Read Pochuri Naga NYITOKÜCHIE 3 Bible Online

NYITOKÜCHIE 3 - Pochuri Naga bible

NYITOKÜCHIE 3

¹VÜWA nüh Mosa vü Sinai küzhi rügivü nüh küjüle tsotho vü Aron thi Mosa wuhleri.

² Aron tsa nyimpari nyo hamari: Nadab küwuo khuwa, thi Abihu, Eleazar, Ithamar;

³hamari tü Aron tsa nyimpara nyo, thseküm navüri, navüra nasa sa üta shiakümri.

⁴ Thitü Nadab thi Abehu masü thuoüji Sinai reza vünüh VÜWA tüvü mükümtse kükhurü küsa kenüh VÜWA tüvü nüh süm; thi masü tü atsa nga münyie. Jükenüh Eleazar thi Ithamar tü masü apa Aron kürho tsotho vünüh navü kütsü satewa.

⁵Jüti küsa vü VÜWA nüh Mosa vü,

⁶“Levira kuoh sieru nü Aron navüwa kütuoh vü saluo, jüti sanü mari tü Aron kütsü küüna luo.

⁷Mari nüh ma kenüh thi ashiejiwa aveh kenüh juhthsü kükhurüzheh vü, mari nüh juhthsü kükhurüzhehwa vü anasa küsa üta küüroh sakheh.

⁸Mari nüh juhthsü kükhurüzheh lovü tsokrüri aveh ashu sa, thi juhthsü kükhurüzheh lovü küüroh sanü Israel nyiri kenüh anasa sanaveh.

⁹Thi noh thi Levira kuoh vi nü Aron thi ma tsari vü tsü naveh.

¹⁰Jüti sanü Aron thi ma tsari küchieke sanü mari nüh navü küüroh vü peh naveh; thitü anyi küpari nü shenyiru thuoüji küüsüm naveh,” ti küza.

¹¹Jüsevü nga VÜWA nüh Mosa vü,

¹² halie, Israel atsa pokhuri müthoh vünüh hi nüh Israel nyiri azhievü nüh Levira kuoh vimthuoh. Jükenüh Levira kuoh tü eh zhi,

¹³küpakenühnyunü Egypt zhih vü hi nüh atsa küwuokhuri küfethe rülo vünüh mari tü eh zhi küsa kenüh, anyiri saluo samwa saluo atsa küngu khuwa thuoüji hi mpa eh zhi ti küsa vünüh sakümtse kümthuoh kenüh; mari tü eh zhi wiethuoh: Hi tü VÜWA ti küza.

¹⁴Sinai reza vünüh VÜWA nüh Mosa vü,

¹⁵“Levi atsa nyimpari apara zheto vünüh thi tharuo vünüh nyimpari asa küsü vünüh tuvü nyito kürüh luo,” ti küza.

¹⁶Thinü Mosa tü VÜWA zhü müzhe nü ma vü azhükütsü üta mari nyito kürüh.

¹⁷Hamari tü mari nyo vünüh Levi atsa nyimpari: Gershon thi Kohat thi Merari.

¹⁸Thi hamari thuoüji tharuo vünüh Gershon atsa nyimpari: Libni thi Shimei.

¹⁹Thi tharuo vünüh Kohat atsa nyimpari: Amram, Izhar, thi Uzziel.

²⁰Tharuo vünüh Merari atsa nyimpari: Mali thi Mushi. Hamari tü ma pari zheto vünüh mari tharuo.

²¹Gershonri tü Libniri thi Shimeira jünü; hamari tü Gershon anyira jünü.

²²Mari nyito küürüh thuoüji nyimpari asa küsü vünüh wiehvü küürüh aveh anyie türü nü müza münga.

²³Gershon nyiri thuoüji juhthsü kükhurüzheh tüku zhietu wuovü mari kürünape sa peh naveh,

²⁴Lael atsa Eliasaf nüh Gershon anyira pa tharuo vü alüwa sanaveh.

²⁵Thi Gershon tsara küüroh thuoüji juhthsü kükhurüzhehwa juhthsü kükhurüzheh ashu sanaveh, ma kühieteri, juhthsü kükhurüzhehwa lehpie küzietethsü,

²⁶anyula vü küzieteri, juhthsükü khurüzhehwa thi kükhurüpewa küzietethsü thi jüma kuliri thi hamari vü küüroh müsaji mükümhie aveh mari nüh no naveh.

²⁷Kohat jünüri thuoüji Amramri thi Izharri, Hebronri, Uzzielra jünüri, hamari tü Kohatra jünü.

