Read Pochuri Naga NYITOKÜCHIE 35 Bible Online

NYITOKÜCHIE 35 - Pochuri Naga bible

NYITOKÜCHIE 35

¹ Jüsevü Jordan rühgu nato Moab zhih kütakeri vü Jeriko vünüh VÜWA nüh Mosa vü,

²“Israel nyiri vü azhütsüluo, mari müthoh vünüh Leviri küürho na küsa kenüh anyuji thi ma poteposhu vü kümrhuope tsüluo.

³Anyuji thuoüji mari küürho na küsa kenüh, thi kümrhuope thuoüji mari mieshümiesa, mari seshuh thi mari samwari kenüh.

⁴Anyujiri vü kümrhuope nohri nüh Leviri vü tsü nta küsa thuoüji anyujiwa azie vünüh ale müza müzü nü tünyieke rike vünüh mükiele naveh.

⁵Anyuji alievü zhieshu wuovü nga, zhiese wuovü nga, zhietu wuovü nga thi zhietü wuovü nga ale müza tüguh vünüh küte mükiele nü anyujiwa nüh azhila sanaveh; mari nyujiwa kenüh kümrhuope hama mari zhi sanaveh.

⁶Nohri nüh anyujiri vi Leviri kütsü vü mükütüküzü anyi wuori nüh küsamie vünüh anyi fetheküm sa thuoüji wa nü münyi na küsa kenüh anyuji türo thi küpa zührake nü künyi thsephre nü tsü naveh.

⁷Anyuji nohri nüh vi Leviri tsü na küsa aveh küsaji zürake nü tüze thi kümrhuope nga ti tsü naveh.

⁸Thi nohri nüh Israel nyiri vünüh anyuji vi Leviri tsü na küsa thuoüji akuoh küjiri vünüh küüzhi thi akuoh küzahri vünüh züla ti tsü naveh, küsüküsü nga amüthohwa kürike nüh jü vünüh kete nü Leviri tsü naveh,” ti küza.

⁹ Jüsevü nga VÜWA nüh Mosa vü,

¹⁰“Israel nyiri vü küza luo, nohri Jordan kari nü Kanan zhih vü küwa vü,

¹¹anyuji wuori rüka sanaveh, jüma thuoüji mükütüküzü anyi wuori nüh küsamie vünüh anyi fethem thuoüji wa nü jüla münyi na küsa kenüh sanaveh.

¹²Anyuji jüma tü nohkeri nüh wie, nyi küsü nüh küsamie vünüh fethemiem thuoüji ma tü wa nü ashiejiwa tüvü ashih vü müjie kütsü küju nü ashewi thuo nta küsari vünüh münyila nta küsa kenüh.

¹³Thi nohri nüh anyuji kütsü vünüh hama kenüh anyuji türo sanaveh.

¹⁴Kümnyi nyuji kürüka vü küche thuoüji Jordan rühgu tuwuovü, thi küche nü Kanan zhih wuovü, ti rüka naveh.

¹⁵Nyi küsüküsü nga mari azhievü küsamie vünüh anyi fethem thuoüji ma mpa nüh Israel nyiri saluo, anyilieri saluo nyutü priru küpehri nga saluo zhüwa nü anyuji jümari vü münyi na küsa kenüh.

¹⁶“Thitü nyi küsü nüh amürü tsokrü nüh küsa zanyo wuori vi nü anyi wuori fethem thuoüji ma tü anyi küfetheri samthuoh nü ma tü küsüm wie nathuoh.

¹⁷Thi nyi küsü nüh anyi küvehthera aloh tsokrü ma ke vü küjehke nü anyi vehthem thuoüji ma tü anyi küvehtheri sakümthuoh kenüh ma küüsüm wie naveh.

¹⁸Nyutü nyi küsü nüh anyi küfethera athsoh tsokrü ma ke vü küjehke nü anyi fethem thuoüji ma tü anyi küfetheri sakümthuoh kenüh ma tü küüsüm wie naveh.

