Read Pochuri Naga NYITOKÜCHIE 24 Bible Online

NYITOKÜCHIE 24 - Pochuri Naga bible

NYITOKÜCHIE 24

¹Thinü Balaam tü Saküüwuowa nüh tsia Israelri kütsüra loküzhe pehvehthuoh ta küsa thsü, jükenüh ma tü atükhuvü kümjie lahzhu küno vü amüwa nüh reza wuovü küprüke.

²Balaam tü ma notha toke nü noküze ünü Israelri tü akuohkuoh vünüh kürünape sataji pehküveh ngu. Jüti küsa vü Saküüwuowa Sietse tü ma rügivü turu.

³Jüti küsa vü Balaam nüh setsazhü phra taji. Beor atsa Balaam setsazhü, Setsazhü anyiwa wa notha tü kümhie ta koveh,

⁴Saküüwuowa zhü küünarawa setsazhü, Ma nüh kükhratsawa kümohtsa ngu, ma tü tsuotsa turu, thitü ma notha thuoüji müsate:

⁵Noh juhthsüzhehri tü küzakele nga zülo, O Jacob, noh kürünaperi tü küzakele nga zü lo, O Israel!

⁶Anyuo shohcha küwa kümjie, arühgu küsü nato vü aphari kümjie, VÜWA nüh mürüthsoh shieküsa kümjie; ajuh nato vü müsethsohri kümjie.

⁷Ma juhku lovü nüh ajuh lizhuru naveh, thi ma tsü tü ajuh hozake vü peh naveh, ma kajiwa tü Agag nyiehvü nüh müsie naveh, thi ma kajipe tü sakümsietsü naveh.

⁸Saküüwuowa nüh Egypt vünüh ma vizhuru, ma tü asühpri rütsü kümjie peh, ma nüh ma mükünongü nyiri tsamzhum naveh, ma nüh mari arüri zokhuorie tsü naveh, thi ma shüchu nüh müzhukükhari tsü naveh.

⁹ Ma tü zehtewa, amiewuo nyimpawa kümjie ma tü hieke tewa, thi amiewuo nyimzawa kümjie; thawa nüh ma saküsühra na lo? Tsia nü noh kütsüri nyi küsüsü nga kümngari küsaluo, thi noh kümzüri nyi küsüsü nga kümzüwa saluo, ti küza.

¹⁰Thinü Balak tü Balaam vü khieloti arüshu nü ma mpa ma ke fe taji Balaam vü, “Eh mükünongüri küümzü nti küsa kenüh hi nüh noh ji, thitü halie, noh nüh küchekeri tsia mari tsümthuoh.

¹¹Jükenüh hi nüh noh vü küzaveh, tinü shita noh mpa noh zhievü tehu luo, hi nüh noh siake tsa nti sa, thitü noh küüsiake na küsa VÜWA nüh khetemtüthuoh ünüh,” ti küza.

¹²Jüti küüzavü Balaam nüh Balak vü, noh nüh noh zhühleri hi vü küüzeri vü hi nüh müküza ülo,

¹³‘Ma mpa nüh rakasa thi suna ma zheh küpro vi hi tsü wie ketünga hi thuoüji VÜWA zhü kari nü müwara, kümhie nga satü kümsü nga satü eh kümshe müsara; VÜWA nüh mowa küza naveh ünüh hi thuoüji jüma küza naveh,’ ti müküza ülo?

¹⁴Thi khinyi thuoüji halie, hi tü eh nyiri vü shele tewa nathuoh; tinü raluo, thuotüvü Israel nyiri nüh noh nyiri vü mowa sanaveh ünüh hi nüh noh küthsütsü naveh ünüh, ti küza.

¹⁵Jüti küza nü Balaam tü setsazhü phra taji: “Beor atsa Balaam setsazhü, Setsazhü anyiwa notha tü kümhieta koveh,

¹⁶Saküüwuowa zhü küünawa setsazhü, thi Kümsie Tsawa zanyoküthsü thsü, ma nüh Kükhratsawa kümohtsa ngu, ma tü tsuotsa turu, thitü ma notha thuoüji müsate:

¹⁷Hi nüh ma ngu naveh, thitü khinyi nyu; hi nüh ma no naveh, thitü shehnyi müveh: Jacob vünüh wuhtsi küsü shuru naveh, thi Israel vünüh kajiri küsü shuru naveh, jüma nüh Moab adie nyikhuoja tsü naveh, thi Sheth atsari aveh zoriejam naveh.

¹⁸Edom tü mükünongüra zhi samnathuoh, Seir nga mükünongüri nüh vitewa nathuoh, Israel thuoüji khra sheh wa wie naveh.

¹⁹Jacob vünüh takrü küsa küsü shu naveh, thi anyujiwa vü kürhorari zoriejam naveh,” ti küza.

²⁰Jüsevü ma tü Amalek no nü ma setsazhü phrahte taji, Amalek tü akuoküji küpari aveh zhie nüh apokhuwa, thitü sehkhe vü thuoüji küzorie vü tewa nathuoh, ti küza.

²¹Jümasevü nga ma nüh Kenri no nü ma setsazhü phrahte lehü taji, Noh kürhope thuoüji müzho shehveh, thi noh phra tü alokrü rügivü sake saveh;

²²Jüta wie ketünga Kain tü zoriem nathuoh; Ashur nüh noh re nü aküsi sam nathuoh.

²³Jüti küüza sevü nga ma setsazhü phrahte le taji, “Eh zah, Saküüwuowa nüh hama küsa vü thawa nü rhora nathuoh lo?

²⁴Ajuhieri tü Kitim vünüh ru nü Ashur thi Eber sakümnomna naveh; thi ma nga küzorie vü teru wie naveh,” ti küza.

²⁵Jüti küzam nü Balaam tü sühra taji ma zhie vü tewa; thi Balak nga ma mpa ma leh vü tewa.