Read Pochuri Naga NYITOKÜCHIE 9 Bible Online

NYITOKÜCHIE 9 - Pochuri Naga bible

NYITOKÜCHIE 9

¹ Egypt zhih vünüh mari tsezhuteküru sevü mahvi künyiawa asa pokhuwa vü Sinai reza vünüh VÜWA nüh Mosa vü,

²“Israel nyiri tü tsekükari kenüh akhu tsotho kütuohke küsa vü kheti müzhe sasaluo.

³Hama sarülo türamzü münüleh vü azhühkhe thi azhühkhori müzhe nü akhu hama kütuoh küsawa kükhuwaluo,” ti küza.

⁴Jükenüh Mosa nüh Israel nyiri vü tsekükari khuwa müzhe üti küza.

⁵Thinü Israel nyiri tü asa pokhuwa rülo türamzü münüleh vü Sinai reza vünüh VÜWA nüh Mosa vü azhükütsü kümjie Israel nyiri tü sa.

⁶Thitü jüma rülovü mari wuori anyira kümo pa nü mümtse nüh tsühna küm kenüh tsekükari khuwa müsara nüh sam nü mari tü jüma rülovü Mosa thi Aron vü ru;

⁷thi mari nüh masü vü, “Hiri tü anyi küsü kümo küpa kenüh mümtsethuoh thi tsühnathuoh; thitü hiri tü mokenüh VÜWA vü kükhurü müküsanüh sanü Israel nyiri vünüh athuo küüsana lo?” ti küza.

⁸Thinü Mosa nüh mari vü, “Huola luo, VÜWA nüh nohkeri nüh mowa zhütsü naveh ünüh künano naveh ünüh,” ti küza.

⁹Jüti küüzavü VÜWA nüh Mosa vü,

¹⁰“Israel nyiri vü küza luo, mükütüküzü nüh nohri nyutü nohri küshuküra anyi wuori nüh akümo[1] pa nü mümtse nüh sam, nyutü azetse suotewa wie ketünga ma tü VÜWA vü tsekükari khuwa sa wie naveh.

¹¹Asa künyiawa rülo türamzü münüleh vü sanaveh; alohse ahzhi müküthse thi are kükhawa ti tsanaveh.

¹² Mari tü tsatu nü arüne vü küsawa nyu, nyutü arü kükuo küsü nga küsawa nyu; thitü tsekükari khu azhühkhe aveh müzhe wie naveh.

¹³Thi anyi wuori mütse wie ketünga nyutü küzeh tsetemwa wie ketünga tsekükari khuwa mümzhe nüh sam thuoüji ma nü ma nyiri vünüh vijam naveh, anyi jüma tü ma mpa nüh ma kükhiemuo vü naveh, küpakenühnyunü ma nüh tsothovü VÜWA kükhurüwa müküsa kenüh.

¹⁴Mükütüküzü anyitheri küsü nüh ru nohri vü rülo pike nyi peh nü VÜWA vü tsekükari khu zhühkhe thi ma kütsünari müzhe nü nyi kükhu nta thuoüji nyi küükhu luo, thitü aküzehwa nga thi anyupewa nga azhühkho küsü müzhe wie naveh,” ti küza.

¹⁵Jüti sanü juhthsü kükhu rüzhehwa kükhake arülovü pohvü juhthsüzhehwa tü akülu turu nü külüwute tewa; münüleh vünüh rüne küju anyih kümjie vünüh külüwu pehtewa.

¹⁶Jüti sanü mükütuo wiethuoh nüh arülo vü thuoüji akülu nüh külüwute thi arüzavü thuoüji akülu anyih atso kümjie küsa ngunguti.

¹⁷Küsie nüh aküluwa tü ajuhthsüwa rügivü nüh vitekuo naveh ünüh Israel nyiri tü tsezhu tewawati, thi küsie nüh aküluwa turu naveh ünüh Israel nyiri tü kürünapewa sa leleti.

¹⁸VÜWA nüh azhükütsü vünüh Israel nyiri tü tsezhuzhuti, thi küsie nüh VÜWA nüh aküpeh zhütsü naveh ünüh kürünape sanaveh, akülu nüh küthake juhthsüzhehwa rügivü peh naveh ünüh jüküju nü mari tü müküse nüh mari kürünape vü peh naveh.

¹⁹Ma mpa nüh rülo hothake aküluwa tü pehtewa wie ketünga Israel nyiri tü VÜWA zhü küna nü kütsezhuwa nyu.

²⁰Küsüsükeri nü aküluwa tü rülo pike mpa pehpehti, thi mari tü VÜWA zhüwa müzhe nü rülo pike mpa peh nü tewawati.

²¹Thitü küsüsükeri thuoüji aküluwa tü münüleh vünüh rüne küju mpa pehpehti, thi mari tü tsezhutewawati, nyutü küsüsükeri nü rülo küsü thi rüza küsü ti mpa peh nü tewawati, thi mari nga jüma müzhe nü tewawati.

²²Ma mpa nüh rülo künyiluo, nyutü asa küsüluo nyutü suotewaluo juhthsüzhehwa rügivü küpeh küju nü mari kürünape vü pehpeh huo naveh; thitü vitekuo thuoüji mari tü tsezhu tewawati.

²³VÜWA nüh azhükütsü rügivü nüh mari tü kürünape sa peh, thi VÜWA nüh azhükütsü rügivü nüh tsezhuzhuti; VÜWA nüh Mosa vü azhükütsü müzhe nü mari tü VÜWA zhü kütsü künanati sa.