Read Pochuri Naga NYITOKÜCHIE 18 Bible Online

NYITOKÜCHIE 18 - Pochuri Naga bible

NYITOKÜCHIE 18

¹Jüti küsa vü VÜWA nüh Aron vü, “Nohri, noh tsari thi nohri pari tü nohri sie nü kümtsezheh vü mükülehri aveh vü kheh naveh; thi nohri thi nohri tsari tü nohri sie nü navü küüroh vü mükülehri vü kheh naveh.

²Thi noh küru vü noh jünüri, Levi, noh pa jünüri nga sie nü ru luo, jüti sanü noh thi noh tsari nüh pohvü juhthsüzhehwa tüvü peh küveh vü mari nga nohri sie nü küroh naküveh kenüh.

³Jüti sanü nohri vü nga thi juhthsü kükhurüzhehwa vü nga ti küüroh aveh sakheh naveh; thitü noh nga thi mari nga thama küüsü kenüh kümtsezheh vü küfüküjuhri nyutü kükhurüpewa vünü shehnyi küruwa nyu.

⁴Mari tü noh sie nü küroh naveh thi küsezhuh juhthsüzheh vü küüroh aveh saju naveh; thitü küpari thuoüji nohri shehnyi küüruwa nyu.

⁵Thi Israel nyiri vü arüküshuwa mükürule nüh sana küsa kenüh noh tü kümtsezheh küüroh vü thi kükhurüpe küüroh ti sanaveh.

⁶Thi halie, hi nüh noh jünü Leviri tü Israel nyiri azavü nüh vimthuoh; mari tü noh vü temwathuoh, thi VÜWA vü tsümthuoh, küsezhuh juhthsüzheh vü küüroh na küsa kenüh.

⁷Noh thi noh tsari tü noh sie nü noh navü küsa akhuowa kükhurüpe vü nga thi küzietethsü azhie vü nga ti küüroh sanaveh; nohri nüh küroh naveh. Noh navü küsa akhuowa tü hi nüh aküte vünüh tsü, thi anyi küpari nüh zanyo hamari shehnyi ru thuoüji küüsü wie naveh,” ti küza.

⁸Jüti küsa vü VÜWA nüh Aron vü, thi halie, kükhurü vünüh momowa vi hi tsü naveh ünüh, Israel nyiri nüh sakümtse zanyori aveh; noh thi noh tsari vü mükükhaphrü navü küsa tsümthuoh.

⁹Anyih vünüh mükütso zanyo kümtsetsa hamari tü noh zhi sanaveh: mari nüh kükhurü viküru küsüküsü nga jümari tü ahie kükhurü viküru aveh, kükhiemuo kenüh kükhurü viküru aveh, mari nüh müküleh küsa kükhurü viküru aveh, mari nüh hi kütsü aveh noh kenüh thi noh tsari kenüh kümtse tsatsa wiethuoh.

¹⁰Kümtse tsatsa azhie küsü vünüh noh tü jüma tsanaveh; nyimpari aveh thuoüji jüma tsara naveh; jüma tü nohkeri nüh mütsem.

¹¹Thi zanyo hamari nga noh zhi sanaveh: mari nüh aküte viru kükhurü nga, Israel nyiri nüh noküja kükhurü viküru aveh; mükükhaphrü wuleh sanü hi nüh hamari vi noh, noh tsa nyimpari vü thi nyimzari vü tsümthuoh; noh tharuo vü thari nüh mütseveh ünüh jümari aveh thuoüji tsa mhieveh.

¹²Vüjuh kümphahtsa aveh, akhah kümphahtsari aveh thi atsuo kümphahtsari, avi küpe khuwa mari nüh VÜWA vü kütsüri hi nüh noh vü tsüveh.

¹³Mari zhih vünüh athsohvi küne khu mari nüh VÜWA vü viküru aveh noh zhi sanaveh; thi noh tharuo vü thari nüh mütseveh ünüh jümari thuoüji tsa kheh naveh.

¹⁴Israel vü zanyo athuo sanü VÜWA vü kütsü aveh noh zhi sanaveh.

¹⁵Ma mpa nüh nyiri saluo nyutü samwa saluo viru VÜWA vü kütsü aveh noh zhi sanaveh; thitü nyiri küwuo khuwa thi samwa kütsa khu mükümtseri thuoüji noh nüh kürhehsa sanaveh.

