Read Pochuri Naga MIKA 2 Bible Online

MIKA 2 - Pochuri Naga bible

MIKA 2

¹Thari nüh mari aze rügivü nüh kümro kümsüküsa thi kümsü sa veh ünüh ehzai! Arüne athohle ru thuoüji mari nüh jüma sa, küpakenühnyunü jüma tü mari kükhra vü pehküveh kenüh.

²Mari tü azhuhri müngu thi jümari prüvi; azheh ri vitewa; mari tü azheh avüri thi azheh, anyiri thi mari akari mürü.

³Jükenüh hakümjie küza veh: khinyi thuoüji hi tü atharuo hamawa vü noh kuri müküvizhura aro kümsü küsü thse vehthuoh; thi nohri tü kürhie sanü nü aleh kütsewa nyu, jüma tü atsotho kümsü küsü sana küveh kenüh.

⁴Jüma rülo vü mari tü nohri vü küriesa azah sanaveh, thi khielota kürümuo kürera sanaveh, thi, hiri tü poka khehm wiethuoh; ma nü eh nyira soupe khaphrüm tüthuoh; mo kümjie matü hi vü nüh vitewa thuolo! Hiri mükünongüri vü eh zhuri küsoutsü khemthuoh;

⁵Jükenüh VÜWA kümhu vü nohri nyi küsü nga nüh aküze vünüh aliwa küjake münyie nüh sanaveh.

⁶“Mü sosie tüm,” mari nüh jüüta sosie “nyi küsü nga jükümjie küsa zanyori küsosie vüh nyu; saküüzükrü tü hiri vü ruküjuwa nyu.”

⁷Hamatü ha üta küza mühieveh ülo, O Jacob zhehlowa? VÜWA Sietse tü mküzhike thuoh ülo? Hamari tü ma nüh küsari ülo? Eh zhüri tü müshe nü kütseri vü kümhie müsa ülo?

⁸Thitü noh tü süra nü mükünongüri küsü üta vünüh eh nyiri siesaluo luo; luovehrüzi küveh vünüh noh tü akruzhuküüzhawa fojam tüluo, arie kümshe mükünyie alenoshe nü rukari küwari vünüh.

⁹Nohri nüh eh nyi nyimzari mari nüh külo azhehri vünüh zhezhu küjari; ma tsa kürünguori vünüh nohri nüh küsuokürho eh kütholathovü vi teküwa.

¹⁰Süra nü waluo; hamatü kümnyie azhie mükünyu kenüh, mükümtse kenüh amüsheküsü küzoriezosa küsü vi nü zoriem.

¹¹Mükütüküzü wuori nüh kürütso küzhüja phratezhu nü, “Hi nüh nohri vü akhah thi kümzo küzhu zhü sosie naveh,” ta küza nü, ma tü anyi hamari kenüh küsosieri sana!

¹²Hi nüh nohri vizhuh tsa wie naveh, O Jacob, hi nüh Israel rhoküvehri vizhuh naveh; nyihzhü zheh vü nyihzhü küvizhuh kümjie hi nüh mari kürü sanaveh, nyihnyih riekhuo ma kümrhuope vü küpeh kümjie; jüma tü anyiri sie mühie naveh.

¹³Vephie zhu te küwa watü mari atü vü tewa naveh; mari tü vehphiezhu tewa nü akheriwa kari tewa naveh; jümawa vünüh shutewa naveh. Mari kajiwa nüh mari atüvü tsetewa naveh, VÜWA nüh mari alü sanaveh.