Read Pochuri Naga MATHI 13 Bible Online

MATHI 13 - Pochuri Naga bible

MATHI 13

¹Jürülovü Jisu tü azheh jüla nüh tsezhu wa tajinü wa ajuküji natovü peh.

² Thinü anyi shieji küsü tü ru ma vü sehzhuh kheh, thinü ma tü wa ajuhie küsü lovü petewa, thi anyi shiejiwa thuoüji azhih küüwe vü peh.

³Thinü ma nüh küzhühiezhü vi nü mari vü zanyo hozake küza nü, “Halie, mahtsüküzhuh küsü tü mahtsü zhu nti wa;

⁴thinü ma tü mahtsü zhuhwa nü wuori tsuotsa taji lekhuji natovü tewa, thinü amüwari ru nü khrütsakhehmü.

⁵Thi wuori thuoüji tsuotsa taji azhih kürüpa aloza rügivü tewa, thinü azhih kürüpale kenüh shiti shozhu teru;

⁶thinü rünyi shuru nü chüküwazhümü, thi ma rüzo mükünyie kenüh chüthemü.

⁷Thi wuori tsuotsanü rüzhüza lovü tetu, thinü rüzhüri jisüra mari chihthekhehmü.

⁸Thitü wuori thuoüji tsuotsa wa azhih kümühie vü kah thi shora nü ato mühie she taji avi pera, wuori müzake, wuori rorake, thi wuori cherake, ti pera.

⁹Thari nüh khüna peh taji künangüveh nüh, küüna luo,” ti küza.

¹⁰Thinü ma sehnyiri ma vü ru nü, “Noh tü mokenüh mari vü küüzhühiezhü vi nü phrate veh lo?” ti küna.

¹¹Thinü ma nüh mari vü, “Nohri thuoüji rügi kajipe zhü küsheri küüthsü nta tsümüthuoh, thitü mari vünü jüma tsümüsa,” ti rüle tsü.

¹² Küpakenühnyunü anyi küsüküsü nga zanyo ma kevü peküvehwa thuoüji vi ma tsü le naveh, thi ma hozake pehra naveh; thitü anyi küsüküsü nga zanyo ma kevü mükünyiewa thuoüji ma kevü pehküvehwa nga visheletewa naveh.

¹³Hama kenüh hi tü küüzhühiezhü vi nü mari vü küza veh, küpakenühnyunü mari tü nowie ketünga müngu nüh sasati, thi künapeketünga müthsü nüh samü, jü mpa mükünyu müshewie ketünga mümüshera nüh sasati.

¹⁴ Mari zhüku khanavü Isaya nüh: Nohri küüna nü küna naveh, thitü piketü müthsüra wie! Thi nohri tü aküno nü no naveh, thitü piketü müngurawie.

¹⁵Küpakenühnyunü anyi hamari luoveh tü rüpomü, thi mari khüna nga zanyo künanah küsa zawumü, thi mari notha nga kümamü, küpakenühnyunü mari notha nüh nguramü, thi mari khüna nüh künaramü, thi mari luoveh nüh müsheramü, ti sanü sheleru hi vünüh saküümühie kükrü kenüh, ta setsaküthsüzhü phraküsawa tü sajumüthuoh.

¹⁶ “Thitü nohri notha nüh münga sheh, küpakenühnyunü nohri notha nüh ngura küveh kenüh, thi nohri khüna nga jüüta wie, küpakenühnyunü nohri khüna nüh künara küveh kenüh.

¹⁷Hi nüh nohri vü küzatoke naveh, khanavü setsaküthsüri thi künyitsari hozake wienga nohri nüh ngu küvehwa ngu ngüru, thitü müngura nüh samü, thi nohri nüh küna küvehri küna ngüru, thitü mükünara nüh samü.

¹⁸“Nohri jükenüh mahtsüküzhuhwa küüzhühie zhü künaluo.

¹⁹Anyi wuori thuoüji kajipe zhüwa künara, thitü mazhünyowa müthsüra nüh saküvehvü kümüsüwa ru taji nü ma luoveh lovü amahtsü zhuhke küsawa vitewawati, thi hama thuoüji amahtsü küzhuhvü lekhuji vü teküwari wiethuoh.

²⁰Thi amahtsüzhuh tajinü alohzavü teküwari thuoüji azhüwa lozhe tajinü shita küviwa wiethuoh.

