzheh küüroh sanü ashiejiwa tüvü tsie taji küüroh satsü na küsa tü küzah ülo;

¹⁰ma nüh nohri sie ma shehnyi ruthuoh, thi noh jienü Levi atsari aveh nohri sie ruthuoh. Thitü jüta thuoüji nohri tü navü küüroh nga nohri nüh sa nti phahveh ülo?

¹¹Jükenüh noh thi noh refüri nüh hakümjie sezhuh küveh tü VÜWA wuluo küveh wie; Aron tü thawa nü nohri tü ma vü azhü mükünyu phraveh lo?” ti küza.

¹²Jüti küsa vü Mosa nüh anyi küze nü Eliab atsa Dathan thi Abimam küüji, thitü masü nüh, “Hisü nü küshuhruwa nyu.

¹³Noh tü reza vünüh hiri zothe nti azhie tünüjuh thi awejuh nüh liküveh azhie vünüh hiri siezhu teru nü nohri nüh hiri nyiehvü kaji sana küsa hatü küzah ülo?

¹⁴Jü mpa mükünyu noh tü hiri sie nü tünüjuh thi awejuh nüh liküveh azhievü siemru, nyutü hiri azhuh küsatsara thi rhelivizhuh küsara vü siemru. Noh tü anyi hamari zothe nü mari notha saküümam nti ülo? Tinü hisü thuoüji müshuhrura,” ti rüle küze.

¹⁵Jüti küsa vü Mosa tü khieloti arüshu nü VÜWA vü, “Mari nüh kükhurü müsiake tümluo. Hi nüh mari vünüh rawuh küzahwa küsü nga müvi, thi mari nyi küsü nga samkümnomna,” ti küza.

¹⁶Thinü Mosa nüh Kora vü, “Thuohtü noh thi noh refüri, mari thi Aron ti ru eh tüvü tsie luo;

¹⁷thi nohri aveh nga tahthsü vi nü jülovü sierhe thse luo, thi nohri nyi küsüsünga tahthsü vi taji VÜWA tüvü ru luo, noh nga thi Aron nga ti tahthsü müza künyi nü tünyieke vi ru luo,” ti küza.

¹⁸Jüti küüzavü mari aveh nga tahthsü küjehke nü anyih thse taji asierhe jüma anyihvü thse nü Mosa thi Aron nyi taji küsezhuh juhthsüzheh lehpie vü tsie.

¹⁹Thi Kora nüh küsezhuh aveh jiru nü küsezhuh juhthsüzheh lehpie vü küütsie taji masü vü küüprüke kheh. Thinü VÜWA kütholathovü tü ashiejiwa vü ru nü küüngu kheh.

²⁰Jüti küsa vü VÜWA nüh Mosa thi Aron vü,

²¹“Anyi küsezhuh hamari vünüh nohri mpa nohri saküpatewaluo, jüti sanü hi tü küsükeri vünüh mari küüzoriem luo,” ti küza.

²²Thinü masü tü masü anyieh vü küngietsuo taji, “O Saküüwuowa, akürho aveh sietseri Saküüwuowa, nyi küsü nüh khiemuo küm vünüh küsezhuh aveh vü arüshu nti ülo?” ti küza.

²³Thinü VÜWA nüh Mosa vü,

²⁴Küshüjiwa tü Kora, Dathan thi Abiram kürhope vünüh tewa üti küza luo, ti küza.

²⁵Jüti küüza vü Mosa tü süra nü Dathan thi Abiram vü wa; thi Israel kükhruori nga ma vü nyiwa.

²⁶Thinü Mosa nüh ashiejiwa vü, “Mari kümsüküsari kükhiemuo kenüh nohri thama chiküja kenüh hi nüh nohri vü khuoveh, tinü anyi kümsüküsa hamari juhthsüzheh vünüh tsezhutewaluo, thi mari zanyo küsü nga müpa tümluo,” ti küza.

²⁷Jüti küüza vü mari tü Kora, Dathan thi Abiram kürhope vünüh tewa kheh; thinü Dathan thi Abiram masü tü masü tsavühri thi atsa küzahri aveh sie shuhru mari juhthsüzheh lehpie vü tsie kheh.

²⁸Jüti küsa vü Mosa nüh, Nosü nüh tuvü hi tü eh kümshe vünüh nyunü VÜWA nüh zanyo hamari aveh küsa kenüh küze ta küsa thsü naveh.

²⁹Anyi hamari tü anyi aveh nüh küsü kümjie küsü tüla, nyutü anyiri aveh vü küru kümjie mari vü küru tüla, VÜWA nüh hi müküze.

