Read Pochuri Naga NYITOKÜCHIE 19 Bible Online

NYITOKÜCHIE 19 - Pochuri Naga bible

NYITOKÜCHIE 19

¹Jüsevü nga VÜWA nüh Mosa thi Aron vü,

²“VÜWA nüh azhükütsü khonyo müzhe na küsa hama: Israel nyiri tü mieshü arühla kümsü azhührhümüküpe athsohkhuonyi müjie küükeke kümru viru üti küza luo.

³Thi jüma vi Eleazar navüwa tsü nü kürünape alievü kuwa taji ma tüvü nüh fethe naveh;

⁴thi Eleazar navüwa nüh amieshü züh jümawa lovü ma tüjü thsete nü küsezhuh juhthsüzheh tsatü vü türü keri kajake naveh.

⁵Jüti sanü amieshü jüma tü ajü ma notha vünüh tso naveh;

⁶thi navüwa nüh müsethsoh, ahesa, athsü kümruphieke ti vi nü mieshü tsoküsawa zhila vü jake taji tso naveh.

⁷Jüti sanü navüwa tü ajuh nüh ma satsa küzüm thi ma thsümnyi rüshüm ti küsa sevü nüh kürünape vü tu naveh, thi ma tü münüleh küju mükümtse vünüh peh naveh.

⁸Thawa nüh amieshüwa tso nüh jüma tü ma thsümnyi rüshüm thi juhküzüm ti sanaveh, thi ma nga münüleh küju mükümtse vünüh pehm naveh.

⁹ Jüti sanü thawa nüh mütse veh ünüh jüma nüh mieshü tsokümwa wejiri viwa kürünape alievü azhie kümtse vü sazhuh naveh; thi jümari Israel nyiri müzawa kenüh ajuh mükümtseri saküümtse thi kükhiemuo viküja kenüh ti vi naveh.

¹⁰Thi thawa nüh awejiri chizhuh veh ünüh anyi jüma thuoüji ma thsümnyi rüshüm nü münüleh küju mükümtse vünüh peh naveh. Hamatü Israel nyiri kenüh nga thi priru mari azavü kürhori kenüh nga mükükhaphrü wuleh küsü sanaveh.

¹¹“Thawa nüh ma mpa akümo küsüküsü nga saluo pa naveh ünüh rülo türü mükümtse vünüh pehm naveh;

¹²thi rülo kücheawa thi türüawa ma mpa nüh ajuh vünüh sakümtse nü mütse naveh; thitü ma nüh rülo kücheawa thi türüawa ma mpa nüh ma samkümtse thuoüji ma tü mümtserathuoh.

¹³Thawa nüh akümo, ma mpa nüh küsüküsü nga satü pa thi ma mpa ma samükümtse nüh sam ti thuoüji VÜWA kükhurüzhehwa sakümneveh, thi anyi jüma thuoüji Israelri azhievü nüh ma zhejam naveh, küpakenühnyunü ma saküümtsewa juh ma vü müküzüke kenüh mükümtsewa tü ma vü peh huom, jükenüh ma tü mümtsera.

¹⁴“Thi hamatü juhthsüzheh vünüh sükümri kenüh khonyo kütsü: thathari nüh juhthsüzheh lovü turu naveh ünüh, thi thari nüh juhthsüzheh lovü peh naveh ünüh rülo türü mükümtse vünüh pehm naveh.

¹⁵Aküfü küsüküsü nga müküsoteri thuoüji mümtsethuoh.

¹⁶Thari nüh alievü nüh anyuchuwa nüh rehthe küm, nyutü akümo, nyutü nyiri arü, nyutü arüku pa naveh ünüh rülo türü mükümtse vünüh pehm naveh.

¹⁷Thi mükümtsewa kenüh mari tü kükhiemuo kenüh kükhurü kütso weji pike thi ajuh liküveh ti aküfü küsü lovü thse naveh;

¹⁸Jüti sanü mütse küvehri küsü nüh ahesa vi taji aküfü jüma lovü teke nü juhthsüzhehwa vü, atsokrü juhthsüzhehwa lovü kütüri vü, anyiri jüma lovü tüküvehri vü, küsüra rü pakümwa vü, zothe kümwa vü, aküsüwa vü thi arüku pa kümwa vü ti kütheke naveh;

¹⁹thi rülo kücheawa thi türüawa ti anyi kümtsewa nüh mükümtsewa vü küthejake naveh; jükümjie vünüh rülo türüawa ma nüh ma sakümtse naveh, thi ma tü ma thsümnyi rüshüm thi juhküzüm naveh, jüti sanü münüleh vü thuoüji ma tü mütsem nathuoh.

²⁰“Thitü anyi mükümtsewa tü ma mpa nüh ma samkümtse thuoüji kümhuwa azavü nüh ma tü zhezhujam naveh, küpakenühnyunü ma nüh VÜWA kümtsezhehwa sakümne kümthuoh kenüh, ma nüh saküümtse juhwa ma vü müküzüke kenüh ma tü mümtsethuoh.

²¹Thi jüma tü makeri’a nüh mükükhaphrü zhühkhe küsü. Thawa nüh mükümtsewa vü ajuh kajake nüh anyi jüma tü ma thsümnyi rüshüm naveh; thi thawa nüh mükümtsewa kenüh ajuh pa naveh ünüh ma tü münüleh küju mükümtse vünüh pehm naveh.

²²Zanyo küsüküsü nga saluo anyi mükümtsewa nüh pakümri aveh thuoüji mümtse nüh sam wie nathuoh; thi anyi küsüküsü nga mükümtse zanyo jümari pam thuoüji ma tü münüleh küju mükümtse vü pehm nathuoh,” ti küza.