Read Pochuri Naga ZEKHARIA 7 Bible Online

ZEKHARIA 7 - Pochuri Naga bible

ZEKHARIA 7

¹Kajiwa Darius mahvi müzüawa, asa tohuwa, jüma tü Khislev asa rülo müzü vü VÜWA zhü Zekharia vü ru.

²Jüti küsa vü Bethel nyiri nüh Sharezer, Regemmelek thi ma nyiri ti VÜWA küütso khuo üti küze,

³thi thopahiri VÜWA zheh navüri thi setsaküthsüri vü khuo taji, “Hi nüh mahvi hozake saküru üta hi tü asa münga wa vü mürümuo üji mümhie ülo?” ti küna.

⁴Jüsevü nga thopahiri VÜWA zhü tü hi vü ru taji,

⁵“Azhih jüla nyiri aveh vü thi anavüri vü, nohri nüh amahvi ha rürake asa münga wa thi türüawa vü assa sa thi küku ti küsa jüma tü eh kenüh ülo?

⁶Thi nohri nüh tsa thi küzhu vü nohri tü nohri mpa nohkeri nüh tsa thi zhu ti müsasati ülo?

⁷Jerusalem tü ma nyujiri nüh ma mükiele nü rhie thi tsarhienyurhie, Zhiese thi azhihküsaji tü rhie ti thuoüji, jüma tü setsaküthsü atükhuri nüh VÜWA zhü küzhühchü nyu ülo?” ta küza.

⁸Jüsevü VÜWA zhü Zekharia vü ru taji,

⁹“Kümsietsa VÜWA nüh hakümjie küza veh, küzhütsa ashi satsüluo, ma nüri küsüsü vü khukekümhie thi noküümze kütsaluo,

¹⁰tünyivühri, apa mkünyieri, aküpriri, nyutü kümkhuori mümrütümluo; thi nohri luoveh lovü nüh nohri küsü nga noh nü kümsü müüshe tümluo,” ti küza.

¹¹Thitü mari tü müküna nüh sanü aluoveh kükho safü küprüketewa, thi mükünara nüh sa na küsa kenüh mari khüna küwutemthuoh.

¹²Setsaküthsü atüri nüh ma Sietsewa vünüh thopahiri VÜWA nüh küüze akhonyo thi azhüri müüküüna nüh sa na küsa kenüh ma luoveh ri tü sakükhom tü thuoh. Jükenüh thopahiri VÜWA vünüh arükümtho aküji ru.

¹³Hi nüh küji vü mari nüh müküüna üta, mari nüh hi küji vü hi nga küünawa nyu, ta thopahiri VÜWA nüh küza,

¹⁴jüti sanü hi nüh mari tü mari nüh müküthsü akuoküjiri aveh azavü nyiazamrhü küsü vünüh saküvoriemthuoh. Hakümjie vünüh mari nüh jaküm azhihwa tü küüzomthuoh, jükenüh nyi küsü nga kütsuo kükhru müsanüh sam nü azhih akülowa tü küüzo