Read Pochuri Naga ZEKHARIA 9 Bible Online

ZEKHARIA 9 - Pochuri Naga bible

ZEKHARIA 9

¹ VÜWA zhü tü Hadrak azhih vü rhoveh thi Damaska rügivü peh naveh, küpakenühnyunü Aram nyujiri tü VÜWA zhi thi Israel akuoküjiri nga wiethuoh;

²Hamath nga, jüma sie mürüke küveh mari mpa nüh mütsa sheh wie ketünga Tyre thi Sidon nga.

³Tyre tü ma mpa nüh mazhe küsü sa, thi azhitho kümjie rakasa sakümproke, thi alera vü atsüne kümjie suna sakümproke.

⁴Thitü halie, VÜWA nüh ma zhi aveh rhojamtü naveh thi ma künyirhie ajuhküji lovü müzhüjakem naveh, thi ma tü anyih nüh zoriem naveh.

⁵ Ashkelon tü jüma ngu nü krü naveh; Gaza nga, thi amüsheküna vünüh kürüthuom naveh; Ekron nga, küpakenühnyunü ma küluozhe tü küphrü kümthuoh kenüh. Kajiwa tü Gaza vünüh pokahm naveh; Ashkelon tü mürhie nüh sam na thuoh;

⁶virükürho nyiri tü Ashdod vü kürho sanaveh; thi hi nüh Filistin kürhiezarhiechiri tü asehkhe samtü naveh.

⁷Hi nüh ma züh tü ma po vünüh vijam naveh, thi ma ha azhievü nüh ma kükre vijam naveh; thi ma nga hiri Saküüwuowa kümto küsü sanaveh; ma tü Judah vü ajünü küsü kümjie sanaveh, thi Ekron tü Jebusari kümjie sam naveh.

⁸Jüti sanü hi tü akühuori küsü üta eh zheh vü kürünape sanaveh, jüta thuoüji nyi küsü nga kütsuokükhru müsara thuoh; kümrüri küsü nga nüh mari zhü kari küwa le nyu thuoh, küpakenühnyunü khinyi thuoüji hi nüh eh notha nüh ngu küveh thuoh kenüh.

⁹ Nyierakhruo küjisheh luo; O Zion tsavühwa! Zie kümsie luo, O Jerusalem tsavühwa! Halie nohri kajiwa tü nohri vü tsethuoh ünüh; küchara thi kükhra rawa tü ma, sakürünyie nü rawuhküzahwa rügivü tse veh; rawuhvozah küsü rügivü nüh rawuhküzahwa rawuhzah küsü tse.

¹⁰ Hi nüh Efraim vünüh rawuhkhekawa vijamtü naveh thi Jerusalem vünüh arie rawuh vijamtü naveh; thi arieküsa lawih tü zoriemtü naveh, thi ma nüh akuoküjiri vü kütsathuo azhütsü naveh; ma kükhra küvi tü ajuhküji vünüh juhküji küju, thi Eufrates Rügu vünüh azhih küpote küju.

¹¹ Noh kenüh wie nga, eh küzhüthuozhü azühwa nohri vü pehküveh kenüh, hi nüh ajuhmkünyie küphieke lovü nüh nohri küsiküsari sakürüzihmtü naveh.

¹²Nohri shiehkukümzhori vü sheleteraluo, O küluozhe pehküveh küsiri; hi nüh künyikeri küzhi nosü nohri vü satsülena ti küzazhumthuoh.

¹³Hi nüh Judah tü eh lawih kümjie hemthuoh; hi nüh Efraim tü ma shüchu küsamthuo; hi nüh noh tsa nyimpari tü küro naveh, O Zion, noh tsa nyimpari rügivü nga, O Greece, thi arieküsara nyuchuwa kümjie noh küjehkemthuoh.

¹⁴Jüsevü thuoüji VÜWA nüh mari rügi vü terukütsam na thuoh, thi ma shüchu tü atsorie kümjie akuoshuwa; VÜWA Saküüwuowa nüh atütüwa khu naveh, thi nyiazamrhüri jikhi vü sierhüwa naveh,

¹⁵Kümsietsa VÜWA nüh mari tote naveh, thi mari nüh thumkavüh nyisa zorie thi nyinyam naveh; thi mari nüh akhah kümjie jümara züh zhunaveh, thi alokhe kümjie prom naveh, kükhurüpe jühkeri kümjie küüphuo naveh.

¹⁶Jüma rülovü VÜWA mari Saküüwuowa nüh mari külole naveh, küpakenühnyunü mari tü ma nyira riekhuo küsa kenüh; mari tü sitheloh kaji lüwe kümjie ma zhih rügi vü wie na küveh kenüh.

¹⁷Ah, jüma tü küzakele nga mühie thi küzakele nga zü nüh! Atsuo nüh vizari sa saküviza naveh, thi akhah kürüthe nüh rülavü.