Read Pochuri Naga NYITOKÜCHIE 21 Bible Online

NYITOKÜCHIE 21 - Pochuri Naga bible

NYITOKÜCHIE 21

¹ Thinü Kananri Negeb vü kürhowa Arad kajiwa tü Israelri Atharim lehkhuji wuovü nüh tseta küsa künara nü mari sie saluo taji mari wuori retewa.

²Jüti küsa vü Israelri tü küüshie küsü VÜWA vü küshie taji, “Mükütüküzü noh nüh anyi hamari hiri ke vü thse tsa nta thuoüji hiri nüh mari nyujiri zorie kheh tsü naveh,” ti khuo.

³Jüti kükhuo vü VÜWA tü Israelra kükhuo küna tü nü Kananri vi mari tsü taji mari tü anyujiri zorie khehm tü; jükenüh azhie jüma nyo tü Ebri vünüh Horma, küzorie, ti ji tsü.

⁴ Jüti sanü mari tü Hor küzhi wuovü nüh Kümru Juhküji vü tsekewa, thi Edom zhih vü mürhüwa; thitü mari tü lehkhuji vü müküüzhikera sanü wa.

⁵ Thi mari nüh Saküüwuowa thi Mosa vü phra taji, “Shünyiza vünüh hiri küüsü nti mokenüh nohsü tü Egypt vünüh hiri siezhuru lo? küpakenühnyunü hatü ashie nüh münyie thi ajuh lota münyie, thi hiri tü ashie kümsü hama mütsangüthuoh,” ti küza.

⁶Thinü VÜWA nüh arehsü kükrükhre anyiri azavü küze nü nyiri küümko, jüti sanü Israel nyiri tü hozake süm.

⁷Jüti küsa vü anyiri tü Mosa vü ru nü ma vü, “Hiri tü khiemuomthuoh, hiri nüh VÜWA nohsü phra küümsü samthuoh; tinü VÜWA vü kükhuo sanü ma nüh hiri vünüh arehsü viküüjam luo,” ti küza. Thinü Mosa nüh anyiri kenüh kükhuo sa.

⁸Jüti kükhuo vü VÜWA nüh Mosa vü, “Arehsü kükrükhre küsü sanü atovüh küsü khake taji jüma rügivü ha saluo; thi arehsü nüh müko kümri tü jüma no thuoüji rhora naveh ünüh,” ti küza.

⁹Jüti küüza vü Mosa nüh sahwuo rehsü küsü sanü tovüh rügivü ha sa, thi mükütüküzü arehsü nüh anyi wuori mükom thuoüji ma tü sahwuo rehsüwa no nü rhorarati sa.

¹⁰Jüti küsa sevü Israel nyiri tü tsezhuwa nü Oboth vü kürünape sataji peh.

¹¹Thi Oboth vünüh tsezhu le nü Moab küwiejie reza vü rünyi küshupe wuovü Iye-abarim vü kürünape sanü peh.

¹²Jüla nüh mari tü tsezhu le nü Zered nyuo vü kürünape sataji peh le.

¹³Thi jüla nüh mari tü tsezhu le nü Arnon wuochuwuovü kürünape sanü peh le hü, jüma tü Amorra rüshu vü; küpakenühnyunü Arnon tü Moab arüh, Moab thi Amorra azhievü.

¹⁴Jükenüh VÜWA Rie küsa zhühku kürhü Lasipha lovü küza küsa, “Waheb vü Sufa, thi Arnon nyuori,

¹⁵thi anyuo rütse küwa Ar ape küju, thi Moab arüh küju hurüke,” ta küza saveh.

¹⁶Jüla nüh mari tü mümnyie wiethuo nüh Ber, mazhünyo Juhkhre, ti küsa vü wa, juhkhre jüma tü VÜWA nüh Mosa vü, “Nyiri saküsezhuh luo, hi nüh mari vü ajuh tsü naveh ünüh” ta küüzapewa.

¹⁷Jüti küsa vü Israel nyiri nüh azah hama reihi: “Juwi shu luo, O juhkhre! jümawa vü Riehi luo.