²¹Thitü arüzo alovü mükünyie kenüh tsotho pike mpa küpera sa, thi azhüwa kenüh kümnomna nyutü kükho ru thuoüji shita külutewawati.

²²Thi amahtsü zhuh taji rüzhüza lovü teküturi thuoüji, azhüwa künara, thitü azhih hama külori thi kümüra künyirhieri nüh chithemü tajinü ma tü avi müpera nüh sakümüri wiethuoh.

²³Mahtsü zhuh taji azhih kümühie vü küturi thuoüji azhüwa künara taji mazhünyo thsüra, thi ma vi perarati, küperavü wuori thuoüji avi müzake pera, wuori thuoüji avi rorake pera, thi wuori thuoüji avi cherake pera,” ti küza.

²⁴Küüzhühie zhü küpa vi taji mari vü küza nti sanü, rügi kajipe thuoüji, nyi küsü nüh atsü kümühie viwa ma zhuh vü küzhuh kümüjie wiethuoh.

²⁵Thitü nyiri zetekheh küwa vünüh ma mükünongüri nüh amahwuh tsü viwa zhukeh mü tajinü teküwa kümüjie wiethuoh.

²⁶Mahtsü kümühiewa tü shozhuru nü avi peru ünü amahwuh nga shozhuteküru ngu.

²⁷Thinü azheh jüma vüwa sieperi nüh ma vü ru nü, küjiwa, noh tü mahtsü kümühie vi no zhuh vü müzhuhke ülo? Thinü mokümjie mahwuh tü sho teru thuoh lo?

²⁸Thinü ma nüh mari vü, “Hi mükünongüri mpa nüh sasatü veh,” ti rületsü. Jüti küsavü ma sieperi nüh ma vü, “Noh tü hiri küze nü jümari küüfümü mo,” ti khuo.

²⁹Thitü ma nüh, “Nyu, jüüta thuoüji nohri tü mahwuh mpa müfü nü mahtsü kümühieri nga fükemü nanü,” ti küza.

³⁰Thitü kümawie tsotho müjie küru nü jüüti masükhürü küüshomüla luo, kümawie tsotho ru chi nüh hi mpa nüh kümawieri vü, “Nohri amahwuhri vizhuh khu luo, thi tsona küsa kenüh aküshi vünüh sahsaluo, thitü atsuori thuoüji viwa nü e luo lovü vizhuh luo, ti küza naveh,” ti küza.

³¹Ma nüh mari vü küüzhühiezhü küsü küza lehü taji, “Rügi kajipe thuoüji rhünyuowi tha küsü kümüjie wiethuoh, nyi küsü nüh jüma viwa tajinü ma zhuh vü küzhuh kümüjie.

³²Jümatü amahtsüri aveh zhie nüh küzatsawa, thitü jümatü shozhuru thuoüji apra küpari aveh nyia vünüh ji tajinü athsorhu satewawati, thi prükütse müwari ru nü ma tsuonari kükhuvü münyienyieti,” ti küza.

³³Ma nüh küüzhühie zhü küpa küsü mari vü küza le taji, “Rügi kajipe thuoüji ahzhi kümüjie wiethuoh, jümathuoüji nyimzari küsü nüh ahie küüto küche lovü thse nü müjie küshüzhu küju nü küthi küsa kümüjie wiethuoh,” ti küza.

³⁴Zanyo hamari aveh Jisu nüh küüzhühiezhü vünüh anyi riekhuowa vü küza, thi küüzhühiezhü mükünyu nü ma tü zanyo küsü nga vi müküza.

³⁵ Hama tü küpakenühnyunü thitü khanavü setsaküthsüwa nüh, “Hi nüh küüzhühiezhü phra na küsa kenüh eh po ka naveh, azhih küsate vünüh küthi küsari hi nüh küzazhutsü naveh,” ti küza.

³⁶Jütisanü ma tü anyi riekhuowa jamü tajinü azheh lovü tetu, thinü ma sehnyiri tü ma vü ru nü, “Azhuh vü amahwuh zhünyowa tü rüle hiri vü küza jie,” ti khuo.

³⁷Thinü ma nüh mari vü, “Thawa nüh amahtsü kümühie zhuhtsü nüh jüma thuoüji anyi Tsawa wiethuoh,” ti küza.

