Read Pochuri Naga MATHI 12 Bible Online

MATHI 12 - Pochuri Naga bible

MATHI 12

¹ Jümasevü Jisu tü Judahri kümünyierülo Sabbath ti küjivü ma sehnyiri sie tajinü azhu küsü vehthuohtse ünü, masehnyiri tü mari vorüma nü nyura khuozhi rho tsa nti sa.

²Thitü Farisiri nüh jü ngu nü ma vü, “Halie, noh sehnyiri tü kümünyierülo vü wule mükünyu satse lie,” ti küza.

³Thinü ma nüh mari vü, “Nohri tü khanavü David thi masie kütseri kürüma vü mowa sanüh müchie ülo?

⁴Ma tü hiri Saküüwuowa zheh lovü tu nü levüri wieküchie nüh David nga thi ma nüh siekütseri nga kütsawule mükünyu nyuriküütsa lohsewa mütsa ülo?

⁵Nyutü levüri wie nga kümünyierülo Kükhurüzhe wulezorie wienga müküle münyie ta küsa nohri tü Wule lasilovü müchie ülo?

⁶Thitü hi nüh nohri vü küza naveh, Kükhurüzhe nyia vünüh küji küsü hala pevehthuoh.

⁷Thitü hi thuoüji zanyo nüh vi nü küsahthuoh nyia vünüh küümze nüh hi küülo khe, ta küsa zhünyowa nohri nüh küthsütüla müküle mükünyie watü müshe kümüsüwa nyu nü.

⁸Küpakenühnyunü anyi Tsawa thuoüji kümünyierülo nyiavü nga avü küsa kenüh,” ti küza.

⁹Thinü ma tü jüla nüh tseshuwa tajinü mari künazizhe lovü tu;

¹⁰thinü, halie, ake wuochuwuovü küsüri nyi küsü jüla peh la. Thinü mari nüh ma phramüsü naküsa kenüh mari nüh ma vü, “Kümünyierülo vü nyiri saküümühie wule ülo?” ti küna.

¹¹Thinü ma nüh mari vü, nohri wuori nüh anyihzhü küsü peh tajinü jüma tü kümünyierülo vü azhikrie küsü lovü tsuotsaketetu thuoüji ma tü jüma müshozhutü le naveh lo?

¹²Thinü nyiri nü anyihzhü nyia vünüh ame mükhra ülo? Jükenüh kümünyie rülo nga zanyokümühie küsa wulewie.

¹³Jütisanü ma nüh anyiwa vü, “Noh ke thsuoküze luo,” ti küza. Jüti küza ünü ma nüh ma ke thsuoküze, thi sakümühie taji wuochuwuovü kümüjie satsü.

¹⁴Thinü Farisiri tü tsezhu alievü wa tajinü ma zothe nti küsa kenüh kürüchie.

¹⁵Thinü Jisu nüh jü thsüra tajinü jüla nüh tse leküpavü tewa, thi nyiri hozake ma senyitewa, thinü ma nüh jümari aveh sakümühietsü.

¹⁶Thi nyi küsü vü nga vimüküza tümü üti ma nüh mari khehte.

¹⁷Jümatü khanavü Isaya setsaküthsüwa nüh küza küsawa saju naküsa kenüh küza küsa:

¹⁸Halie, eh siepewa, hi nüh rüka küsawa, eh küümzetsawa, eh kürholi wie nga nüh lotekütsewa. Hi nüh eh sietse vi ma nyia vü sanaveh,

¹⁹thi ma nüh kümüshowa zie taji mükütsotüri küthsükütsü naveh. Ma tü nyuri sie küproluo thi zie tsemüpehuora; thi lekhujiri vü nga nyi küsü nga ma zhü küüthsüwanyu.

²⁰Ma zhükümüshowa nüh müjiekükhrara küju nü ma tü amüshüh ji nü peküvehri nga küzoshiwa nyu, thi ma nüh anyih kütso lovü nyikhu krüpeküveh küsü nga zoküünewa nyu.

²¹Thi mükütsotüri nüh ma nyo vi nü ma luozhe peh nathuoh ta küsawa zhüri juna küsa kenüh wiethuoh.

²²Jütisaküvehvü nyiri nüh tsuore nüh mürü tekütse nothaküüju thi azhümüphrara ti küsa küsü sie mavü ru, thinü ma nüh jüma sakümühietsü nü azhümüküphrarawa tü azhü nga phrara thi notha nga zanyo ngura, ti sa.

²³Thinü nyiri aveh ngo she tajinü, “Anyi hamatü David tsa nyu ülo?” ti phrate.

²⁴Jütiküsavü Farisiri nüh jü thsüra tajinü, “Anyi hamatü Tsuore kajiwa kükhra vi tajinü hakümjie küsa küchie nüh sietse kümüsü piketü zhemüjara,” ti phrate.

²⁵Thinü ma nüh mari müshewa thsüra tajinü mari vü, kaji küsüküsü nga mari mpa mari azhie vünüh vü khuomü thuoüji zorie mümüti, thi anyu küsü nga nyutü azheh küsüküsü nga mari mpa küsuo müthuoüji mütsierathuoh.

²⁶Jükümjie Tsuore mpa nüh Tsuore zhemüthuohü jinü matü ma mpa ma vü khuomüthuoh, thi jütathuoüji ma kükaji tü mokümjie tsiera naveh lo?

²⁷Thi hi nüh Beelzebul kükhravi nü Tsuore kümüsüri zheveh thuoüji nü, noh tsari nü mowa vi jümari zhe veh lo? Jükenüh mari nüh nohri küüna naveh.