¹⁶Asa küsü khruo kümri mürhehsaji mükümhieri noh nüh küüte vünüh kümtsezheh amewa vünüh rakasa kürüveh münga nüh rhehsanaveh.

¹⁷Thitü mieshüzah saluo, nyutü nyihzhüzah saluo nyutü nyihsüzah saluo jümari nü müthaküm kenüh kürhehsawa nyu. Ma zühri thuoüji kükhurüpe rügivü kajake naveh, thi jümara küthü thuoüji kütso kükhurü sanü VÜWA vü arheküüngu mütsuo satsü naveh;

¹⁸thitü jümara sa, akhu noküja küsa thi athüchi azhie wuovü thuoüji noh zhi sanaveh.

¹⁹“Israel nyiri nüh kümtse kükhurü aveh Israel nyiri nüh VÜWA vü kütsüri hi nüh noh vü, noh tsa nyimpari vü thi noh tsa nyimzari vü mükükhaphrü wuleh sanü tsüveh. Hamatü noh kenüh thi noh siekütse küshukürari kenüh VÜWA tüvü küsuokürho kütsathuora amütsü küsü wiethuoh,” ti küza.

²⁰Jüsevü nga VÜWA nüh Aron vü, “Noh tü mari zhihvü azhezhuh küviwa nyu, thi mari azavü noh suope zanyo küsü nga küpehwa nyu, hi tü Israel nyiri azavü noh suope thi noh zhehzhuh wie thuoh.

²¹ “Thi Levira kuoh thuoüji mari nüh küsezhuh juhthsüzheh lovü küüroh küsa kenüh mari ke Israel vü küüsuo türake sanü küsü viküru aveh vi mari zhi sa üti tsümthuoh.

²²Israel nyiri tü kükhiemuo vü taji thama küüsü kenüh nosü vünüh tuvü küsezhuh juhthsüzheh shehnyi mükürura.

²³Thitü Levi jünüri nüh küsezhuh juhthsüzheh küüroh sanaveh, thi mari nüh Israel nyiri müküleh küsa vütü nü hamatü nohri wuhle küju mükükhaphrüle wuleh küsü sanaveh; thi mari tü Israel nyiri azavü thuoüji ma suope zanyo küsü nga küpehwa nyu.

²⁴Israel nyiri nüh VÜWA vü kükhurü sa nta mari azhi türake vü küsü küthsewa vi Levira zhi sa üti tsümthuoh; jükenüh mari thuoüji Israel nyira zavü mari zhi küsara zanyo küsü nga müsarathuoh ti hi nüh küzamthuoh,” ti küza.

²⁵Jüsevü nga VÜWA nüh Mosa vü,

²⁶“Jüma nyiehvü nga noh tü Leviri vü küza luo, Israel nyiri nüh türake vü küsü küthsewa nohri vi üti kütsüwa türake sanü küsü vi VÜWA khurü naveh.

²⁷Nohri nüh kükhurü kütsü hamatü atha ahie kürüthe thi akhah kürüthe kümjie vünüh chieke naveh.

²⁸Jükenüh noh nüh Israel nyiri vünüh küngura kümjie noh nga noh kükhurüwa türake vü küsü thse naveh, thi jüla nüh vi VÜWA vü kükhurü sanü Aron navüwa vü kütsü sanaveh.

²⁹Nohri vü kütsü aveh zhie nüh kümphahtsawa, thi kümtse tsawa vi nü VÜWA kükhurü sanaveh.

³⁰Jükenüh nohri nüh mari vü, nohri nüh kümphahtsari vi taji tsüm thuoüji küürohtsari nüh vi kükhurü kümnyieri saküm kümjie küpari thuoüji Leviri vü chiekem luo;

³¹thi noh nga thi noh zhehlori nga azhie muomuo vünüh tsaketünga azhümnyie.

³²Nohri nüh kümhietsari vi khurü kümthuoh kenüh nohri tü jüma tsa wie ketünga kükhiemuowa nyu. Thitü nohri müsü nüh sana küsa kenüh Israel nyira zanyo kümtseri saküümnevüh nyu,” ti küza.