¹⁸Kajitsari nüh küchühwa juhkhre, zanyoküthsü nyiri nüh küchüh, kajikütsüh thi mari rühkütsüh nüh küchüh,” ti reihi. Jüti sanü mari tü reza vünüh Matana vü tewa,

¹⁹Matana vünüh Nahaliel vü tewa, thi Nahaliel vünüh Bamot vü tewa,

²⁰Bamot vünüh anyuo Moab asuo Pisga küzhiho vünüh küpohu noküütsuo wuovü müritewa.

²¹Jüti küsa vü Israel nyiri nüh Amorri Kajiwa Sihon vü zhühle küze nü,

²²“Hi tü noh zhih vünüh vehthuo küüze jie; hiri tü aleh tsekari nü azhuh vü nyutü rhelivizhuh vü küwawa nyu lie, juhkhre küsü vü nga nüh juhküzhuwa nyu, noh zhihwa müjie tsekükari küju nü Kajiwa Rieji mpa müzhewa wie na nü,” ti küza küze.

²³Thitü Sihon tü Israelri ma zhih tsekari küüze khe. Jüti sanü ma tü ma nyiri aveh jizhuh taji Israelri sie saluo nti reza vü wa nü Jahaz vü ru, thi Israelri sie saluo.

²⁴Thi Israel nüh anyuchuwa aha nüh ma rehthem nü ma zanyo Arnon vünüh Jabbok, thi Amonri küju vitewa; küpakenühnyunü Jazer tü Amonra rüh, thi jüma tü müzho küm kenüh.

²⁵Jüti sanü Israel nüh anyuji hamari aveh vitewa nü Amor nyujiri, Heshbon vü thi ma nyuperi aveh vü pehtewa.

²⁶Küpakenühnyunü Heshbon tü Amorri kajiwa Sihon nyuji, ma tü khana küsükeri Moab kajiwa sie saluo nü ma ke vünüh ma zhih aveh Arnon küju vite küwawa.

²⁷Jükenüh rieketsü kürieri nüh küüza, “Heshbon vü raluo, jüma saluo, Sihon nyujiwa tü sazhu luo.

²⁸Küpakenühnyunü anyih tü Heshbon vünüh shuküwathuoh kenüh, anyihzhu Sihon nyuji vünüh, Moabwa Ar zoriem, Arnon avü kümsieri.

²⁹Jie saranathuoh, O Moab! Noh tü müsarathuoh, O Khemosh nyiri! Ma nüh ma tsa nyimpari tü khonyo vünüh teküwari küüsamthuoh, thi ma tsavühri tü nyura küsi küüsamthuoh. Amorri kajiwa Sihon vü tsümthuoh.

³⁰Jükenüh mari küshukürari tü Heshbon vünüh, thi Dibon küju kümiemthuoh, thi anyih nüh Medeba müjie küju nü hiri nüh ja nü kümsümthuoh,” ta küza.

³¹Hakümjie vünüh Israel tü Amorra zhih vü rhora.

³²Thi Mosa nüh Jazer zi üti anyi küze; jüti sanü mari anyu vira, thi Amorri jüla küpehri zhejam.

³³Jüsevü Israelri tü küzüle nü Bashan lehkhuji wuovü nüh tekhru; thi Og kajiwa Bashan tü ma thi ma nyiri aveh sie nü Edrei vünüh arie sa nti ru.

³⁴Thitü VÜWA nüh Mosa vü, “Ma mükrü tümluo; küpakenühnyunü hi nüh ma thi ma nyiri aveh thi ma zhih ti vi noh ke vü thse kümthuoh kenüh; thi noh nüh Heshbon vü küpehwa, Amorri kajiwa Sihon vü sakütsü kümjie ma vü nga satsü naveh,” ti küza.

³⁵Jüti sanü mari nüh ma, ma tsa nyimpari, thi nyiri aveh, thi nyi küsü nga mükükhe wiethuoh nüh aveh zothem; jüti sanü mari tü ma zhih vitera.