Read Pochuri Naga MATHI 14 Bible Online

MATHI 14 - Pochuri Naga bible

MATHI 14

¹Jütiküsa tsothovü küjiwa Herod tü Jisu nyo thohla she kümü künara tajinü,

²ma sieperi vü, “Hama tü Johan Baptistwa wiethuoh, ma tü aküsü vünüh rhosüra savehthuoh, jükenüh mari tü ma vünüh küngo küürori saküvehwie,” ti küza.

³ Herod hama tü khanavü ma nü Filip vüvüh Herodia kenüh Johan re nü ma phe tajinü küsizhe lovü thsemü.

⁴ Küpakenühnyunü Johan nüh ma vü, “Noh tü nyimza hama küzale nyu,” ta küüza kenüh.

⁵Thi Herod tü Johan fethengü teru, thitü anyi riekhuowa krütewa, küpakenühnyunü mari nüh ma tü setsaküthsüri küsü ta küchieke kenüh.

⁶Thitü Herod küwuo rülo ru ünü Herod vüvüh atsa nüh tsihkütsa tajinü ma sakülozhe tsü.

⁷Jükenüh rülawa nüh mowa khuo naveh nüh vi ma tsü nta küsa zhü phrazhutsü.

⁸Thinü rülawa tü ma zah nüh ma vü küüza kümüjie, “Johan lü thuoh tajinü akhu lovü thse nü shiti virutsü üti khuo,”

⁹Thitü ma nüh nyiri ru ma zheh vü tsazhu küperi tü vünüh küshie kümüthuoh kenüh vi ma tsüna thuohti azhü tsümü.

¹⁰Jütisanü ma nüh nyiri küze taji küsizhe vünüh Johan lü thuoh.

¹¹Thi alüwa tü akhu küsü lovü thse nü viru rülawa tsü, thinü rülawa nga vishele wa ma zah tsümü le.

¹²Thinü Johan sehnyiri nüh ru ma kümo khatewa nü chowumü, thi mari tü wa nü Jisu vü küza.

¹³Thinü Jisu tü azhü jüma thsüra nü jüla nüh juhie küsü vünüh hie azhie küüzo küsü vü külesho tewa, thinü nyiri tü jü thsüra tajinü mari anyu jamü tajinü ajih vünüh tse ma se nyi tewa.

¹⁴Jütiküsavü ma tü ajuhie vünüh tseshuhru ünü anyi shieji küsü ngu tajinü ma nüh mari no küümze kenüh künari sakümühie tsü kheh.

¹⁵Jütiküsavü münüleh teru ünü ma sehnyiri tü ma vü ru mari küze taji anyu vünüh kütsaküzhu küsümüluomo, ti küza.

¹⁶Thitü Jisu nüh mari vü, “Nohri mokenüh mari küze na lo? Nohri zanyo vi mari kütsaluo,” ti rületsü.

¹⁷Thinü mari nüh ma vü, “Hiri nüh khinyi peküveh thuoüji lohse münga thi anga künyi mpathuoh,” ti rületsü.

¹⁸Thinü ma nüh mari vü, “Jümari viru hi tsüluo,” ti khuo.

¹⁹Jütiküsavü ma nüh anyi shiejiwa vü phrato rügivü shupe kheh üti azhütsü, jütisanü ma nüh lohse münga thi anga künyi ti vi nü thajüwu rügivü no taji tsia jümari nyia vü thse nü zokhuo nü ma sehnyiri vü tsü, thi ma sehnyiri nüh külieluo taji nyiri vü tsü, ti sa

²⁰Thi mari aveh nga tsa tajinü müwakheh; thi mari nüh tsatu küja phahzhu küwavü akhuo türakünyi phahzhura.

²¹Thi jüla kütsari krevühri thi atsari müchie nüh krepari mpa küchie anyie münga tsa.

²²Jümasevü müküzhike wiethuoh nüh Jisu nüh nyiri saküze pehküvehvü ma sehnyiri tü juhie lovü tu nü ma tüvü azhie küpa vü tewa üti küza.

²³Thi ma nüh anyi riekhuowa saküze kümüsevü ma mpa kükhuo sa nti küzhiho rügivü tewa, jüti sataji nü münüle teru ünü ma mpa jüla petewa.

²⁴Hakümjie küsa tsothovü juhiewa tü mürhü atü vünüh weke kümü kenüh aju nüh küshü taji juküji azhila vü tewa.

²⁵Jüti küsavü rüne bafe küche thi türo azhie vü ma tü juküji rügi vünüh tse ma sehnyiri vü ru.

²⁶Thinü ma sehnyiri nüh ma juküji nyia vü tse kütse ngu tajinü mari tü khieloti krü nü, “Sietse küsü tsethuoh,” ti sanü krü kümü kenüh zia.

²⁷Mari jüüti sapeküveh vü ma nüh shiti mari vü küza tajinü, “Hi wiethuoh tinü nohri mükrü tümü nü lozheluo,” ti küza.

²⁸Thinü Pitor nüh ma vü, “VÜWA, no wie thuoüji, hi tü aju nyia vünüh tse no vü küüru üti küzajie,” ti khuo.

²⁹Jütiküsavü ma nüh, “Raluo,” ti küza. Thinü Pitor tü juhie vünüh tseturu aju nyiavü nüh tse Jisu vü ru.

³⁰Thitü ma tü mürhü kümüsü ngu nü krütewa, thi aju lovü kuoreteküwa kenüh zia taji, “VÜWA, hi külole luo,” ti khuo.

³¹Thinü Jisu nüh shiti ma ke thsuo küze taji ma shoke tajinü ma vü, “Halie, no kütsotü küzüla anyiwa, no mokenüh kütsotü mükütoh nüh samü lo?” ti küza.

³²Jütisanü masü juhie lovü tsetu ünü mürhü mümürhü nüh letewa.

³³Thinü juhie lovü peküvehri nüh ru ma khurü taji, “Zhütsa wiethuoh, noh tü Saküüwuowa Tsa tsah wiethuoh,” ti küza.

³⁴Jüti satajinü mari juküjiwa kari tajinü tse Gennesaret azhih vü teru.

³⁵Thinü anyu jüla nyiri nüh ma ta küsa küthsüravü mari tü anyi küze taji anyu jüla poteposhu aveh vünüh künari aveh sie nü ma vü ru.

³⁶Thinü mari nüh ma vü, “Athsühu wienga raküüpa wieluo üti khuo,” thi künari küzake nüh ma thsühu pa nüh mari aveh mühierakheh.