Read Pochuri Naga NYITOKÜCHIE 23 Bible Online

NYITOKÜCHIE 23 - Pochuri Naga bible

NYITOKÜCHIE 23

¹Jüti küsa vü Balaam nüh Balak vü, “Eh kenüh hala kükhurüpe türü satüluo, jüti sanü shüvotsazah türü thi nyihzhüvo türü hi tsüluo,” ti küza.

²Balak tü Balaam nüh küüza zhü küna; thi Balak thi Balaam masü tü kükhurüpe küsü rügivü shüvotsa thi nyihzhüvo küsüsü kükhurü sa.

³Thinü Balaam nüh Balak vü, “Noh nüh tso nü kükhurü nahtovü tsie luo, Jüti sanü hi nüh VÜWA nüh ru hi siemtu na ünü nyu nüh wa no naveh; thi ma nüh momowa hi kütsanaveh ünüh hi nüh noh vü küza naveh ünüh,” ti küza. Jüti sanü ma tü kümsie kümtse küsü vü tewa.

⁴Thinü Saküüwuowa tü Balaam mütu, thi Balaam nüh ma vü, “Hi nüh kükhurüpe türü küche nü jümari küsüsürügivü shüvotsazah thi nyihzhüvo küsüsü khurü savehthuoh,” ti küza.

⁵Jüti küüza vü VÜWA nüh Balaam po lovü azhü küsü thsetsü nü ma vü, “Shele Balak vü tewaluo, thi hakümjie küza luo,” ti küza.

⁶Jüti sanü ma tü shele ma vü teru, thinü halie, Balak thi Moab kajiri tü ma nüh kütso kükhurüpe nato vü tsiepehla.

⁷Jüti küsa vü Balaam tü ma zhüwa phra taji, “Hi tü Aram Balak vünüh sieru, zhieshu küzhiri Moab kajiwa vünüh: ‘Ra nü eh kenüh Jacob müzü luo, thi ra nü Israel phrakümsüm üta!’

⁸Saküüwuowa nüh mükümzüri khiela nüh hi nüh müzü na lo? Saküüwuowa nüh phramküümsüri khiela nüh hi nüh phramsü na lo?

⁹küpakenühnyunü hi nüh aküzhiri rügivü nüh ma küngu kenüh, Ahori vünüh hi nüh ma no; Thinü halie, mari mpa anyu sanü küpehri, anyi kürhori azavü mari tü müchieke!

¹⁰Jacob zhitho thawa nüh chie khehra na lo, nyutü thawa nüh Israelri küüsuo müzü sanü küsü kürüh khera na lo? Künyitsara küsü vünüh hi tü ra küüsüm luo thi künyitsara sehkhe küsa kümjie raküüsaluo,” ti phrahte.

¹¹Jüti küphrahte vü Balak nüh Balaam vü, “Noh tü hi vü mowa samthuoh lo? Noh tü eh mükünongüri müzümtü üti noh sieru, tü halie, noh tü zanyoküsü nga müsatü nü tsia mari tsüveh nü,” ti küza.

¹²Jüti küüzavü ma nüh, “VÜWA nüh eh po lovü mowa thsetsü nüh kümhie ta jüma müküza tsü tü le naveh ülo?” ti rületsü.

¹³Jüsevü nga Balak nüh ma vü, Azhie küpavü eh se nyira le luo, jüla nüh noh tü mari ngura naveh ünüh; noh tü mari küshehnyitsari mpa ngura naveh, avehveh thuoüji küngurawa nyu; tinü jüla nüh mari eh kenüh müzümtüluo, ti khuo.

¹⁴Jüti sanü Balak tü Balaam sie nü Pisga rügi Zofim azhuh vü tewa, jüla nüh Balak tü kükhurüpe türü sanü shüvotsazah küsüsü thi nyihzhüvo küsüsü tivinü khurü.

¹⁵Thinü Balaam nüh Balak vü, “Hi nüh tula wa nü VÜWA siemtu küveh vü noh thuoüji nü noh kükhurüpe kütuoh hala tsiela luo,” ti küza.

¹⁶Jüti küsa vü VÜWA nüh Balaam siemtu nü ma po lovü azhü küsü thsetü taji, “Balak vü shele waluo, thi ma vü hakümjie küza luo,” ti küza.

¹⁷Jüti küüza vü Balaam tü ma vü ru ünü, halie, ma tü Moab kajiri ma sie nü ma nüh kütso kükhurüpe kütuoh vü tsie la. Thinü Balak nüh ma vü, VÜWA nüh mowa küza lo? ti küna.

¹⁸Jüti küüna vü Balaam tü ma zhü phra taji, Sühraluo, Balak, thi künaluo; eh zhü künaluo, O Zipor atsa:

¹⁹Saküüwuowa tü anyiri nyu, jüti sanü aküriewa nyu, nyutü anyira tsa nyu, thi kükhaphrüwa nyu. Ma nüh küza taji, jüma ma nüh müsa tüm naveh ülo? Nyutü ma nüh phrahteke sanü, ma tü jüma müsaju tüm naveh ülo?

²⁰Halie, tsiatsü na küsa azhükütsü hi tü vi saveh: ma nüh tsiatsümthuoh, thi hi tü jüma mükhaphrü lera.

²¹Ma tü Jacob vünüh amngukümsü küsü nga müngu; nyutü Israel vü küsüro müngu. VÜWA mari Saküüwuowa tü mari sietse, thi kaji küsü küzie tü mari zhievü tse.

²²Saküüwuowa nüh Egypt vünüh mari siezhu; sühprivo rütsü kümjie mari tü peh.

²³Jacob vü lahzhu küsü nga münyie luo, Israel vü kütüma müke küsü nga münyie luo, khinyi thuoüji jüma tü Jacob thi Israel vü, ‘Saküüwuowa nüh mowa sa lo!’

²⁴Halie, anyiri riehkhuo küsü! Amiewuovühwa kümjie sühra tsethuoh thi amiewuo nyimpawa kümjie ma mpa küshoh tsethuoh: ma shiewa müjie küshohrie küju nü ma tü müzeh, thi mükothe küsawa züh müjie küzhu küju nü, ti küza.

²⁵Jüti küüzavü Balak nüh Balaam vü, “Mari kümzü küsü nga müsa, thi tsia kütsü küsü nga müsanü,” ti phrahte.

²⁶Thitü Balaam nüh Balak vü, “VÜWA nüh küüza aveh hi tü müsaji mümhie ti küsa hi nüh noh vü müküza ülo?” ti rületsü.

²⁷Thitü Balak nüh shele Balaam vü, “Ra, hi nüh noh sie shele azhie küpa vü wa ünüh; eh kümshe vü Saküüwuowa tü jüla nüh eh kenüh mari müzü naveh tünüh,” ti küza le.

²⁸Jüti sanü Balak nüh Balaam sie nü küpohu, Jeshimon küüprü wuovü Peor rügi vü tewa.

²⁹Thinü Balaam nüh Balak vü, “Eh kenüh hala kükhurüpe türü sanü eh kenüh shüvotsazah türü thi nyihzhüvo türü ti küchetsüluo,” ti küza.

³⁰Jüti küüza vü Balak tü Balaam nüh küüza müzhe nü kükhurüpe küsü vü shüvotsazah küsüsü thi nyihzhüvo küsüsü ti kükhurü sa.