Read Pochuri Naga MATHI 11 Bible Online

MATHI 11 - Pochuri Naga bible

MATHI 11

¹Jütisanü Jisu nüh ma sehnyi türakünyiri vü azhü tsü kümüsevü jüla nüh tse mari anyu vü VÜWA zhü vi küza thi phrate tsü nti tewa.

²Jüti sapeküvehvü Johan nüh küsizhe lovü nüh Khrista küürori thsüra nü ma sehnyi wuori küzaküze.

³Thinü mari nüh ma vü, noh tü runathuoh ta küsawa thuoh ünü hiri tü küpa huo le naveh lo? ti küna.

⁴Thinü jütiküsavü Jisu nüh mari vü, “Nohri wa tajinü nohri nüh küünarari thi küngurari vi Johan vü küza luo.

⁵ Notha küüjuri nga zanyo nguravehthuoh, jihküjiri nga letseravehthuoh, wupiekünari nga mütseramüthuoh, khünakürüpori nga zanyokünaravehthuoh, küsüri nga sakürholeravehthuoh, thi Zhühthe Kümühiewa vi kümükhuori vü küüza vi mari azhi saravehthuoh.

⁶Thi anyi küsüküsü nga hi sie amüshe küsü sakütseri nü kümüngatsari,” ti küza.

⁷Johan sehnyiri teküwa sevü Jisu tü Johan kürho vi nyiri vü küza tajinü, nohri tü mowa no nti rezavü wa lo? Mürhü nüh amüshühnyawa mürhüküünga no nti wa ünü?

⁸Thinü nyiri athsü kümühie nüh küüzhuri no nti wa ünü? Halie, nyiri athsü kümühie nüh küüzhuri tü kajiri azheh vü pehveh nü.

⁹Thinü nohri tü mowa no nti wa lo? Setsaküthsüri no nti wa ünü? Ah ta küsa hi nüh küzaramühie veh, ma tü setsaküthsüri nyia vünüh küji küsü wiethuoh.

¹⁰ Hama kenüh khanavü rhüküsa kümüjie, hi nüh noh tüvü eh zhüleküvüwa küze naveh, thi ma nüh noh tüvü alewa küche naveh.

¹¹Hi nüh nohri vü küzatoke naveh, nyimzari vünüh wuo küru nyi küsüwienga Johan Baptist nyia vünüh küji müjie rhoshuhruwie, thitü rügi kajipevü thuoüji küzawa wienga nüh ma nyia vünüh ji veh.

¹² Thi Johan Baptist ru azhih hala kürho vünüh nosü küju anyiri tü küülolewa phah tajinü luoveh kütsaza satetsewiethuoh, thi luoveh kütsaza sataji tekütseri tü müle nüh ngu wievehthuoh.

¹³Johan müjieküru küju nü setsaküthsüri thi Wulewa nga Rügi kajipe zhühku vi küza.

¹⁴ Thi nohri nüh jüma tü zhütsa ta müshe nta thuoüjinü, ma tü ru nataküsawa Elijah wiethuoh.

¹⁵Akhüna peh taji küünari nü küüna luo.

¹⁶Thitü hi nüh khinyi kürhonyi hamari tü mowa nüh vi kümütehra na lo? Hamari tü kürünguori kümüjie zanyoküzhuperi vü shupe nü mari afü ji tajinü;

¹⁷“hiri nüh pilechu khuthuoh, thitü nohri tü mütsi, hiri nüh lorü kütsathuoh, thitü nohri tü mükrie,” ta küüza khewiethuoh.

¹⁸Küpakenühnyunü Johan tü ru nü kütsaküzhu müsa, thinü mari nüh, ma tü tsuore sietse, ta küza.

¹⁹Thinü anyi Tsawa tü ru ünü kütsaküzhu sanü, mari nüh, halie, ashiekütsachawa thi küzhuchawa, atheküviri thi kükhiemuori afüwa wiethuoh! Jütawie ketünga Saküüwuowa küthsü thuoüji zhütsa ta küsa sehkhe vünüh zhünyo shuraveh, ti küza.

²⁰Jütiküsavü ma nüh sosiekütsü anyu küjiri phra, küpakenühnyunü ma nüh mari vü küüro küji satsüwie ketünga mükütsotü kenüh.

²¹ Khorazin, jie noh nga saranathuoh, Bethsaida, jie noh nga saranathuoh, küpakenühnyunü küüro küji nosü vü küsari Tair thi Sidom masü vü küsatüla masü tü khana vünüh atsahkie; thi aweji vünüh luoveh khaphrümüwienathuoh nü.

²²Thitü hi nüh nohri vü küza naveh, thuotüvü ashiküsa tsothovü nohri khuke nyia vünüh Tair thi Sidom masü ashih nüh küürüzi naveh.

²³ Thi noh Kapernaum, noh tü noh sakümüsie tajinü thajüwu jo nti sa veh ülo? Noh sakürünyie turu nyihsuozü lovü thsemü nathuoh; küpakenühnyunü küüro küji noh vü sakütsüri Sodom vü sakütsütüla, jümatü nosü küju wienga pehlawie na nü.

²⁴ Thitü hi nüh nohri vü küza naveh, thuohtüvü ashih küsa rülo vü noh khuke nyia vünüh Sodom ashih nüh küürüzi naveh.

²⁵Jüsevü Jisu nüh azhü phrate le tajinü, halie, eh Pa, thajüwu thi azhih VÜWA, noh müna she, küpakenühnyunü noh nüh zanyo hamari vi zanyoküthsüri thi kümüshiri vü müküthsü nüh küthi sataji nü atsakürünyiri vü küüza kenüh.

²⁶Zhütsawiethuoh, eh Pa, noh notha vü thuoüji hakümjie küsanüh noh müshe thi noh külo küsa kenüh.

²⁷ Eh Pa nüh zanyo aveh hi tsümüthuoh, thi Pawa wieküchie nüh nyi küsü nga Tsawa müthsü, jükümjie Tsawa wieküchie nüh nyi küsü nga Pawa müthsü, thi kürükari vü thuoüjinü Tsawa nüh ma küzaküthsü tsü naveh.

²⁸“Nohri münomüna thi khuo küzho kütseri hi vü raluo, hi nüh kümünyie vi nohri tsü naveh.

²⁹ Eh thsokhuonyi vi vü luo, thi hi vünüh zanyothsüluo, küpakenühnyunü hi tü rünyimü thi eh luoveh nü rünyiemü, jütathuoüji nohri kürho kümünyie ngu naveh.

³⁰Küpakenühnyunü eh thsokhuonyi tü vü rüzimü, thi eh khuo nga mphiemü,” ti küza.