Read Pochuri Naga NYITOKÜCHIE 4 Bible Online

NYITOKÜCHIE 4 - Pochuri Naga bible

NYITOKÜCHIE 4

²“Levi atsa nyimpari azavü nüh Kohat atsa nyimpari nyitoküchie ajünü vünüh thi ma pari zheto vünüh vi luo,

³mahvi cherake vünüh tünyieke küju thari nüh küüroh vü tu nü küsezhuh juhthsüzhehwa zanyo sara naveh ünüh jümari kürüh luo.

⁴Küsezhuh juhthsüzheh vü zanyo kümtse tsatsari kenüh Kohat atsa nyimpara küüroh hamari.

⁵Kürünapewa kütsele luo nta küsa vü Aron thi ma tsa nyimpari nüh juhthsü kükhurüzheh lovü tu nü küzietethsüwa viam nü kütsathuo kuwa hietem naveh;

⁶jüti sanü jüma nyiehvü nyihsü sahu nüh hiete le nü athsü akhehmthsü nüh vi hiete le naveh, jüti sanü ma tsükhie künyi küzheke naveh.

⁷Thi mari nüh toküsapewa rügivü lohse vi VÜWA vü kütsüwa nyiehvü khehmthsü nüh hieke nü akhuri, sierhe kenüh aküfüri, asüzahri; aküzhu kükhurü kenüh alehuori; thi saküpeh huo lohse nga ti thse naveh;

⁸thi jüma nyiehvü athsü kümruphieke küsü hieke naveh, jüti sanü nyihsü sahu nüh jüma nyiehvü hietem nü atsükhie künyi küzheke naveh.

⁹Jüsevü nga mari nüh khehmthsü küsü vi nü latiwa kenüh latiwa hiete naveh, latikuri nga, vüjuh küzhike kuri nga ti aveh hiete kheh naveh:

¹⁰thi mari nüh küfüküjuh aveh vi nyihsü sahu kütiehte lovü thse nü kha na küsa kenüh awieh rügivü sanaveh.

¹¹Thi suna kükhurüpewa nyiehvü nga akhehmthsü küsü nüh hiete nü jüma nyiehvü nyihsü sahu nüh hiete le naveh; jüti sanü atsükhie vü thse naveh;

¹²mari nüh kümtsezheh vü vi küüroh küfüküjuh aveh vi nü khehmthsü vü thse nü nyihsü sahu nüh tieh taji kükhaku lovü thse naveh.

¹³Jüsevü nga kükhurüpewa vünüh awejiri vijam nü athsü küsümo nüh hietem naveh;

¹⁴jüti sanü kükhurüpe vü ahuokhu jüla vi zanyoküsari aveh: atahthsüri, akhatsihri, küüzhievühri, ketsokuri thi kükhurüpe vü ahuokhu küvi aveh thse nü jümari nyiehvü nyihsü sahu nüh hiete nü atsükhie küzheke naveh.

¹⁵Jüti sanü Aron thi ma tsa nyimpari nüh kümtsezhehwa thi jüla tsokrüri aveh hietem nü kürünapewa kütsele tewaluo nta thuoüji Kohat atsa nyimpari nüh ru nü kha naveh, thitü mari tü müsü nüh sana küsa kenüh kümtse tsokrü küsü nga küpawa nyu. Kohat atsa nyimpari nüh küsezhuh juhthsüzheh vü azanyori kha na küsa tü hamari.

¹⁶“Thi Aron navüwa atsa Eleazar nüh latiwa kenüh vüjuh, sierhe küüngu, mükütuo nüh atha vi kükhurü, aküthse vüjuh juhthsü kükhurüzhehwa aveh, thi jülovü kütü zanyo aveh no naveh,” ti küza.

¹⁷Jüsevü nga VÜWA nüh Mosa thi Aron vü,

¹⁸“Kohat ajünüri tü Leviri vünüh pokah küm müsa tümluo;

¹⁹mari nüh azanyori kha nta küru vü mari tü müsü nüh rho na küsa kenüh mari vü hama saluo: Aron thi ma tsa nyimpari nüh alovü tu nü nyi küsüsü mowa sanaveh thi ma khuo nü mowa nüh küza naveh,

²⁰thitü mari tü müsü nüh sana küsa kenüh alovü tu nü pike nga kümtse zanyori künowa nyu,” ti küza.

²¹VÜWA nüh Mosa vü,

²²“Gershon atsa nyimpari nga nyitoküürüh ajünü vünüh thi apara zheto vünüh vi luo;

²³küsezhuh juhthsüzheh vü thari nüh tu nü küüroh sara naveh ünüh nyimpari mahvi cherake vünüh wa tünyieke küju nyitoküürüh vi luo.

