Read Pochuri Naga NAHUM 2 Bible Online

NAHUM 2 - Pochuri Naga bible

NAHUM 2

¹Küzoriewa tü noh vü tse thuoh. Kümkhrati huote luo; lehkhuji note luo; noh küshih tseke luo; noh kükhra aveh vizhuh luo,

²küpakenühnyunü VÜWA nüh Jacob küthola tü Israel küthola kümjie satsüle küveh kenüh, küzorieri nüh mari sakürütsom thi mari tsuona zoriemthuoh.

³Ma nyi kümzhora johuo tü müru, ma rienyiri tü kümüru thsümnyi vü. Rawuh khekari tü sezhuh nü külieke vü anyihzhu kümjie kürieh.

⁴Rawuh khekari tü alerari vü arükümtho, mari tü alehjiri vü küchiluo nü zhütsuo zhükhru; mari tü anyihthi kümjie kürieh mari tü atsohrie kümjie küphrieh

⁵Aküjiri tü jiluo thuoh, mari küwa vü mari tü müshü, mari tü prelepreza ashieku Vüwa, kütotewa sakesam thuoh.

⁶Arühku kheriri tü samthuoh, kajizheh tü luovehzamthuoh;

⁷ma müsüvühri tü phreja kürütsom nü siete wathuoh, ma siepevühri tü krieveh thuoh, mükhrietüri kümjie rümuoveh thuoh thi mari tüso fevehthuoh.

⁸Nineveh tü kümsheke küsü kümjie ma juh tü litewa veh. “Peh luo! Peh luo,” ta mari nüh zie; thitü nyi küsü nga müsüle.

⁹Rakasa prüvi luo, suna prüvi luo! Künyirhie tü asehkhe münyie luo, nyutü künyirhie zanyo amekürhe aveh tü sehkhe münyie luo.

¹⁰Küüzoküza! Küüzoküza jaküm thi ferieküm! Luoveh thasütewa thi akho tü küshüh satewa, aküshih aveh süzhitewa!

¹¹Amiewuora ku khiela pehveh lo, amiewuo tsara küpieku khiela peh veh lo, amiewuowa tü ma shie khiela nüh viru lo, ma tsari tü nyi küsü nga nüh küüjakünya münyie nüh khiela pehveh lo?

¹²Amiewuowa tü ma tsari kenüh ashie shohrietsü thi ma wieri kenüh akhuru künyothuo tsü; ma tü ashie nüh ma küpie ku pro thi asa küshohrie nüh ma ku pro.

¹³Halie, hi nüh noh sie wuluo veh, thi hi nüh anyikhu vünüh noh rawuhkhekari tsom naveh, thi anyuchuwa nüh noh miewuo aküzahri zoriejam naveh; hi nüh azhih vünüh noh shie rehriemtüu naveh, thi noh zhühleküvüra jikhi tü küüna ra lewa nyuthuoh, ta thopahiri VÜWA nüh küza.