³⁰Thitü VÜWA nüh zanyo kürüthe sanü azhihwa tü ma po ga taji jümari thi jümari azhi aveh müzhum, ti sanü jümari tü küsüra azhie vü müsü nüh tetu thuoüji anyi hamari thuoüji VÜWA kulemthuoh ta küsa müthsüji mümhie, ti küza.

³¹Jüti küsa vü Mosa nüh azhü hamari phrathuom ünü azhih mari nüh nyi küveh kükhu vünüh kuorietewa;

³²thi azhih tü ma po garie nü mari, mari zhehlori, Kora nyiri aveh thi mari zanyori aveh müzhum.

³³Jükenüh mari thi mari zhi aveh akürho Küsürazhie vü tetu nü azhihwa tü ma powa tü tsarü taji mari tü kümhuwa azhievü nüh pogah khehm.

³⁴Jüti küsa vü Israel mari mükieshe küvehri tü anyi jümara jikhi zie nü kuotekütu künara taji mari tü, “Azhihwa nüh hiri müzhu thuoüji,” ti sanü zhütewa kheh.

³⁵Thi VÜWA vünüh anyih turu nü anyi müza künyi taji tünyieke sierhe tso taji khurü küvehri tsothe khehm.

³⁶Jüsevü VÜWA nüh Mosa vü,

³⁷“Aron navüwa atsa Eleazar tü nyihthiku anyih ju wierake küvehri vizhu nü luo wie küshorieja luo. Küpakenühnyunü jümari tü mütse küm kenüh,

³⁸nyihthiku hamari küviri tü mari kürho kenüh khiemuom; jükenüh atsüvü vi nü jümari kütsüh kürüpuo taji kükhurüpewa küsote sam luo, küpakenühnyunü jümari tü vi nü VÜWA tüvü kükhurü sakümthuoh kenüh; jükenüh jümari tü mütsem. Hakümjie küsa vünüh jümari tü Israel nyira thsoshi küsü küsanaveh,” ti küza.

³⁹Jükenüh Eleazar navüwa nüh anyih nüh tsothe kümra sahwuo nyihthikuri atsüvü nüh kütsüh kürüpah nü vi kükhurüpewa küsote sa,

⁴⁰Israel nyiri müshe küüthe na küsa kenüh VÜWA nüh Mosa vünüh Eleazar vü küüza kümjie sa, jüta thuoüji navü mükünyuri, Aron küshuküra mükünyuri thuoüji VÜWA tüvü shehnyiru nü asierhe mütsora, küpakenühnyunü mari tü Kora thi ma refüri kümjie thama küüsa kenüh.

⁴¹Thitü rülo jüma nyie tü Israel nyiri ashiejiwa tü Mosa thi Aron vü jahzhi taji, “Nohsü nüh VÜWA nyiri zothemthuoh,” ti küza.

⁴²Jüti sanü mari tü Mosa thi Aron masü vü alomküra kenüh sezhuh küveh vü Mosa thi Aron masü tü küsezhuh juhthsüzheh wuovü küprüke tewa, thinü halie, akülu turu nü külüwute taji VÜWA kütholathovüwa küüngu.

⁴³Thinü Mosa thi Aron masü tü küsezhuh juhthsüzheh tüvü ru,

⁴⁴Jüti küsa vü VÜWA nüh Mosa vü,

⁴⁵“Hi nüh küsükeri vünüh mari zoriem nathuoh, tinü nohsü anyi müza hamari azavü nüh tewaluo,” ti küza. Thinü masü tü masü anyieh vü küngietsuo.

⁴⁶Thinü Mosa nüh Aron vü, “Noh nyihthiku vi nü kükhurüpe vü nüh anyih thse taji asierhe thse taji shiti ashiejiwa vü wa nü makeri’a nüh kütsathuo küüroh saluo; küpakenühnyunü VÜWA rüküshu tü kuowathuoh, thi asahna tü kuoküwathuoh kenüh,” ti küza.

⁴⁷Jüti küüza vü Aron tü Mosa nüh küüza kümjie nyihthikuwa vi nü kümhuwa azhievü wa, thinü halie, nyiri azavü sahnawa tü sate tewa; thi asierhe thse nü anyiri kenüh kütsathuo küüroh sa.

⁴⁸Jüti küsa vü ma tü küsüri thi kürhori azhievü tsie; thinü sahnawa tü letewa.

⁴⁹Sahna vünüh sükümri tü anyie türa müzü nü müza türü, hamari tü Kora sie küüproluo vünüh küsüri müküchie nyie.

⁵⁰Jüti küsa vü sahnawa letewa ünü Aron tü küsezhuh juhthsüzheh vü Mosa vü teru.