Read Pochuri Naga NYITOKÜCHIE 6 Bible Online

NYITOKÜCHIE 6 - Pochuri Naga bible

NYITOKÜCHIE 6

¹Jüsevü VÜWA nüh Mosa vü,

²“Israel nyiri vü küza luo, mükütüküzü nyimpari küsü nüh nyutü nyimzari küsü nüh küphrahzhu küütsa Nazaren küphrahzhu sanü ma mpa nüh VÜWA vü tsüküpa nta thuoüji,

³ ma mpa nüh akhah thi küzhuvüh kümzo vünüh mükükheke üji mümhie; akhah vünüh rhelivijuh küsa nyutü küzhuvüh kümzo, thi rhelivijuh müzhura, nyutü rhelivi ma mpa nüh aju küsaluo nyutü mükünyuluo mütsara.

⁴Ma mpa ma saküpa küpeh tsotho küju thuoüji rhelivi vünüh küvizhu zanyoküsü nga kütsawa nyu, ma tha saluo nyutü ma kie saluo kütsawa nyu.

⁵“Thi ma nüh phrahzhu nü ma mpa ma saküpa saküveh rülo küju thuoüji piketü alühse ma lü küüshikewa nyu; ma nüh ma mpa ma viküpa nü VÜWA vü kütsü tsothowa müjie küjuküju nü ma tü kümtse vü müpeh üji mümhie; thi ma sheh tü küülüthem luo.

⁶“Thi ma nüh ma mpa ma vi VÜWA vü tsüküveh tsotho küju nü nyiri küsü kümo küshehnyiwa nyu.

⁷Ma mpa nüh ma pa süluo, ma zah süluo, ma jienü nyutü ma tsevüh süluo ma saküümnewa nyu, küpakenühnyunü ma saküpa nü Saküüwuowa vü tsü küsa tü ma lü rügivü pehküveh kenüh.

⁸Ma saküpa küsa rülo küju thuoüji ma tü VÜWA vü mütse küveh kenüh.

⁹“Thi azhüazhü nüh anyi wuori ma kütuoh vünüh zhürüluo süm nü ma lü sakümtse küsawa sakümnem thuoüji ma lü sem naveh.

¹⁰Rülo tüzeawa thuoüji ma tü ato mükhrietü künyi nyutü azheh mükhrietü kürünyi künyi vi nü navüwa vü küsezhuh juhthsüzheh lehpie vü ru naveh,

¹¹thi navüwa nüh küsüwa thuoüji kükhiemuo kükhurü sa thi küpa küsüwa thuoüji kütso kükhurü sanaveh, jüti sanü ma kenüh kürhehsa küüroh sa tsü naveh,

¹²thi ma saküüpa rülo vü ma mpa nüh VÜWA vü küpa naveh, jüti sanü nyihzhüzahvo mahvi küsü kükhruo müküleh kükhurü kenüh viru naveh; thitü tsotho pokhuwa thuoüji küchiekewa nyu, küpakenühnyunü ma nüh ma tsü küüpa rülo jümari tü sakümne kümthuoh kenüh,

¹³ “Nazaren khonyo tü hama, mükütüküzü ma nüh saküüpa tsothowa jum thuoüji: ma sie nü küsezhuh juhthsüzheh lehpie vü sieru naveh,

¹⁴thi ma nüh VÜWA vü kütewa vi kükhurü sanaveh, nyihzhüvo mahvi küsü kükhruo mükünyiena küsü, thi nyihsüvo mahvi küsü kükhruo mükünyiena küsü kükhiemuo kenüh kükhurü, thi kütsathuo kükhurü kenüh nyihzhüvo azhührhümüküpe küsü,

¹⁵thi lohse ahzhi müküthse mülo küsü, tieshu ahie teküünya vüjuh küünyarü, amüsanüh küveh lohse vüjuh küzhike, mari ahie nüh kükhurü thi mari aküzhu kükhurü viru naveh.

¹⁶Jüti sanü navüwa nüh jümari VÜWA tüvü viru nü ma kükhiemuo kenüh kükhurü nga thi kütso kükhurü nga satsü naveh,

¹⁷thi nyihzhüvowa thuoüji kütsathuo kükhurü küsahthuowa thi ahzhi müküthse lohse amülowa nga ti masü khürü küsahthuo sanü VÜWA vü tsü naveh; jüsevü nga navüwa nüh ahie nüh kükhurüwa thi aküzhu kükhurüwati vi kükhurü sanaveh.

¹⁸Jüti sanü Nazarethwa tü küsezhuh juhthsüzhehwa lehpie vünüh ma lü kümtse küüroh saküsawa tü sem nü ma lü saküümtse küüroh saküsawa asheh tü kütsathuo kükhurü küsahthuo saküsawa kükhuvü anyih pehküvehwa lovü thse naveh.

¹⁹Jüti sanü Nazarethwa lü saküümtse küüroh saküm sevü nüh sekümwa ke vü navüwa nüh nyihzhüvo arha shuküsa vi, amülo vünüh ahzhi müküthse tieshu küsü vi thi ahzhi müküthse amüsa küveh ti thse naveh,

²⁰jüti sanü navüwa nüh jümari tü VÜWA tüvü nüh noküja kükhurü sanü shohküze naveh; jümari nga, akhu noküjawa nga thi athüchi vi kükhurüwa nga ti navüwa kenüh asuope kümtse; jüsevü nüh Nazarethwa tü akhah zhu mhieveh.

²¹“Nazaren thawa nüh küphrahzhu sanaveh ünüh khonyo hamatü ma ke nüh wie. Ma nüh VÜWA vü kükhurüwa tü ma nüh Nazareth ta sanü küphrahzhu vünüh sanaveh, hama nyievü nüh ma nüh küphrahzhu kümjie ma nüh Nazaren ta saküüpa khonyo müzhe nü ma tü sanaveh,” ti küza.

²²VÜWA nüh Mosa vü,

²³Aron thi ma tsa nyimpari vü küza luo, hakümjie vünüh Israel nyiri vü tsiatsü naveh: nohri nüh mari vü hakümjie küza naveh:

²⁴VÜWA nüh tsia noh tsü thi noh sieküpehwa saluo:

²⁵VÜWA nüh ma nyiehwa tü noh vü wieke kütsüwa sa thi külozhiwa saluo:

²⁶VÜWA nüh ma nyiehwa khake nü noh vü küthsewa saluo.

²⁷“Hakümjie vünüh mari tü eh nyowa Israel nyiri vü thse naveh, thi hi nüh tsia mari tsü naveh,” ti küza.