Read Pochuri Naga NYITOKÜCHIE 28 Bible Online

NYITOKÜCHIE 28 - Pochuri Naga bible

NYITOKÜCHIE 28

¹Jüma sevü VÜWA nüh Mosa vü,

²“Israel nyiri vü azhütsü nü mari vü, ‘Eh kükhurü, eh shie anyih vünüh hi vü kükhurü, eh külo küüngu nohri azhüazhü nü atsothovü kheti hi vü kükhurü saluo,’ ti küza.

³Thi noh nüh mari vü, Hamatü anyih vünüh kükhurü, jüma tü VÜWA vü kükhurü sanaveh: mükütuo wiethuoh nüh rülorülo nyihzhüzah mahvi küsü kükhruo künyi azhührhü müküpevi khurü naveh.

⁴Nyihzhü küsü thuoüji arüne vü thi küpawa thuoüji münüleh vü ti vi khurü naveh;

⁵Jüsevü nga ahie nüh vi kükhurü ahie küüto küsü Olive vüjuh kete küsü küünyarü vi khurü luo.

⁶Hamatü mükütuo wiethuoh nüh kütso kükhurü sanaveh, jüma tü küüngu VÜWA vü anyih vünüh kükhurü sanaveh ti Sinai Küzhi vünüh azhühkho satsüthuoh.

⁷Aküzhu kükhurü nyihzhü küsü vü kete küsüsü thse nü khurü naveh; kümtse azhie vü aküzhu kümzo VÜWA tüvü küshoke naveh.

⁸Nyihzhüzah küpawa münüleh vü khurü naveh, thi münüleh vü kükhurüwa nga arüne vü vi kükhurü kümjie zanyo aveh zarike kheh wie naveh.

⁹“Kümnyirülo vü thuoüji nyihzhüzahvo mahvi küsü kükhruo azhührhü müküpe künyi, atha vi nü kükhurü kümjie vünüh ahie küüto künyi vüjuh küünyarü thi aküzhu ti vi kükhurü sanaveh:

¹⁰hamatü rülo küpa vü mükütuo nüh kütso kükhurü thi aküzhu vi kükhurü mükünyu kümnyirülo kürüzhu kükhurü sanaveh.

¹¹“Nohri asa rülo pokhuwa kürüzhu VÜWA vü kütso kükhurü tsü naveh: mieshüvo zah künyi, nyihzhüvo küsü, nyihzhüvo zah türü mahvi küsü kükhruo azhührhü müküpe,

¹²jüsevü nga mieshüvo zah küsü vü atha kükhurü kümjie vünüh ahie küüto küche vüjuh küünyarü, thi nyihzhüvo küsü vü ahie küüto künyi vüjuh küünyarü;

¹³thi ahie vi kükhurü kenüh nyihzhüzah küsüsü vü ahie küüto küsü vü vüjuh küünyarü küüngu kükhurü sanü anyih nüh tso nü VÜWA mükhurü üji mümhie.

¹⁴Mari nüh küzhu kükhurü kenüh shüvotsazah küsü vü akhah kete küzhila, thi nyihzhüvo küsü kenüh akha kete küsü vü küüsuo küche sanü küsü, thi nyihzhüzah küsü vü akhah kete küsü vü küüsuo müzü sanü küsü, ti nüh vi sanaveh; hamatü mahvi ajü kenüh asa kürüzhu kütso kükhurü kenüh wiethuoh.

¹⁵Jüsevü nga kükhiemuo kükhurü kenüh nyihsüvo küsü; thi hamatü mükütuo nüh tso nü kükhurüwa thi aküzhu kükhurüwa masü kütuoh vünüh khurü naveh.

¹⁶ “Asa pokhuwa rülo türa müzüawa vü thuoüji VÜWA tsekükari.

¹⁷ Thi hama sa rülo türa türüawa thuoüji akhu; rülo türü ahzhi müküthse lohse tsanaveh.

¹⁸Rülo pokhu rülo thuoüji kümtse küsezhu naveh: jüma rülo vü küüroh küsü nga küsawa nyu,

¹⁹thitü kükhurü sanü anyih vünüh kükhurü sanaveh, kütso kükhurü sanü VÜWA tsü naveh: shüvotsa zah künyi, nyihzhüzah vo küsü, nyihzhüzahvo mahvi küsü kükhruo türü; thi jümari tü azhührhü küpe müsara;

²⁰jüsevü nga jümari vi kükhurünyieh ahie vüjuh küünyarü; shüvotsa zah küsü vü ahie küüto kücheche, thi nyihzhüvo küsüsü vü thuoüji ahie küüto künyinyi;

²¹nyihzhüzah türüri küsüsü vü ahie küüto küsüsü;

²²jüsevü nga nohri kütsathuo kenüh kükhiemuo kükhurü vi küsa nyihsüvo küsü.

²³Nohri hamari kükhurü tü arüne kütso kükhurüwa kütuoh vünüh khurü naveh, thi kükhurü hamatü küütuowa nyu.

²⁴Hakümjie vünüh rülo türü rülorülo VÜWA vü küüngu anyih vünüh ashie kükhurü sanaveh; thi hamatü mükütuo nüh kütso kükhurüwa thi aküzhu kükhurüwa masü kütuoh vünüh sanaveh.

²⁵Rülo türüawa thuoüji kümtse küsezhu sanaveh, thi küüroh küsü nga küsawa nyu.

²⁶ “Thi avi küpe khuwa rülo vü zhie ri khu nohri nüh luoshü kürüthe mahwie küru ahie nüh kükhurü rülo vü nohri tü kümtse küsezhu peh naveh; thi hama rülo vü nga küüroh küsü nga küsawa nyu,

²⁷thitü VÜWA vü küüngu kükhurü sanaveh: shüvotsazah künyi, nyihzhüvo küsü, nyihzhüzah vo mahvi küsü kükhruo türü;

²⁸jüsevü nga ahie vüjuh küünyarü, shüvotsazah küsüsü vü ahie küüto küche, nyihzhüvo küsü vü ahie küüto künyi,

²⁹nyihzhüzah vo türüri küsüsü vü ahie küüto küsüsü,

³⁰nohri kütsathuo küüroh kenüh nyihsüvo küsü ti nüh vi mükhurü üji mümhie.

³¹Mükütuo nüh kütso kükhurü thi ahie vi kükhurü nyiehvü nga nüh jümari thi küzhu kükhurüti sanaveh. Jümari tü küsü nga azhührhü küpe küsawa nyu.