Read Pochuri Naga NAHUM 1 Bible Online

NAHUM 1 - Pochuri Naga bible

NAHUM 1

¹ Nineveh kenüh azhüle küsü. Nahum Elkoshwa kümohtsa lasipha.

²VÜWA thuoüji noküüma Saküüwuowa[1] thi ashewi sa, VÜWA thuoüji ashewi sa thi khielota arükümthowa; VÜWA thuoüji ma mükünongüri vü amüthoh sa, thi ma mükünongüri kenüh arükümtho sa.

³VÜWA thuoüji shita arümshu thi akükhra ji, küsüküsü nga satü VÜWA nüh künakhie sakümtse naveh. Ma leh tü nyiazamrhü thi tsomrhü vü peh veh, thi aküluri tü ma mpha zhi tho.

⁴Ma tü juhküji vü shüke nü jüma sa küngengeti, ma nüh arüku aveh saküngengeti; Bashan thi Karmel tü washütewa veh, Lebanon küwu tü kre tewa veh.

⁵Aküzhiri tü ma tü vü küzhüzhüti, küzhihori tü lia tewaveh; azhih tü ma tüvü jakümsü mümti, azhih thi ma nyie vü kürhori aveh.

⁶Thawa nüh ma rüküshu tüvü tsiera nalo? thawa nüh ma rüküshu küsa vü küzhike ra na lo? Ma rükümtho tü anyih kümjie küshozhu veh, thi ma nüh alokrüri tü zokhuorie veh.

⁷VÜWA tü mühiem, küsüro rülo vü shiekukümzhowa; ma vü kümnyiri tü ma nüh thsü veh.

⁸Thitü ma küruoluori thuoüji anyuoküza kümzhiechüa nüh ma nüh asehkhe sajumtü naveh, thi aküzo vü ma mükünongüri zhewathse naveh.

⁹Noh tü VÜWA vü mowa saveh lo? Ma nüh asehkhe sajum naveh; ma kümari vü ma tü amüthoh künyikeri küviwa nyu.

¹⁰Mari tü arüzhü küülürü thi khuozhikuo küsü kümjie, mari tü kümsheri kümjie zoriem naveh.

¹¹Nyi küsü, VÜWA vü kümsü küüro küsa thi mküle zhüphie kütsü noh vünüh shumru ülo?

¹²VÜWA nüh hakümjie küza veh, “Mari mpa nüh müzho thi zhi wie ketünga, mari tü vijam nü tewa naveh. Hi nüh nohri müshe sakümnonman thuoh wie ketünga, hi nüh jüüta küsalewa nyuthuoh.

¹³Thi hi nüh noh vünüh ma thsohkhuonyi zokhuomtü naveh thi nohri küphehtewa zothuoriemtü naveh,” ti küza.

¹⁴Noh kenüh VÜWA nüh azhütsümthuoh: “Noh nyo tü küpeh huo müsarathuoh; noh nyiazara zheh vünüh hi nüh atso khrüke küsa thi atso lüküsa ti rehriem naveh. Hi nüh noh rüku sa naveh, küpakenühnyunü noh tü momaküsa kenüh,” ti küza.

¹⁵Azhühwa kümhie vikütsewa, kürükümhie küzhüchühwa mpha aküzhi rügivü noluo! Noh khuri saluo, O Judah, noh küphrahzhuzhüri saju luo, küpakenühnyunü kümsüküsa tü piketü ru noh sie küsaluo lewa nyuthuoh, ma thuoüji zorie kümkhem wiethuoh.