²⁸Thitü hi nüh hiri Saküüwuowa Sietse kükhra vi nü Tsuore kümüsüri zheja veh thuoüji, hiri Saküüwuowa kükajiru nohri vü ju vehthuoh.

²⁹Thi jümasevü nga, “Nyi küsü nüh kükhrari küsü phetemüchi nüh küchie nüh mokümjie tu ma zhiri vinaveh lo? Ma phete kümü sevü nüh tu ma zhiri vira naveh.

³⁰“Nyi küsüküsü nga hi wuovü mükünyuwa nü hi mükünongü wawiethuoh, thi nyi küsüküsü nga hi sie zanyo vizhuhmüküveh wathuoüjinü zhuhriemü naveh.

³¹Jükenüh hi nüh nohri vü küza naveh, kükhiemuo thi nyuri phrateküümüsü aveh thuoüji noja tsü naveh; thitü Kümtse Sietse küüjo thuoüji noja mütsüra.

³² Thi nyi küsüküsü nga anyi Tsawa vü azhükümüsü phrawie ketünga nojatsü naveh, thitü nyiküsüküsü nga Kümtse Sietse vü zhükümüsü phrathuoüji nü azhih hala kürho vü nga thi thuohtüvü kürho vü nga nomüjara.

³³“Athsorhuwa sakümühie taji ma viwa küümühie nyinü, arhuwa kümüsü mü tajinü aviwa küümüsü na lo? Küpakenühnyunü mavi vünüh ma rhuwa tü thsüra küveh kenüh.

³⁴Nohri müre rehji küthsoküzhiri, nohri tü nohri kümühie mükünyieluo mokümjie zanyokümühie phratera na lo? Küpakenühnyunü luoveh lovü zanyo kümüsü khielo ta küpe kenüh apo nüh phrazhu küveh wie.

³⁵Anyi kümühieri thuoüji ma zanyo kümühie ku lovü nüh zanyokümühie vizhuzhuti, thi anyi kümüsüri thuoüji ma zanyokümüsü ku lovü nüh zanyo kümüsü vizhuzhuti.

³⁶“Hi nüh nohri vü küza naveh, ashiküsa rülovü azhü mükümühie muomuo phraküsari aveh chiezhu tsükheh wienaveh.

³⁷Küpakenühnyunü noh zhü kenüh noh tü müshora naveh, thi no zhü kenüh noh tü müshemüsümüwie naküveh kenüh,” ti küza.

³⁸Thinü Wule küsosieri thi Farisiri wuori nüh ma vü, “Küsosiewa, hiri tü noh nüh thsoshi küsü sanü hiri küütsanthelie,” ti khuo.

³⁹Thinü ma nüh mari vü, kümüsü thi küüphroküphrie küsa anyi hamari tü thsoshi mpa phakütsewie, thitü setsaküthsüwa Jona vünüh thsoshi sakütsü nyia vü thsoshi küpa küsü nga mari mütsüle rathuoh.

⁴⁰Küpakenühnyunü Jona nüh rülo küche thi rüza küche angaküjiwa vo lovü kütü kümüjie anyi Tsawa nga rülo küche thi rüza küche azhih vo lovü tü naveh.

⁴¹Thi ashiküsa rülovü Ninevehri nüh anyi hamari siesüranü mari müshemüsü naveh, küpakenühnyunü Jona nüh wa taji mari küsosievü mari luoveh kükhaphrüra kenüh, thi halie, Jona nyia vünüh küji küsü hala pehveh.

⁴²Thi ashiküsa rülovü azhih lah vü küpeh kajivühwa nüh anyi hamari siesüra nü mari müshemüsü naveh, küpakenühnyunü ma tü azhih küpotetsa vünüh Solomon zanyoküthsü küna nta küru kenüh; thi halie, Solomon nyia vünüh küji küsü hala pehveh.

⁴³Thi mükümtse sietse tü nyiri nyi küsü vünüh shutewa thuoüji azhih ajumükünyie vü ma küpepe phawawati, thitü müngura nüh samümüti.

⁴⁴Thinü ma mpa ma jüle taji, “Hi shele khana hi peh nü tekürupe vü tewa naveh,” ti sasati. Thi ma nüh shele küru vü azhewa tü rütsola, thi ru ünü saküzü küsala ngunguti.

⁴⁵Thi jütisanü ma nyia vü nga kümüsü küpa türü siephe tajinü ma sie jülovü petewawati, thi anyi jüma kürho tü atükhu nyia vünüh asevü nüh kümüsütsa satewawati. Jükenüh khinyi anyi kümüsü hamari nga jükümjie sawie naveh, ti küza.

⁴⁶Ma tü jüüti nyiri vü zhüküza peveh ünü halie, mazah thi ma nüri ma sie kürüchiengü nü ru anyula vü tsie.

⁴⁷Thinü nyi küsü nüh ma vü, “Halie, no zah thi noh nüri nüh no jüle nthe ta ru anyula vü tsieveh lie,” ti küza.

⁴⁸Jütiküsavü ma nüh ma vü küüzawa vü, “Eh zah thawalo? Thi eh nüri nü thari lo?” ti küza.

⁴⁹Jütisanü ma nüh ma ke thsuo taji ma sehnyiri küjo nü, “Halie, eh zah; thi eh nüri,” ti küza.

⁵⁰Küpakenühnyunü anyi thari nüh rügivü küpe eh Pa kümüshe sa tse nüh, jümari tü eh nüri, thi eh tsehvüri, thi eh zah wiethuoh, ti küza.