Read Pochuri Naga NYITOKÜCHIE 5 Bible Online

NYITOKÜCHIE 5 - Pochuri Naga bible

NYITOKÜCHIE 5

¹Jüsevü nga VÜWA nüh Mosa vü,

²“Israel nyiri tü kürünape lovü wuhpie küna, satsa vünüh mükümtse turu küpeh huori thi aküsü kümo pa nü sakümne kümri aveh zhejam üti azhütsüluo;

³hi nüh mari azhievü küpeh kürünapewa thama saküümne kenüh kürünape vünüh nyimpa nga nyimza nga mükümtse aveh thuoüji alievü zhezhuja khehm luo,” ti küza.

⁴VÜWA nüh Mosa vü Azhütsü nü küüza kümjie müzhe nü Israel nyiri tü jümari aveh zhezhuja khehm.

⁵ Jümasevü nga VÜWA nüh Mosa vü,

⁶“Israel nyiri vü küza luo, mükütüküzü ma mpa nüh nyimpari saluo nyutü nyimzari saluo nyiri nüh küsa kükhiemuo küsüküsü nga sanü VÜWA vü ma kütsotü vüriem nü ma tü müküleh sam thuoüji,

⁷ma nüh kükhiemuo sakümwa phrahzhu nü ma nüh müküleh sakümwa vü küüsuo münga sanü küsü thsephe taji thuoju kütsü le sanaveh.

⁸Thitü mükütüküzü ma nüh müküleh saküm kenüh ma vü thuonakü sawa tü süm thi ma jienü münyie ti thuoüji ma nüh thuona küsawa tü thavüma küthuo kenüh VÜWA vü tsüm nü navüwa zhi küüsam naveh, thuokütsü nyihzhüwa tü ma kenüh thuokütsü nyihzhüvo masü thsephe naveh.

⁹Thi Israel nyiri nüh kükhurü kümtse zanyo navüwa vü viküru aveh thuoüji ma zhi sa kheh naveh;

¹⁰thi anyi küsüküsü azhi nga kümtse zanyo aveh nü ma zhi; anyi küsüküsü nga nüh momowa vi navüwa tsü naveh ünüh ma zhi sa kheh naveh,” ti küza.

¹¹Jüsevü nga VÜWA nüh Mosa vü,

¹²Israel nyiri vü küza luo, mükütüküzü nyi küsü avüvüh nüh ma vünüh küpuoküpe tewa nü ma vü münyitsanüh sam,

¹³thi mükütüküzü nyimpari küsü nüh asazüh kümngu vünüh ma siezehm nü ma vüpa notha vünüh küthim thi ma nüh ma mpa ma sakümnemthuoh tü ma mükhizhura nüh sam thi nyi küsü nga nüh ma zanyokümsü küsa ngu nü pohvü mütsüra nüh sam;

¹⁴thi ma vüpa nüh zanyo ma müshekümsü vünüh ma vüvüh müshemsü peh, thitü ma vüvüh tü münem nyutü mümne wie ketünga ma vüpa nüh zanyo ma müshekümsü vünüh ma vüvüh müshemsü peh,

¹⁵ti thuoüji ma vüpa tü ma vüvüh sie nü amüthahie küüto küsü vi ti sanü navüwa vü ru naveh; ma tü ahiewa lovü vüjuh thi küüngu küsü nga küthsewa nyu, küpakenühnyunü hamatü ma vüpa nüh müshekümsü müküleh küsa viküru müshepeh huo na küsa ahie kükhurü küsa kenüh.

¹⁶Jüti sanü navüwa nüh nyimzawa sie VÜWA vü shenyiru nü ma tüvü sanaveh;

¹⁷thi navüwa nüh azhih küfü lovü nüh kümtse juh thse thi kükhurüpewa kütuoh vünüh azhitho hu nü kümtse juhwa lovü thse naveh.

¹⁸Jüti sanü navüwa nüh nyimzawa sieru VÜWA tüvü sanü ma sheh mümsü nüh sanaveh, thi müshe küpeh huo ahie kükhurü, jüma tü müshekümsü ahie kükhurüwa vi nü ma ke vü thse naveh. Thi navüwa nüh ma ke vü kükha juh kümzü viküruwa vi naveh.

¹⁹Jüti sanü navüwa nüh nyimzawa vü küüshiezhü tsü taji, mükütüküzü nyi küsü nga nüh noh siezeh müsa üji, noh nüh noh vüpa kükhra kükhu vü küpeh vü noh nüh mükümtse vü sühle wa müsaji kümzü viküruwa kükha juh vünüh noh mpa noh küülolewa saluo.

²⁰Thitü noh nüh noh vüpa kükhra kükhu vü pehwie ketünga noh nüh mükünyu vü tewam, thi noh mpa noh sakümnem nü noh vüpa mükünyu küpari siezeh saveh üji,

²¹jüta thuoüji, navüwa nüh nyimzawa tü zhühkha küüshiezhü phra nü nyimzawa vü, VÜWA nüh noh vü kümzüwa küüsaluo thi noh nyira zavü küüshiem luo, jüti sanü VÜWA nüh noh thüchi saküükhramtü naveh;

²²thi kümzü juh hama noh kure vü likütuwa saluo, thi noh satsa tü küvüwa saluo, noh thüchi tü khrati teküwawa saluo. Jüta küüza vü nyimzawa nüh, ‘Nyie luo, nyie wie luo,’ ta küza naveh.

²³Jüti saküm sevü navüwa nüh kümzü zhü hamari lasipha lovü rhüke nü ajuh kükhawa lovü phrühke naveh;

²⁴thi navüwa nüh kümzü juh kükha jüma vi nyimzawa küüzhu nü ajuh kümzü kütsüwa tü ma lovü tu nü khielota saküüna naveh.

²⁵Jüti sanü navüwa nüh müshekümsü ahie kükhurüwa nyimzawa tü VÜWA tüvü nüh vi shohküze nü kükhurüpewa vü viru naveh;

²⁶thi navüwa nüh müshe küpeh huo kenüh ahie kükhurüpe rügi vünüh tso naveh, jüsevü nüh nyimzawa tü ajuh küüzhu naveh.

²⁷Navüwa nüh ajuhwa küüzhum thi nyimzawa nüh ma mpa ma sakümnem thi ma vüpa vü mükünyitsa sam ti thuoüji kümzüwa juh tü ma lovü tu nü müküüzara nüh ma saküüna naveh, jüti sanü ma satsa tü vü teru naveh thi ma thüchi tü khrata tewa naveh, thi nyimzawa tü ma nyira zavü kümzü vüm nathuoh.

²⁸Thitü nyimzawa nüh ma mpa ma samükümne thi mütsem ti thuoüji hamari ma vü küruwa nyu thi ma vünüh atsa moh naveh.

²⁹“Hamari tü müshekümsü ashih, nyimzari küsü nüh ma mpa nüh ma vüpa kükhra kükhu vü peh nü lehkhuji mükünyu vü tewa nü ma mpa ma sakümnem,

³⁰nyutü müshekümsü sietse avüpa küsü vü teru nü ma tü ma vüvüh müshemsüm thuoüji ma tü ma vüvüh siewa nü VÜWA tüvü thse taji navüwa nüh nyimzawa lüvü khonyo hamari sanü ma lü rügivü kükeke naveh.

³¹Mükülehwa tü nyimpawa lü vü küruwa nyu, thitü nyimzawa nüh mükülehwa vü naveh,” ti küza.