Read Pochuri Naga MATHI 10 Bible Online

MATHI 10 - Pochuri Naga bible

MATHI 10

¹Jümasevü ma sehnyi türakünyiri ma vü jike tajinü, mükümtse sietseri zheja na küsa; thi küsaküna müküzüküzü aveh thi satsa vü mükümtse aveh sakümühie na küsa kükhra mari vü tsü.

²Thi povüküsa türakünyira nyo hamari: Powa thuoüji, Simon Pitor ta küsawa, thi ma nü Andrew, Zebedee atsa Jems thi ma nü Johan,

³Filip thi Bartholomi, Thomas thi Mathi akhrükükhrüwa, Alfia tsa Jems, thi Thaddaeus,

⁴Kananri Simon, thi Jisu rekütsüwa Iskariot Judas.

⁵Jisu nüh türakünyiri müjie küüze atüvü mari vü zhükütsü: nohri mükütsotüri azavü müwatümü, thi Samariari anyu küsü vü nga müwatümü,

⁶jütanyunü kümiekümü anyihzhüri azheh vü waluo.

⁷Thi nohri küwavü Rügi Kajipewa shenyimüthuoh nüh ti küsawa vi sosie waluo.

⁸Künari sakümühie tsüluo, küsüri sakürhotsüluo, wupie künari sakükutsüluo, sietsekümüsüri zhejamtüluo, nohri nüh ame müsanüh müjuju küngura kümüjie müjuju nyuri tsüluo.

⁹Nohri pesaku vü, suna, raka nyutü pesa küsü nga vü müwa tümü.

¹⁰ Nohri küzeh kütse chükhu, nyutü satsaküüzhuvüh künyi nyutü ajiküükruvüh nyutü akütsüh vimüwa tümü; küpakenühnyunü küürori thuoüji avo ngukütsale kenüh.

¹¹Thi nohri anyuküji vü nyutü anyuküza küsüküsü vü nga wa tü thawa nüh katoveh nüh phah tajinü nohri müjieteküwa küju nü jüla peh luo.

¹²Thi nohri azheh jülovü kütuvü tsia zhelo jüma tsüluo.

¹³Mükütüküzü azheh jüma katoveh üji nohri kümühiewa mari vü küwawa saluo, thitü mükato nüh samüthuoüji nohri kümühiewa shele nohri vü küruwa saluo.

¹⁴ Thi mükütüküzü nyi küsü nga nohri müsieke, nyutü nohri zhü müküna thuoüji azheh jüla nüh nyutü anyu jüla nüh tse sheletewa na küsavü nohri mpha vü azhitho wienga kükhajamü luo.

¹⁵ Hi nüh nohri vü küzatoke naveh, thuohtüvü ashiküsa küüna rülo vü jüma khuke nyia vünüh Sodom thi Gomorrah anyu khuke nüh küphra küürüzi naveh.

¹⁶ Halie! anyihnyih azavü nyihzhüwa küüze kümüjie hi nüh nohri küzeveh, jükenüh nohri amüre aro kümühie kümüjie saluo, thi mükhrietü khuke kümühie kümüjie saluo.

¹⁷ Thitü nohri nyiri vünüh azhüzhüluo, küpakenühnyunü mari nüh nohri re müzakümühu vü thse naveh, thi mari künazizhe vünüh nohri fe naveh;

¹⁸jümari thi mükütsotüri atüvü eh kenüh povü sataji küwa kenüh nohri sie atakrüri thi kajiri atüvü wa naveh.

¹⁹Thitü mari nüh nohri rekütsüvü mokümjie azhüphrana nyutü mowa phranaveh nüh ti müshemütsaza tümü luo, küpakenühnyunü nohri mowa müphraji mümühie nüh jüma tsothovü kheta nohri tsü naküveh kenüh.

²⁰Jümatü nohri mpa müphratenü nohri Pa Sietsewa nüh nohri vünüh phratenaküveh kenüh.

²¹ Thi ajienü mpa nüh ajienü re tsü nü küüfethe naveh, thi pawa nüh tsari re tsü nü küüfethe naveh, thi tsari nüh azahpari sie münoluongü nüh sataji nü mari re tsü nü küüfethe naveh.

²² The eh nyo kenüh nyiri aveh nüh nohri mürhü naveh, thitü küzhikewa sehkhe küjurawa nüh külole naveh.

