Read Pochuri Naga NYITOKÜCHIE 34 Bible Online

NYITOKÜCHIE 34 - Pochuri Naga bible

NYITOKÜCHIE 34

¹Jüsevü nga VÜWA nüh Mosa vü,

²“Israel nyiri vü azhütsü nü küza luo, nohri Kanan zhih lovü kütuvü (Azhih hamatü nohri nüh küüvina küsawa thuoh, Kanan zhih rütorüthsü aveh hamari),

³nohri zhiese wuovü thuoüji Zin reza vünüh Edom küju, nohri zhiese vü arüh thuoüji zhieshu wuovü Mütsü Juhküji pohte küju;

⁴nohri rühwa tü küzüle alüvü müzhewa Akrabim ju nü jüla nüh Zin wuovü khahkakewa, jüti sanü Kadesh Barnea zhiese pohte ju; thi jüla nüh Hazaradar vü wa nü Azmon vü thsoke;

⁵jüsevü Azmon vünüh küzüle nü Egypt Kutso ju, thi wa nü Mediterranean Juhküji vü vehke naveh.

⁶“Thi Zhietu wuovü arüh thuoüji Juhküji Küjiwa nyokhie müzhewa naveh, hamatü zhietu wuovü nohri rüh.

⁷“Hama nüh nohri zhietü wuovü arüh sanaveh: nohri tü Juh küjiwa vünüh arüto rhieh nü Hor Küzhi ju naveh;

⁸Hor Küzhi vünüh arüto rhieh taji Hamath kütuleh küju thi arühwa tü Zedad nüh sehkhe sanaveh;

⁹jüti sanü Zifron küju wa nü Hazarenan nüh pohte naveh; hamatü nohri zhietü vü arüh sanaveh.

¹⁰“Jüsevü nga nohri zhieshu wuovü arüh thuoüji Hazarenan vünüh arüto rhieh nü Shefam ju naveh;

¹¹thi nohri rütowa tü Shefam vünüh zhieshu wuovü Ain vü Ribla küju tsuo naveh; thi arühwa tü jüta rhiehtsuo nü Khineret juhküji rügi zhieshu wuovü wa ka naveh;

¹²jüla nüh tsuo nü Jordan ju naveh, thi Mütsü Juhküji vü wa vehke nü jüla nüh pohte naveh. Nohri azhih aveh arüh tü hakümjie vünüh mükiele naveh,” ti küza.

¹³ Jüsevü Mosa nüh Israel nyiri vü azhütsü taji, “Nohri tü azhih hama aküze sanü küüsuo rügivü nüh vi naveh, azhih hamatü VÜWA nüh akuoh tüguh thi küzhilari vü tsü üta azhükütsü küsü;

¹⁴küpakenühnyunü Reuben kuoh, Gad kuoh thi Manase kuoh küzhila ti thuoüji mari suope vikümthuoh kenüh;

¹⁵akuoh jüma künyi thi akuoh küzhilawa thuoüji zhieshu rünyi küshupe wuovü Jordan rühgu tuwuovü Jeriko vü mari Jisuo ngumthuoh,” ti küza.

¹⁶Jüsevü VÜWA nüh Mosa vü,

¹⁷“Anyi anyo hamari nüh azhih nohri suope küsuo naveh: Eleazar navüwa, Nun atsa Joshua,

¹⁸thi akuoh vünüh sierhü küsüsü vizhu nü küüsuo saluo.

¹⁹Azhih küüsuo vü akuoh sierhüra nyo: Judah kuoh vü Jefune atsa Kaleb.

²⁰Simeon kuoh vü Amihud atsa Shemuel.

²¹Benjamin kuoh vü Khislon atsa Elidad.

²²Dan kuoh vü sierhüri küsü, Jogli atsa Buki.

²³Josef atsa nyimpari: Manase atsari sierhü küsü, Efod atsa Haniel.

²⁴Thi Efraim vünüh sierhü küsü, Shiftan atsa Kemuel.

²⁵Zebulun atsara kuoh sierhü thuoüji Parnak atsa Elizafan.

²⁶Issachar atsara kuoh sierhüwa thuoüji Azan atsa Patiel.

²⁷Asher tsara kuoh sierhüwa thuoüji Shelomi atsa Ahihud.

²⁸Naftali tsara kuoh sierhüwa thuoüji Amihud atsa Pedahel nüh sanaveh.

²⁹VÜWA nüh azhükütsü kümjie Kanan zhih vü Israel nyiri kenüh azhih suope küüsuo vü anyi hamari nüh küsuo naveh.