Read Pochuri Naga NYITOKÜCHIE 30 Bible Online

NYITOKÜCHIE 30 - Pochuri Naga bible

NYITOKÜCHIE 30

¹Jüti küsa vü Mosa nüh Israel nyiri alüri vü, “Hamaha VÜWA nüh azhükütsü.

²Mükütüküzü nyi küsü nüh zanyo küsü sa nta ma kürho küri nü küshiekütsü sataji VÜWA vü küshiekütsü sa, nyutü küüshie küsü vi küüshietsanü ma mpa shietem thuoüji müphrüriera lethuoh; ma po vünüh mowa phrahzhuru nüh jüma müzhe nü sa wie naveh.

³Nyutü nyimzari küsü nüh ma kürüla vü ma pa zhehlo vünüh VÜWA vü küshietsü nta küshietsü nü ma mpa ma shiete nü kürim,

⁴thi ma pa tü ma nüh küshiekütsü thi shiete nü ma mpa ma küri küsa künara tü ma vü zanyoküsü nga müküza thuoüji ma nüh küshiekütsü thi ma mpa ma küri nü shieteküsa aveh tü saju wie naveh.

⁵Thitü ma nüh küphrazhu rülo vünüh nyie üta ma pa nüh müsa thuoüji ma mpa nüh küshiekütsü, thi ma mpa nüh ma shiete nü küri küsawa tü küsajuwa nyuthuoh; thi VÜWA nüh nojatsü naveh, küpakenühnyunü ma pa nüh ma sie mükato nüh saküm kenüh.

⁶Mükütüküzü nyimzari küsü nüh ma nüh phrahzhu nü pehküveh vü nyutü kümhie ta mümzhe nüh ma po vünüh phrahzhu nü ma mpa ma pheh küsa vünüh ma nüh avüpa satewa,

⁷thi ma vüpa nüh künara, thitü küünara rülo vünüh zanyo küsü nga müküza thuoüji ma nüh küshietsü küsawa saju wie naveh, thi ma nüh küshietsü nü ma mpa ma phehte küsawa sajuwie naveh.

⁸Thitü ma vüpa nüh künara thi küünara rülo vünüh ma khem thuoüji küshietsü küsa ma vü pehküvehwa, thi mümshe nüh ma po vünüh küshietsü nü ma kürho pheh küsawa tü phrülem nathuoh, thi VÜWA nga ma noküja sanaveh.

⁹Thitü tünyivüh nyutü ma vüpa nüh ma jakümvüh küsü nüh küshietsü nü ma kürho phehte thuoüji jüma tü ma vü küpeke wie naveh.

¹⁰Thi ma nüh ma vüpa zheh vünüh küshietsü, nyutü ma nüh küüshietsanü ma kürho shiete taji phehte sa,

¹¹thi ma vüpa nüh jüma künara tü zanyo küsü nga müsa thuoüji ma nüh küshietsü küsa aveh tü külewa nyu thuoh, thi ma nüh ma kürho küphehte kenüh küshietsü küsa aveh küphrülewa nyuthuoh.

¹²Thitü ma vüpa nüh jüma küünara rülo vünüh müküsara samtü thi phrülemtü ti thuoüji ma po vünüh momowa küshietsü nü shuru saveh ünüh, nyutü shiete nü ma kürho phehte sa veh ünüh müsarathuoh, küpakenühnyunü ma vüpa nüh phrürie kümtüthuoh kenüh, thi VÜWA nüh nojatsü naveh.

¹³Küshietsü küsa nyutü ma kürho shiete nü ma kürho phehte küsa küsüküsü nga ma vüpa nüh küsara satsü naveh, nyutü phrürieram naveh.

¹⁴Thitü ma vüpa nüh rülo küsü nüh rülo küsü nyiehvü nga ma vü zota pehm thuoüji ma nüh küsara vünüh küshietsü küsari, nyutü ma nüh ma vü shiete küsa ma vüpa nüh küsara satsü küsa saju naveh, küpakenühnyunü ma nüh jüma küünara rülo vü zanyo küsü nga müküüza kenüh.

¹⁵Thitü mükütüküzü ma vüpa nüh jümari thsüra nü jümari müküsara samtü thi phrülemtü ti thuoüji ma vüpa nüh ma vüvüh mükülehri vü naveh,” ti küza.

¹⁶Azhühkhe hamari tü VÜWA nüh Mosa vü azhükütsü nyipanyi azhievü, thi ma kürüla vü ma pa masü azhievü ma pa zheh lovü azhü.