²³Thi anyu küsü vü nyiri nüh nohri vü kümnomna tsü thuoüji tse anyu küpa vü tewaluo, hi nüh nohri vü küzatoke naveh, anyi Tsawa müjieküru tüvü nohri Israel nyuri vü wa müju khera.

²⁴ Sekünyiwa tü ma küsosiewa nyia vünüh ji müveh, nyutü ma vüwa nyia vünüh siepewa nüh ji müveh.

²⁵ Sehnyiwa tü ma Küsosiewa kümüjie thi siepewa tü ma vüwa kümüjie thuoüji mühiemü wiethuoh. Thitü mükütüküzü azhe vüwa wienga Beelzebul üta thuoüji azheh lo jüla küpe küpari thuoüji jüma nyia vünüh wienathuoh.

²⁶ Jükenüh nohri jümari mükrü tümü luo; küpakenühnyunü müküütsa müküüngu nta sate küsa zanyo küsü nga münyie luo, thi müküüthsü nta küthi küsa zanyo küsü nga münyie luo.

²⁷Aküzo vünüh hi nüh nohri vü küüzari küwie vünüh nohri vi nyuri vü küza luo; thi nohri khüna vünüh küünarari azheh rügi vünüh vi zia nyuri sosieluo.

²⁸Thi akümowa fetherawie ketünga sietsewa müküfetherari thuoüji mükrü tümü luo, thitü kümo nga thi sietse nga künyikhürü nyihsuozü vünüh küzorierawa krü luo.

²⁹Kakhrü künyi vü pesa küsü nüh sümüveh ülo? Thi Pawa kümüshe vünüh mükünyu nü jüri küsüwienga tsuotsa azhih vü müwara.

³⁰Thitü nohri ashe aveh wienga chiekhehmüthuoh.

³¹Jükenüh nohri mükrü tümü luo, küpakenühnyunü nohri tü kakhrü hozake nyia vünüh ame zhi küveh kenüh.

³²Thi thari nüh nyiri tüvü hi vi phrahzhu naveh nüh hi nga eh Pa rügivü küpewa tüvü ma vi phrahzhu naveh.

³³ Thitü thari nüh nyiri tüvü hi vi müphrahzhu nüh sa naveh nüh hi nga eh Pa rügivü küpewa tüvü ma vi müphrahzhu nüh sanaveh.

³⁴Hi tü azhih vü kürükümühiewa tsüna ru tünti mümüshe tümü, hi tü kürükümühiewa tsü nti müru thitü anyuchuwa tsü nti küru wie.

³⁵Hi küru thuoüji atsa nyimpawa nüh pawa siemütsarü nüh küsa, thi atsa rülawa nüh azawa siemütsarü nüh küüsa, thi ajünyiwa nüh anyiwa siemütsarü nüh küüsa nti küsa kenüh küruwie;

³⁶Thi ma mpa ma tsapatharuowa mpa nüh ma tsapatharuowa mükünongüri satewanathuoh.

³⁷“Anyi küsüküsü nga eh nyia vünüh ma pa ma za küümze savehthuoüji, ma nü eh senyi müsatse, nyutü anyi küsüküsü nga eh nyia vünüh ma tsa nyimpawa nyutü nyimzawa küümze saveh thuoüji nü eh senyi müsatse.

³⁸Thi anyi küsüküsü nga ma mpa ma khieluothsowa kha tajinü eh se münyi thuoüji eh senyi müsatse.

³⁹ Anyi küsüküsü nga ma satsa kürüpa nü vi ma zhi satekütsewa thuoüji kümiewie naveh, thitü anyi küsüküsü nga eh kenüh ma satsa mükürüpa nüh kümie kütsewa thuoüji ma satsa ngurale wie naveh.

⁴⁰ “Thi anyi thari nüh nohri sieke veh nüh hi siekewieveh thuoh, thi thari nüh hi siekeveh nüh hi Küüzewa nga siekewieveh thuoh.

⁴¹Thi nyi küsüküsü nga setsaküthsüri sieke thuoüji setsaküthsüri jisuo nguwie naveh; thi anyi küsüküsü nga künyi tsari sieke thuoüji künyitsari jisuo nguwie naveh.

⁴²Thi nyi küsüküsü nga ma mpa nüh rünguowie ketünga sehnyiri anyo vünüh küruvü aju küüji huo küsüwienga tsü thuoüji, hi nüh nohri vü küzatoke naveh, jüma piketü ma jisuo müpeh nüh küsawa nyu,” ti küza.