³⁸Azhühwa thuoüji azhihwa wiethuoh, thi amahtsü kümühieri thuoüji kajipe tsari wiethuoh, thi amahwuhri thuoüji kümüsü atsari wiethuoh.

³⁹Thi mükünongüri nüh zhuh kümütüwa thuoüji Tsuore, thi kümawie thuoüji wa azhih asehkhe kürhowa, thi kümawieri thuoüji rügivü zhüleri.

⁴⁰Thi amahwuh vizhuh taji anyih vünüh kütso thuoüji, hakümjie akürho sehkhe vü nga sanaveh.

⁴¹Anyi Tsawa mpa nüh ma zhüleri küze tajinü ma kajipe vü zanyo samüsükütseri thi wule mükünyu saküvehri aveh vizhuhmü naveh.

⁴²Thi jütisanü müne nüh jupehuo küveh anyih lovü thsemü naveh; jüla nüh krie thi aha hari nü peh naveh.

⁴³Thi künyitsari thuoüji mari Pa kajipe vünüh arünyi kümüjie wierake nü peh navehthuoh. Thari nüh khüna pehveh nüh jümari nü küüna luo.

⁴⁴Jüsevü nga rügi kajipe thuoüji azhuh küsü vü künyirhie küthi küsa kümüjie; nyi küsü nüh jüma künguravü küthisa tajinü ma loküzhe vünüh wa ma zhi küperi aveh zhumü tajinü azhuh jüma küsü kümüjie wiethuoh.

⁴⁵Jüsevü nga, rügi kajipe thuoüji asü küsari küsü nüh azho kümühietsawa phakütse kümüjie wiethuoh.

⁴⁶Ma tü azho amehkükhra tsawa ngura thuoüji wa nü ma zhi küpe aveh zhumü tajinü jüma küsü kümüjie wiethuoh.

⁴⁷Jümasevü nga rügi kajipe thuoüji aneh küsü juküji lovü vehjake taji anga müküzüküzü kütiezhuhra kümüjie wiethuoh;

⁴⁸jümatü anga khielo ta küza thuoüji alievü shozhu nü shupe taji kümühieri thuoüji rüka nü akhuo lovü thse thi kümüsüri thuoüji khuja kümü kümüjie wiethuoh.

⁴⁹Azhih kürho sehkhe vü nga jükümjie sa wienathuoh, rügivü zhüleri ru nü künyitsari vünüh muomuoküsari rükazhuh küpa tewa wie nathuoh.

⁵⁰Thi jütisanü müne nüh juküpehuo anyih lovü thsemü naveh, jüla nüh krie thi aha hari nü pe naveh.

⁵¹Jisu nüh mari vü, “Nohri azhü zhühnyo hamari aveh thsüra thuoh ülo?” ti küna. Thinü mari nüh ma vü, “Ah, VÜWA,” ti rületsü.

⁵²Thinü ma nüh mari vü, “Jükenüh Khonyo küsosieri küsüküsü nga sosie taji, rügi kajipe lovü thsekümüri thuoüji azheh avü küsü nüh zanyoku küsü lo vünüh zanyo kürüthe thi kürüwi küvizhuh kümüjie wiethuoh,” ti küza.

⁵³Thinü Jisu nüh küüzhühiezhü jümari aveh phratemü tajinü jüla nüh tsezhutewa.

⁵⁴Jütisanü mampa ma nyu vü wa ünü mari künazizhe vünüh mari sosie, thinü mari tü mari ngo sheh taji, “Anyi hamatü khiela nüh zanyoküthsü thi küüro küji hamari tü ngura lo?” ti phrate.

⁵⁵Hamatü athso misitiriwa tsa nyu ülo? Thi ma za Maria ta küjiwa nyu ülo? Ma nüri Jems, Joses, Simon thi Judahri nyu khe ülo? ti sa.

⁵⁶Thi ma tsevühri nga hiri kürü pemüveh ülo? Thinü anyi hama tü khiela nüh zanyo hamari aveh ngura lo? ti sa.

⁵⁷ Jütisanü mari tü ma vü luoveh müsütewa. Thitü Jisu nüh mari vü, “Setsaküthsüri tü ma mpa ma nyu vü thi ma mpa ma zhekhre vü küchie nüh azhie küpa aveh vü thuoüji küsiake zhile,” ti küza.

⁵⁸Thi mari nüh mütsotü nüh sakümü kenüh ma tü jüla küüro aküji hozake müsanüh samü.