²⁴Hamari tü Gershon jünüri nüh küüroh sana küsa akhuo thi vü na küsari;

²⁵mari nüh juhthsü kükhurüzheh vü athsü küziete, jüma nyiehvü nyihsü sahu nüh kühiete, küsezhuh juhthsüzheh küziete,

²⁶anyula vü küzieteri, kükhurüpewa thi juhthsü kükhurüzheh ziete küümkiele vü akheri küziete, jümara liri, vi nü jümari vü küroh na küsa tsokrüri, thi hamari vü müsajimkümhieri aveh mari nüh sanaveh.

²⁷Gershon atsa nyimpari nüh küroh na küsa thuoüji Aron thi ma tsa nyimpari nüh momowa sa üta küza naveh ünüh jüvü nüh sa kheh naveh, mowa sanaveh ünüh nyutü mari nüh mowa vü naveh ünüh Aron thi ma tsa nyimpari nüh kütuohtsü kheh naveh.

²⁸Küüroh hamari tü küsezhuh juhthsüzheh vü Gershon thi ma tsa nyimpara jünüri nüh sana küsa; thi mari nüh küüroh sa küsa vü Aron navüwa tsa nyimpawa Ithamar nüh küjokütsü kükhu vünüh sa kheh naveh.

²⁹“Jüsevü nga Merari atsa nyimpari tü mari jünü thi apara zheto vünüh nyito küürüh vi luo;

³⁰thari nüh küsezhuh juhthsüzheh lovü tu sara naveh ünüh mahvi cherake vünüh tünyieke küju kürüh luo.

³¹Küsezhuh juhthsüzheh vü mari nüh küüroh aveh vü nü sana küsari: Juhthsü kükhurüzheh azieri, ma wuhzieri; atohvühri, ma kütokeperi,

³²anyula vü rüpe tohvüh thi kütokeperi; küzetevühri, akuliri, jümara tsokrü aveh thi jümara kümjemtah vü naveh, thi mari momowa küüsanaveh ünüh amahnyori müjü nü küza naveh.

³³Merari jünü nüh Aron navüwa atsa Ithamar kükhu vünüh küsezhuh juhthsüzheh vü küüroh sana küsari tü hamari kheh,” ti küza.

³⁴Jüsevü Mosa, Aron thi küsezhuh sierhüri nüh Kohat atsari ajünü thi apara zheto vünüh küürüh sa,

³⁵mahvi cherake vünüh tünyieke küju thari nüh küsezhuh juhthsüzheh vü tu nü küüroh sara naveh ünüh jümari rüka;

³⁶thi ajünü vünüh kürüh küwa mari anyie künyi müza türü nü tünyieke.

³⁷VÜWA nüh Mosa vü azhükütsü kümjie vünüh Mosa thi Aron nüh Kohatri küsezhuh juhthsüzheh lovü nyi küzake nüh küroh ünüh hamari.

³⁸Gershon atsa nyimpari mari jünü vünüh thi ma pari zheto vünüh küürüh;

³⁹mahvi cherake vünüh tünyieke küju thari nüh küsezhuh juhthsüzheh lovü tu nü küüroh sara na küsari,

⁴⁰mari jünü thi ma pari zheto vünüh küürüh anyie künyi müza türo nü cherake.

⁴¹VÜWA nüh azhütsü nü Mosa thi Aron nüh Gershon tsari thari nüh küsezhuh juhthsüzheh lovü tu nü küürohri mari jünüri kürüh küwa hamari.

⁴²Thi Merari jünüri ma pari zheto vünüh küürüh,

⁴³mahvi cherake kükhruo vünüh tünyieke küju thari nüh küsezhuh juhthsüzheh lovü küüroh küsarari küürüh,

⁴⁴ajünü vünüh küürühji anyie küche nü müza künyi.

⁴⁵Hamari tü VÜWA NÜH Azhükütsü Mosa thi Aron masü nüh Merari atsa nyimpari ajünü vünüh küürüh.

⁴⁶Hamari aveh tü Mosa, Aron thi Israel sierhüri nüh Leviri ajünü thi ma pari zheto vünüh küürüh,

⁴⁷mahvi cherake kükhruo vünüh tünyieke küju küsezhuh juhthsüzheh lovü tu nü küüroh sara thi vüra ti küsarari,

⁴⁸aveh küsaji anyie tüze müza münga nü zerake.

⁴⁹VÜWA nüh Mosa vünüh azhütsü nü küüroh thari nüh mowa sa thi vü naveh ünüh tokütsü; hakümjie vünüh VÜWA nüh Mosa vü azhükütsü kümjie ma nüh kürüh kheh.