Read Pochuri Naga ZEKHARIA 4 Bible Online

ZEKHARIA 4 - Pochuri Naga bible

ZEKHARIA 4

¹Jüsevü hi sie küjüle rügizhülewa tü ru le nü nyi küsü aküzeh vünüh saküüsüra kümjie hi saküsüra.

²Thinü ma nüh hi vü, “Noh tü mowa ngu veh lo?” ta küna. Hi nüh, “Hi nüh nguküveh thuoüji, aveh suna nüh küsa alati, jüma rüguhvü akhu küsü peh, thi jümawa rügivü anyihku türü peh, anyihku küsüsü rügivü apomie türü pe, thi jümari tü jümara rügivü peh.

³ Thi jüma kütuo vü Olive rhu künyi pehveh, küsüsü mazhie wuovü thi küpawa thuoüji jüma azhu wuovü,” ti pehveh ti küza.

⁴Thi hi nüh hi sie jüle küveh rügizhülewa vü, “Hamari tü mowa lo, eh VÜWA?” ti küna.

⁵Thinü hi siejüle küveh rügizhülewa nüh hi vü, “Hamari tü mowa nüh noh tü müthsü ülo?” ta rüle küza, hi nüh, “Nyu, eh VÜWA,” ti rületsü.

⁶Jüsevü ma nüh hi vü, VÜWA zhü hamatü Zerubbabel vü kütsü: Akükhra vü nga vüh nyu, nyutü kümzho vü nga nüh nyu, thitü eh Sietse vünüh, ta VÜWA nüh küza veh.

⁷Noh tü thawa lo, O aküzhi küjiwa? Noh tü Zerubbabel atüvü nüh kütake küsü sam naveh; thi ma nüh küzhihotsuwa aloh viru nü zie taji “Külozhi, külozhi ta ma vü sanaveh,” ti küza üti küza.

⁸Jüma nyievü nga VÜWA zhü tü hi vü ru taji,

⁹“Zerubbabel ake tü azheh hama ajupe vü thsemthuoh; ma ke nüh jüma küsaju nga sa naveh. Jüta hi tü thopahiri VÜWA nüh nohri vü küze ta küsa thsü naveh,

¹⁰ küpakenühnyunü thari nüh zanyo kütazüri rülowa mam naveh ünüh nyierakhruo naveh, thi Zerubbabel ake vünüh kürhevüh ngu naveh. Türü hamari tü VÜWA notha, jüma tü azhih aveh vüpe,” ti küza.

¹¹ Thinü hi nüh, “Latipe azhie wuovü thi azhu wuovü küpeh Olive rhu künyi tü mowa lo?” ti küna.

¹²Jüta küüna vü akünyiawa hi nüh ma vü, “Olive rhu tsuona ta künyi tü mowa lo, avüjuh ma vünüh küshozhu küveh suna likürupe nato vü pehküvehwa tü mowa lo?” ti küna.

¹³Ma nüh hi vü, “Noh tü hamari müthsü ülo?” ta küna. Hi nüh ma vü, “Nyu, eh VÜWA,” ti rületsü.

¹⁴Thinü ma nüh, hamasü tü thseküm azhih ajü VÜWA kütuoh vü kütsieri, ta rületsü. VÜWA kütuoh vü kütsieri, ta rületsü.