Read Pochuri Naga MATHI 16 Bible Online

MATHI 16 - Pochuri Naga bible

MATHI 16

¹ Jütiküsavü Farisiri thi Sadusiri ma vü ru nü ma müte nti küsa kenüh rügi vünüh thsoshi sa mari kütsa üti khuo.

²Thitü ma nüh rüle taji mari vü, “Münüleh vü nohri nüh, tsole mühienathuoh, küpakenühnyunü Thajüwu müruküveh kenüh,” ti küzazati.

³Thi rüne vü thuoüji nosü tsole mümühie nüh sanaveh, küpakenühnyunü thajüwu müru thi küzho ti satekütse kenüh, ti sasati. Halie, nohri küthse küsari, nohri thajüwu atso thuoüji kümüsü mühie thsüra veh, thitü atsothora thsoshi thuoüji thsümüküpara ülo?

⁴ Akhuoke kümüsü thi küüphroküphrie küsa anyi hamari tü thsoshi phaveh, thitü Jona vünüh thsoshi küsa nyia vü thsoshi küpa sakütsülewa nyuthuoh. Ti küza nü ma tü mari jamü taji tewa.

⁵Jüsevü ma sehnyiri tü tse azhie küpa wuovü tewa ünü alohse küsü nga müvi nüh kümamü nü tewa.

⁶ Thinü Jisu nüh mari vü, “Nohri Farisiri thi Sadusira ahzhi vünüh nohri mpa kükheke thi azhüzhüluo,” ti küza.

⁷Thinü mari mpa kürüchie tajinü, hiri tü alohse küsü nga vimütsethuoh, ti haluo.

⁸Jütiküsavü Jisu nüh jü thsüra tajinü mari vü, “Halie, nohri kütsotü küzülari, nohri lohse vü mükütse kenüh mokenüh nohri mpa nohri azhie vünüh haluo tse lo?” ti küna.

⁹ Nohri khinyi nga müjie thsüwie lo? Lohse münga vi anyi nyie münga vo sanü akhuo küzake küpro khuhzhulera nüh mümüshe wie ülo?

¹⁰ Nyutü lohse türü vi anyi nyie müzü avo sanü nohri akhuo küzake phahzhura le nüh nohri mümüshe wie lo?

¹¹Nohri tü hi nüh lohse zhü phratemükütse nga nohri tü müthsü wie lo? Nohri mpa Farisiri thi Sadusiri ahzhi vünüh azhüzhüluo, ti küza.

¹²Jüsevü nüh ma nüh mari tü ahzhi vünüh azhüzhüluo ta küsa nyuthuoh nü Farisiri thi Sadusiri küsosiezhü vünüh azhüzhüluo ta küsa wiethuoh ta küsa thsüra.

¹³Jüsevü Jisu tü tse Filipi vü Sizeria ti küsa vü ru taji ma sehnyiri vü, “Nyiri nüh anyi Tsawa tü thawa ti sasatilo?” ti küna.

¹⁴ Thinü mari nüh, “Wuori thuoüji noh tü Johan Baptist ta, wuori thuoüji Elijah ta, thi wuori thuoüji Jeremia nyutü setsaküthsüri azhie nüh küsü ta küza veh,” ti küza.

¹⁵Jütiküsavü ma nüh mari vü, “Thinü nohri nü hi tü thawa ti saveh lo?” ti küna.

¹⁶Thinü Simon Pitor nüh rüle taji, “Noh thuoüji Khrista, rhokütse hiri Saküüwuowa Tsawa wiethuoh,” ti rületsü.

¹⁷Jütiküsavü Jisu nüh ma rüle taji, “Noh Simon, Johan tsa, no kümüngatsawa wiethuoh; küpakenühnyunü azhü hatü satsa thi azüh vünüh no vü küzaküüthsünyu nü eh Pa rügivü küpewa mpa nüh no vü küüza wie.

¹⁸Thi hi nga no vü küza naveh, noh tü Pitor, thi aloh hama rügi vünüh eh Nazizheh sanaveh; thi nyihsuozü akheri kükhra wie nga ma küphehtera küpewanyu.

¹⁹ Hi nüh rügivü kajipe kükhetevüh vi no tsü naveh, thi noh nüh azhih vü momowa khehte naveh nüh rügivü nga khewie naveh, thi noh nüh azhih vü momowa satsü naveh nüh rügivü nga satsü wie naveh,” ti küza.

²⁰Jütiküsavü ma tü Khrista ti küsa vi nyi küsüvü nga müküzatümü üti ma nüh mari vü küza phoke.

²¹Jisu tü Jerusalem vü wa taji kükhruori thi levü küjiri thi Wule küsosieri ake vünüh khielota münomüna thi fethemü taji rülo küche vünüh rholemüsüraji mümühie ta küüza hala nüh apokhu.

²²Thinü Pitor nüh ma sie küpavü wa nü ma phrataji, “Saküüwuowa nüh hama küüsawanyu, VÜWA! piketü no hakümjie küüsawanyu,” ti küza.

²³Thitü ma nüh Pitor vü kürele ru taji ma vü, “Tsuore, no eh sevü tseketewaluo, no khinyi nga eh leh khewieveh, küpakenühnyunü noh tü Saküüwuowa vünüh nyu nü nyiri wuo vünüh küsa kenüh,” ti küza.

²⁴ Jüsevü Jisu nüh ma sehnyiri vü, “Nyi küsüküsü nga eh se künyingüri thuoüji ma mpa ma vi azhüzhü taji ma khieluothso kha nü eh se küünyi luo,” ti küza.

²⁵ Küpakenühnyunü anyi küsüküsü nga ma mpa ma satsa kürüpa taji vi ma zhi küsangüri thuoüji jüma kümiewie naveh, thitü nyi küsüküsü nga eh kenüh ma kürho küümieri thuoüji jüma nguralewie naveh.

²⁶Thi nyi küsü nüh azhih aveh vi ma zhi sara taji ma kürho kümie müthuoüji, ma tü mokünyiawa peveh lo? Nyutü nyiri nüh mowa vi ma kürholi mütho sa le naveh lo?

²⁷ Küpakenühnyunü anyi Tsawa tü ma Pa kükhra vi taji ma zhüleri sieru naveh, thi ma nüh nyira küüro momota sahsa veh nüh tsü le na küveh kenüh.

²⁸Hi nüh nohri vü küzatoke naveh, anyi hala tsieküveh wuori thuoüji anyi Tsawa ma kajipe vü müjie küra atüvü aküsü kümütuwa nyu, ta sape veh, ti küza.