Read Pochuri Naga HABAKUK 2 Bible Online

HABAKUK 2 - Pochuri Naga bible

HABAKUK 2

¹Hi nüh eh kütsiepe sanü noküze naveh, thi akhajie rügivü hi mpa nüh tsie naveh, thi ma nüh hi vü mowa küza naveh ünüh nopeh naveh, thi hi nüh kürüle kenüh hi nüh mowa rüle naveh.

²Thi VÜWA nüh hi rüle taji, Kümohtsa wa rhü luo; alokhie rügivü rhü kümtse luo, jüta thuoüji jüma küchieri tü vi zhüwa ra na küveh kenüh,

³küpakenühnyunü kümohtsawa tü ma tsothowa huo wie; jüma tü asehkhe küju pre wie, jüma tü küriewa nyu. Mükütüküzü jüma tü küzhihke kümjie thuoüji, jüma huo luo; jüma tü ru tsanaveh, jüma tü kümnüwa nyu.

⁴ Halie, thawa kürholi nüh ma vü mümsho nüh sazih naveh, thitü künyitsawa thuoüji ma kütsotü vünüh rho naveh.

⁵Jüma nyievü nga akhah thuoüji romizhi sa; küwukhawurie nyiri thuoüji müpehra, Ma müwikümka tü küsüra zhie üta müza; aküsü kümjie ma tü piketü aküma münyie. Ma tü ma mpa ma kenüh akuoküji aveh sa zhuh, thi ma mpa ma zhi üta anyiri aveh vizhuh, ta rületsü.

⁶Hamari aveh tü ma vü küriesa-rienyi müsatüm navehlo, thi ma vü, “Ma zhi mükünguwa vi nü sakümproke küsawa kümhiera kütsüna, küthakelenga shieteküsari vi nü noh mpa noh khuo sa küvüpe na lo?”

⁷Noh wi küvüri tü zhürüluo küsürawa nyu ülo, thi choküsürari tü noh saküükhewa nyu ülo? Jüta thuoüji noh tü makeri’a nüh prüvi teküwari sam nathuoh,

⁸küpakenühnyunü noh nüh akuoküji hozake prüvi teküwathuoh kenüh, anyi kümtori nüh noh müzhühvi tewa naveh, anyira züh kenüh thi azhihwa küvürie, anyujiri thi jüma lovü arhieri aveh kenüh wie.

⁹Ma zheh kenüh kümsü vünüh künyie wa vü, kümsie vü ma phra sake nta, kümnomna küru vünüh tote nta küsawa, kümhie küsara kütsüna.

¹⁰Anyiri hozake kürehthe vünüh noh zheh vü küzükrü vi ru thuoh; noh tü noh kürho pokamthuoh,

¹¹küpakenühnyunü alohri tü azie vünüh zie zhu na, thi athso zie thi amruo vü nüh rüle naveh.

¹²Azüh vi nü nyuji küsari vü, thi akükhieh vünüh anyuji küvizhuri vü kümhie küsara kütsüna!

¹³Halie, anyiri tü anyih kenüh kürohmnomna küveh tü VÜWA vünüh nyu ülo, thi zanyoküsü nga mükünyu kenüh akuoküjiri tü münomveh ülo?

¹⁴Ajuh nüh juhküji küluwute küveh üta VÜWA kütholathovü zanyoküthsü nüh azhihwa tü pro naveh.

¹⁵Ma zhephruwa vü rükümtho ahuo küüzhu nü mari küzükrü küüre nta saküümshewa vü kümhie küsara kütsüna!

¹⁶Noh tü kütholathovü müthoh vünüh momakütalo vi noh kümlie sana. Noh mpa nüh zhu nü puolepuoza luo! VÜWA ke azhie wuovü pehküvehwa tü noh mükiele ru naveh, thi küzükrü tü noh kütholathovü rügivü ru naveh!

¹⁷Küvürie Lebanon vü küsawa tü noh külüwute naveh; samwa nüh küzoriezosa wa nüh noh sakümzhoh naveh, anyira züh thi azhih küvürie, anyujiri thi jümari vü arhieri kenüh.

¹⁸Anguo tü mo künyie pehveh lo, jüma tü anyiri nü saveh, amrü atso, akürie küsosie nyu ülo? küpakenühnyunü azhümküphrara anguo küsawa tü ma mpa nüh küsa vü tsotü küveh kenüh!

¹⁹Athsoh zanyowa vü, süraluo; azhümküphrara aloh küsü vü, süratsie luo, ta küüzawa kümhie küsara kütsüna! hamatü küthsükütsü tsüra naveh ülo? Halie, jüma tü suna thi rakasa nüh küzhutemthuoh, thi ma vü piketü arütho münyie luo.

²⁰Thitü VÜWA thuoüji ma kümtse kükhurüzheh lovü pehveh; azhih aveh tü ma tüvü zoti küüpeh luo.