²⁸Mari nyito küürüh thuoüji nyimpari asa küsü vünüh wiehvü küürüh aveh anyie tüze nü müza türo, mari nüh kümtsezhehwa küüroh no naveh.

²⁹Kohat jünüra tsa nyimpari tü juhthsü kükhurüzhehwa zhiese wuovü kürünape sa peh naveh,

³⁰Kohatri vü Uzziel atsa Elizafan nüh alü sa.

³¹Mari küüroh thuoüji kütsathuozhü küthseku, toküsapewa, alatiwa, kükhurüpewa, navüri nüh vi küüroh kümtsezheh lovü küpeh küfüküjuri, küzietethsüri; thi hamari vü momowa küüroh peh naveh ünüh jümari aveh ti no kheh naveh.

³²Thi Aron atsa Eleazar nüh Leviri sierhü vü levüwa sanaveh, ma nüh kümtsezhehwa künori nyiehvü künowa sanaveh.

³³Merari jünüri thuoüji Maliri thi Mushira jünüri: Hamari tü Merari jünüri.

³⁴Mari nyito küürüh thuoüji nyimpari asa küsü vünüh wiehvü küürüh aveh küsaji anyie türo nü müza künyi.

³⁵Thi Merari jünüra pa zheh alüwa thuoüji Abihail atsa Zuriel; mari nü juhthsü kükhurüzheh zhietü wuovü peh naveh.

³⁶Mari küüroh thuoüji juhthsü kükhurüzheh zieri, rüpethsohri, tohvühri, kütokeperi, jüma nyiehvü pehküveh müsajimkümhieri aveh;

³⁷jüsevü nga anyulavü tohvüh shiemkiele küsari, jümari kütokepe khujihri, küzetevühri, thi akuliri no naveh.

³⁸Thi Mosa, Aron thi ma tsari nüh juhthsü kükhurüzhehwa zhieshu wuovü küshülü juhthsüzhehwa rünyiküshu wuovü mari kürünape sanaveh, jüti sanü mari nüh kümtsezhehwa lovü analeri Israel nyira kenüh momowa müsaji mümhie nüh jümari aveh no naveh; thi thawa nüh jüma shenyiru na nüh zotheja naveh.

³⁹VÜWA nüh Mosa thi Aron vü azhütsü nü masü nüh Levira kuoh vü ajünü vünüh nyimpari asa küsü vünüh wiehvü küürüh anyie mükeke nü künyi.

⁴⁰Jüsevü VÜWA nüh Mosa vü, “Israel nyiri vünüh atsa nyimpari küwuo khuri asa küsü vünüh wiehvü küzake naveh ünüh mari nyo vünüh rhü nü kürüh luo.

⁴¹Israel nyi nyimpa küwuo khuri müthoh vünüh eh kenüh Leviri vi luo: Hi tü VÜWA, thi samwa Israel nyira zhi küwuo khuwa müthoh vünüh Levira zhi vi luo,” ti küza.

⁴²Jüti küüzavü VÜWA nüh azhükütsü kümjie Israel nyira zavü küwuo khuri kürüh.

⁴³Thi nyimpa küwuo khuri asa küsü vünüh wiehvü anyo rhü nü kürüh küwa anyie mükeke nü künyi müza künyi rürake nü küche.

⁴⁴Jüsevü nga VÜWA nüh Mosa vü,

⁴⁵“Ma mpa nüh anyiri saluo samwa saluo Israel nyira zavü nyimpari küwuo khuwa müthoh vünüh Leviri vi luo; Leviri tü eh zhi sanaveh ünüh: Hi tü VÜWA.

⁴⁶Israel nyira tsa nyimpari küwuo khuri kürüh küwa vü Leviri nyimpari nyieh vünüh müza künyi rürake nü küche nüh küluoh kümri rhehsana küsa kenüh,

⁴⁷nyi küsüvü rakasa münganga vi luo, thi jüma tü kümtsezheh vü küüte vünüh vi naveh,

⁴⁸thi anyi küüluori kürhehsa mewa tü vi nü Aron thi ma tsa nyimpari vü tsüluo,” ti küza.

⁴⁹Jüti sanü Mosa nüh Leviri nüh amüthoh sanü kürhehsa küüluohra ame vi;

⁵⁰Israel nyi küwuo khuri vünüh ame küvi anyie küsü müza küche rorake nü münga,

⁵¹VÜWA zhü müzhe nü ma nüh azhükütsü kümjie vi nü Aron thi ma tsa nyimpari vü tsü.