Read Pochuri Naga NYITOKÜCHIE 36 Bible Online

NYITOKÜCHIE 36 - Pochuri Naga bible

NYITOKÜCHIE 36

¹Jüsevü Gilid jünü vü tharuo alüri Josef atsa Manase azhü kükhruowa Makhir tü Mosa kütuoh vü ru nü Mosa thi Israel anyi sierhüri tharuo vü alü sakütseri vü,

² “Israel nyiri tü aküze sanü azhihwa küsuo taji vi üta VÜWA nüh eh vüwa vü azhütsüthuoh; thi hiri anü Zelofehad müthoh azhihwa tü vi nü ma tsavühri tsü üta VÜWA nüh eh vüwa vü azhütsü.

³Thitü mükütüküzü mari nüh Israel nyiri akuoh küpari vü zatewa thuoüji mari zhehzhuh tü mari nüh akuoh khiela nüh shutewa nüh aküze sanü viteküwawa tü ma nüh ajünü zateküwa wa vü thsephrem nathuoh.

⁴Thi Israel nyira jubilee ru thuoüji mari zhehzhuh tü mari nüh wa rhoküvehwa vü küüpekem nathuoh, jüti sanü mari zhehzhuh tü hiri para kuoh zhezhuh vünüh vitewa nathuoh,” ti küza.

⁵Jüti küsa vü VÜWA zhü müzhe nü Mosa nüh Israel nyiri vü azhütsü taji, “Josef tsara kuoh nüh awuleh.

⁶Zelofehad tsavühri kenüh VÜWA nüh azhükütsü hama mari mpa mari kükato küshuküra jünüri vü mpa za luo, thi ma pa jünüri vü mpa nüh zaluo.

⁷Israel nyira zhehzhuh tü ajünü küsü vünüh ajünü küsü vü küzhiluo müwa ra; küpakenühnyunü Israel nyiri küsüküsü nga papara jünü zhehzhuh müküjehke üji mükümhie kenüh.

⁸Thi atsavüh küsüküsü nga thari nüh Israel nyiri jünü zhehzhuh viveh ünüh ma mpa ma nyira jünü tharuo vüvüh müsaji mümhie, jüüta thuoüji Israel nyiri küsüküsü nga ma nyira zhehzhuh vira naveh.

⁹Jükenüh azhezhuh tü ajünü küsü vünüh ajünü küsü vü küzhiluo müwara; küpakenühnyunü Israel nyira jünü küsüküsü nga papa küsa zhehzhuh küjephoke wie naveh,” ti küza üti küza.

¹⁰Thinü Zelofehad tsavühri tü VÜWA nüh Mosa vü küüza kümjie vünüh sa;

¹¹küpakenühnyunü Mala, Tirza, Hogla, Milka thi Noah, Zelofehad tsavühri tü mari mpa mari nyira nüri vü küza kenüh.

¹²Mari tü Josef atsa Manase atsa tharuo nyimpari vü za kheh, thi mari zhehzhuh tü ma nyira tharuo jünü vü peh huo.

¹³Azhükütsü thi azhühkho hamari tü Jordan rühgu nato Moab azhih kütake vü küpeh Jeriko vünüh VÜWA nüh küüza Mosa nüh Israel nyiri vü kütsü.