¹⁹Ma züh müthoh küvi ma jienüri mpa nüh ma mütu thuoüji ma fethe naveh.

²⁰Thitü mükütüküzü nyi küsü nüh kümrhü vünüh huola nü ma shüthem nyutü ma wuthem thuoüji,

²¹nyutü mükünongüluo vünüh ake nüh tohthem thuoüji ma tü anyi küfetheri sakümthuoh kenüh nyiri tohthe küm jümawa tü küüsüm wie nathuoh, ma züh müthoh küvi ma jienüri mpa nüh ma mütu thuoüji ma fethem naveh.

²²“Thitü mükütüküzü ma nüh mükünoluongü mükünyu vünüh shüthem, nyutü zanyoküsü nga kühuola müke vünüh müwuthe,

²³nyutü mükünongü vünüh nyunü müküngu vünüh nyi küsü nüh aloh nüh nyi küsü vehthem nyutü ma sakümsütsü nta küphah vünüh nyu wie ketünga vehthem thuoüji,

²⁴küvehthewa thi azüh müthoh sa nta küsa ajienü mari azhievü ashiejiwa nüh azhühkho hamari vi nü ashih sanaveh;

²⁵thi anyi fethe kümwa tü ashiejiwa nüh azüh küüthü müthoh vi na saküveh jienüri vünüh ma külole nü ma nüh anyuji khiemawa vü zhüwa nüh jümawa vü siewa sanü avüjuh kümtse vi nü ma küthse navü kümsiewa müjie küsü küju nü ma tü jüla küürhom naveh.

²⁶Thitü anyi fethe kümwa tü ma nüh münyi küveh anyujiwa vünüh tsotho muomuo vü nga kari wa nü,

²⁷azüh thü küm müthoh vi nta sa küveh jienüri nüh ma ngu nü fethem wie ketünga anyi jüma tü azüh küthü küm jüma kenüh zanyoküsü nga ma müküleh münyie luo.

²⁸Küpakenühnyunü anyi fethe kümwa tü ma nüh münyi küveh nyujiwa vü navü kümsiewa müjie küsü küju zota küpehle küsa kenüh; thitü navü kümsiewa süküm sevü thuoüji ma tü shele ma pe ma ze vü ru mhie vehthuoh.

²⁹“Thi zanyo hamari tü nohkeri nüh azhühkhe thi azhühkho sanü nohri nüh khiekhiela rho naveh ünüh nohri wuhle küju müzhe naveh.

³⁰ Jüsevü nga mükütüküzü nyi küsü nüh anyi fethem thuoüji pohvü künyi nyutü jüma nyiehvü küpeh rügivü nüh ma tü küüsü naveh; thitü nyi küsü pohvü rügivü mpa nüh nü nyi küsü nga müküsü ra.

³¹Jü mpa mükünyu nyuri küzothewa, müküleh peh kümwa nohri nyi küsü nga nüh ame vi nü thuomtsüra; ma tü küüsü wie naveh.

³²Thi nyi küsü nüh ma nüh münyi nta anyuji kümnyiwa vü kuoküwa vü ma pe ma ze vü kürho nta sanü navü kümsiewa müjie küsü tüvü nyi küsü nga nüh ma thuomtsüra.

³³Jükümjie vünüh nohri tü nohri nüh rhoküveh azhihwa samkümnera; küpakenühnyunü azüh tü azhihwa sa kümne küveh kenüh, thi ma züh küthü kümwa vünüh wie küchie nüh azhih jüla nüh azüh küthü kümwa tü azhih samkümtsera wiethuoh.

³⁴Nohri nüh rho küveh azhih hi nüh azhievü peh küvehwa samkümnera; küpakenühnyunü hi VÜWA tü Israel nyiri azhievü pehküveh kenüh,” ti küza.