Read Pochuri Naga ZEFANIA 1 Bible Online

ZEFANIA 1 - Pochuri Naga bible

ZEFANIA 1

¹ VÜWA zhü Kushi atsa, Gedalia atsa, Amaria atsa Hezekiah atsa Zefania vü Judah Kajiwa Amon atsa Josiah rülo vü küru.

²“Hi nüh azhihwa nyieh vü nüh azanyo aveh ra kümtsem naveh,” ta VÜWA nüh küza.

³“Hi nüh anyiri nga thi asamwa nga ramnaveh; hi nüh amüürhü vü prükütse müwari thi jühküji vü angari nga ramnaveh. Hi nüh kümsüküsari khamlelem naveh; hi nüh azhihwa nyiehvü nüh anyi kürho zoriem naveh,” ta VÜWA nüh küza.

⁴“Hi nüh Judah vü eh kethsuoke naveh, thi Jerusalem vü arhieri aveh; thi hi nüh azhie hala nüh Baal kümtori thi atsorhekükhurü anyo vünüh anavüri zoriem naveh;

⁵thari nüh aluomuo rügivü nüh atülüra thopahiri küngie tsuo naveh ünüh; thari nüh VÜWA vü küngie tsuo nü küüshie tü Milkom vünüh küshie naveh ünüh;

⁶thari nüh VÜWA se künyi vünüh asevü sülem naveh ünüh, thawa nüh VÜWA mphah nyutü ma vünüh zanyo mükürü nüh sana veh ünüh hi nüh zorie jam naveh,” ti küza.

⁷VÜWA Saküüwuowa[1] tüvü zoti peh luo! küpakenühnyunü VÜWA rülo tü shenyi kümthuoh kenüh; VÜWA nüh küsahthuoh küsü küchemthuoh thi ma küzehri sakümtsemthuoh.

⁸Thi VÜWA küsahthuoh rülo vü: “Hi nüh aküjiri thi kajira tsari thi mari mpa nüh akuoh küpara asürie küsari aveh hi nü kümnomna tsü na.

⁹Jüma rülovü akheji rügivü küjokeri aveh, thi mari küsosiewa zheh vü küvürie thi akürie nüh saküüprori hi nüh kümnomna tsüna.”

¹⁰“Jüma rülo vü,” VÜWA nüh küüza “Anga kheri vünüh akükrie künarana, Akünyia wa vünüh akükrie küsü, küzhiho vünüh tsuotsa küru jikhi kümsie küsü künara naveh.

¹¹Krieluo, O Mortar vü kürhori! küpakenühnyunü asüküsari aveh tü mükünyiethuoh kenüh; rakasa küütori aveh tü vija khehmthuoh.

¹²Jüma tsotho vü hi nüh alati vi nü Jerusalem phah naveh, mari mpa müshe kühuophie kütseri, mari ma luovehri vünüh, ‘VÜWA thuoüji kümhie küsa wa nyu, nyutü kümsü nga küsawa nyu,’ ta küüzari vü hi nüh kümnomna tsüna.

¹³Ma tsokrüri tü müzhüvü tewa naveh, thi ma zhehri tü jaküümsüm naveh. Mari nüh azheh sa wie ketünga, mari nüh kürhiewa nyu; mari nüh rhelivi shie wie nga, mari tü jümari vünüh akhah vi küzhuwa nyu,” ti küza.

¹⁴VÜWA rülo küjiwa tü shenyimthuoh, shenyi thi mütsatso nüh pre tse; VÜWA rülo jikhiwa tü kham, anyi kümzhori tü zie kümsie veh.

¹⁵Arükümtho arülo tü jüma rülo, luovehküna thi amüsheküna rülo küsü, küzorie thi küzoriechahke rülo küsü, aküzo thi kütsozo rülo küsü, akülu thi küzomophoh rülo küsü,

¹⁶anyujiri shiekukümzho vü thi arieküsape kümsiewa vü atütü kükhu thi arie küzie rülo küsü.

¹⁷Hi nüh anyiri vü asheküsü viru naveh, jüti sanü mari tü küüjuri kümjie küütse naveh, küpakenühnyunü mari nüh VÜWA vü khiemuoküm kenüh; mari azüh tü azhitho kümjie, thi mari asazhü tü asü kümjie küshozhu naveh.

¹⁸VÜWA rükümtho rülo vü mari rakasa nga nyutü mari suna nga nüh mari küvizhurawa nyu. Ma noküüma rükümtho anyih vünüh azhih aveh tsoriem naveh; küpakenühnyunü aveh vünüh ma nüh zhürüluo azhih vü arhieri aveh asehkhe samtü naveh.