Read Pochuri Naga HABAKUK 1 Bible Online

HABAKUK 1 - Pochuri Naga bible

HABAKUK 1

¹Saküüwuowa[1] azhüle küsü Habakuk setsaküthsüwa nüh küngu.

²O VÜWA, küthakelenga hi tü küükra kenüh zie na lo, thi noh tü müküna nüh sana lo? Nyutü “Küvürie” kenüh noh vü zie na lo, Thi noh tü müküloletü nüh sana ülo?

³Noh tü mokenüh hi müküleh saküüngu lo thi küsüro küüno lo? Küzoriezosa thi küvürie tü eh tüvü pehveh thuoh; küsaluo thi küüproluo shuru.

⁴Jükenüh khonyowa tü küzhikülam thi kümshowa tü piketü atüvü mütsezhu, küpakenühnyunü kümsüküsanüh künyitsa mükieshemthuoh, jükenüh künyitsa tü mülele mthuoh.

⁵ Akuohjiri azavü noküze luo; ngo thi ngothse luo, küza wie ketünga nohri nüh mükütsotü küüroh noh rülori vü hi nüh sakieveh kenüh.

⁶Küpakenühnyunü halie, hi nüh Khaldeari saküsüra veh thuoh, akükha thi preratsarmie akuoh küjiwa, azhih aveh vü tseküwa wa, mari azhi mükünyu arhieri revi nta.

⁷Mari tü kükrüshike thi kükrüküngori; mari kümsho thi azhükünyi tü mari vü mpa nüh shu.

⁸Mari rawuhri tü amie tü wa nyiehvü nüh küphrüküle, münüleh jiperü nyiehvü nüh aheze; ma rawuhnyiri tü rhieza nü tsezhu. Ah, ma rawuhnyiri tü kületsuo vünüh ru; mari tü zorie nta aluomü kümjie prü nü the.

⁹Mari aveh nga küvürie kenüh ru; mari atüvü kümzhoh kuowa. Mari nüh aküsiküsari ashünyi kümjie vizhuh naveh.

¹⁰Mari nüh kajiri riesarienyi, thi takrüri vi saküzhie. Mari tü shieku kümzhori aveh nokükhri, mari nüh azhih chizhuh nü vi na küveh kenüh.

¹¹Mari nüh amürhü kümjie chi nü tewa thuoh, kükhieh nyiri, thawa kükhra nü mari nyiaza lo!

¹²Noh tü küsükürho küpehlawa nyu ülo, O VÜWA eh Saküüwuowa, eh kümtsewa? Hiri tü küsüwa nyu. O VÜWA, noh nüh mari tü ashih kenüh shiatsümthuoh; thi noh, O Lokrüwa nüh phrasosie kenüh mari vizhumthuoh.

¹³Kümsü no na küsa kenüh noh notha tü mülam thi müküleh münora nüh sam, noh tü mokenüh kütsotü mükünyieri no veh lo, thi kümsüküsari nüh ma nyiehvü künyitsari müzhuküm vü zota pehveh lo?

¹⁴küpakenühnyunü ajuhküji vü angari kümjie, atakrü münyie nüh zhukütse zanyori kümjie anyiri tü satsü.

¹⁵Müluokhu küsü nüh mari aveh nga ma nüh vizhu, ma nüh ma neh nüh alie vü mari nezhu, ma nüh ma neh lo vü mari vizhuh; jükenüh ma tü nyierakhruo thi riehu vehthuoh.

¹⁶Jükenüh ma nüh ma neh vü küsahthuo sa thuoh thi ma neh vü arheküüngu tso; jümari vünüh ma tü jürie nü rhoküveh kenüh, thi ma shie tü nyirhie.

¹⁷Thinü jüta thuoüji ma tü ma neh küürütso peh huom naveh ülo, thi küümze münyie wiethuoh nüh küsuokürho thopahiri rehthe pehwie na thuoh ülo?