Read Pochuri Naga ZEKHARIA 1 Bible Online

ZEKHARIA 1 - Pochuri Naga bible

ZEKHARIA 1

¹ Darius mahvi künyiawa asa tüzeawa vü VÜWA zhü Iddo atsa Berekhea atsa Zekharia setsaküthsüwa vü ru taji,

²VÜWA tü noh pari vü arüshu shehmthuoh.

³Jükenüh mari vü küza luo, thopahiri VÜWA nüh hakümjie küza veh: Hi vü sühleraluo, ta thopahiri VÜWA nüh küza veh, jüta thuoüji hi nüh nohri vü sühleru naveh, ta thopahiri VÜWA nüh küza veh.

⁴Atükhu vü setsaküthsüri nüh mari vü küzie noh nyiri kümjie müsa tümluo, “Kümsietsa VÜWA nüh hakümjie küza veh, nohri kümsü lehkhuji thi nohri kümsü küsa vünüh sühle luo.” Thitü mari nüh müküna nüh sam nyutü hi vü mükükhe nüh sam, ta VÜWA nüh küza veh.

⁵Noh nyiri tü khievü

⁶Thitü eh zhüri thi eh zhühkhe hi nüh eh siepe setsaküthsüri vü azhükütsü tü noh nyiri mürete ülo? Jüti sanü mari tü luovehkhaphrü taji, thopahiri VÜWA nüh hiri lehkhuji thi küürohküliri küthser vü nüh hiri no nta küsa kümjie ma nüh hiri vü samthuoh, ti küza.

⁷Shebat ta küsa asa türaluokewa rülo mükeke nü müzü, Darius mahvi künyiawa vü VÜWA zhü Iddo atsa, Berekhia atsa Zekharia setsaküthsüwa vü ru; thi Zekharia nüh,

⁸halie hi nüh arüza vü ngu taji, nyi küsü tü arawuh kümru küsü rügivü tse veh! Ma tü anyuo athsoh aza vü tsie veh; thi ma se vü thuoüji arawuh kümru, kürwuo thi kümji ti tsieveh.

⁹Thinü hi nüh, “Eh vüwa hamari tü mowa lo?” ti küna. Rügihzhüle hi sie jüle küvehwa nüh hi vü, “Jümari mowa nüh hi nüh noh kütsanaveh,” ta hi vü küza.

¹⁰Jükenüh anyi athso azavü tsie küvehwa nüh, “Hamari tü azhihwa küünote nta VÜWA nüh küzeri,” ti rületsü.

¹¹Thi mari nüh VÜWA rügizhüle athso aza vü tsieküvehwa vü, hiri nüh azhihwa küzhu notewa thuoh, thi halie, azhihwa aveh tü zota kümngievü pehmthuoh; ta rületsü.

¹²Thinü VÜWA zhüle wa nüh, “O thopahiri VÜWA, noh tü küthakele nga Jerusalem vü thi Judah nyujiri vü ti noküümze münyie nüh sana lo, jümari vü noh mahvi ha rürake arükümtho thuoh,” ti küza.

¹³Thi VÜWA nüh rügizhüle hi siejüle küvehwa vü lozhesheh thi luoveh saküünyi zhü vi rületsü.

¹⁴Jükenüh hi sie jüle küveh zhülekümhiewa nüh hi vü, “Zie luo, thopahiri VÜWA nüh hakümjie küza veh: Hi t” Jerusalem thi Zion kenüh khielota nokümamthuo.

¹⁵Thi hi tü akuoküji rüzi nü pehküvehri vü eh rüshu shemthuoh; küpakenühnyunü hi nüh arüshu sheh müküveh vü mari nüh aküsüküwuowa saküzhake wie.

¹⁶Jükenüh; VÜWA nüh hakümjie küza veh, hi tü rüthaküna vi nü Jerusalem vü sheleruthuoh; eh zheh tü jüla sa naveh, ta thopahiri VÜWA nüh küza veh, thi Jerusalem rügivü küüte liwa shothso küze naveh.

¹⁷Zie le luo, thopahiri VÜWA nüh hakümjie küza veh: Eh nyujiri tü kütsarhienyurhie nüh müzhiechü le naveh, thi VÜWA nüh Zion luovehsakürünyi le naveh thi Jerusalem rüka le naveh, ti küza üti küza.

¹⁸Jüsevü hi nüh eh notha toke nü no, thinü arütsü müzü ngu!

¹⁹Jüti küsa vü hi nüh rügizhüle hi sie jüle küvehwa vü, “Hamari tü mowa lo?” ti küna. Thinü ma nüh hi vü, “Arütsü hamari tü Judah, Israel thi Jerusalem saküvorie kümri,” ti rületsü.

²⁰Jüti küsa vü VÜWA nüh hi vü atsüvü vi küüroh nyiri müzü hi kütsa.

²¹Thinü hi nüh, “Hamari tü mowa sa nta tse lo?” ti küna. Ma nüh, “Arütsü hamari tü Judah saküvoriem nü nyi küsü nga nüh ma lü mükhake nüh sam; thi hamari tü mari sakümzhoh nta tse, mari arütsü khroke nü Judah saküvorie nta küsa akuoküjira rütsü vija nta,” ti küsa.