Read Pochuri Naga NYITOKÜCHIE 25 Bible Online

NYITOKÜCHIE 25 - Pochuri Naga bible

NYITOKÜCHIE 25

¹Israel nyiri tü Shitim vü küpeh tsotho vü Moab tsavühri vü muomuo rhotewa.

²Hakümjie küsa vü nüh Israel nyiri tü Moabra kükhurüvühri vü küsahthuo sa, thi mari tü mari vü nyitsazhu nü mari kükhurüvühri vü küngietsuo khurü.

³Jüti sanü Israel tü Baal Peor sie küsü satewa. Thi VÜWA tü khieloti Israel vü arüshu tewa;

⁴thinü VÜWA nüh Mosa vü, “Israel anyi levüri aveh siekheh nü VÜWA tüvü nüh rünyi kükuo vü huthuo luo, jüüta küüsa vünüh VÜWA rükhielota shuküvehwa tü Israelri vünüh kürele tewa naveh ünüh,” ti küza.

⁵Jüti küüza vü Mosa nüh Israelra lesari vü, “Nohri aveh nga, nohri nyi thathari nüh Peor vü Baal sie küsü samthuoh ünüh zothe khehm luo,” ti küza.

⁶Israelri tü küsezhuh juhthsüzheh lehpie vünüh krie pehveh ünü halie, Israel nyiri küsü tü Midiavühri küsü ma tharuo vü, Mosa tüvü thi Israel nyiri müzawa tüvü sieru.

⁷Jüti küsa vü Eleazar atsa Finehas, Aron navüwa atsanüh jüma ngu taji ma tü sühra nü ma ke vü avi küjehke,

⁸thi juhthsüzheh lovü masü ase vü nyitu nü Israelwa nga thi nyimzawa nga ti masü khürü shüthejam. Jüti küsa vü nüh asahnawa tü Israelri vünüh khetera.

⁹Jüta wie ketünga asahna vünüh anyi anyie mükeke nü müzü süm,

¹⁰Thinü VÜWA nüh Mosa vü,

¹¹“Aron navüwa atsa Eleazar atsa Finehas nüh Israel nyiri vünüh eh rüküshuwa viküüshelemthuoh, jüla ma nüh eh luoveh noküsawa vi nü mari azavü luoveh satsüthuoh, jüta küsa vü nüh eh luoveh noküsawa vi nü Israel nyiri müpokah tünüh samtü.

¹²Jükenüh, halie, küza luo, hi nüh kütsathuo zahzhükükawa ma vü tsüveh;

¹³thi jüma tü ma vü thi ma sevü kütse ma küshukürari vü tsüveh, kütsathuozhü mükükhaphrü navü küsa, küpakenühnyunü ma nüh ma Saküüwuowa no nü luoveh küsa kenüh, thi ma nüh Israel nyiri kenüh kütsathuo sakütsü kenüh,” ti küza.

¹⁴Thi Midiavühwa sie zothe küm Israelwa nyo tü Zimri, Salu atsa, Simeon kuoh vü alüwa tharuo.

¹⁵Thi Israelwa sie zotheküm Midiavühwa nyo thuoüji Kozbi, Zur atsavühwa, ma pa tü Midia apari alüwa.

¹⁶Jüti küsa vü VÜWA nüh Mosa vü,

¹⁷“Midiari sakümnomna nü mari zoriem luo;

¹⁸küpakenühnyunü mari nüh mari aro vi nohri saküümnomna kenüh, Peor kenüh thi Kozbi, Midia kajivühwa, mari tsehvüwa, Peor kenüh asahna pehküveh rülo vü küzothevühwa aro kenüh nohri saküümnomna,” ti küza.